ସକାଳୁ ସକାଳୁ କ୍ଷୀର ଛିଣ୍ଡିଗଲେ ପ୍ରାୟ ଲୋକ ମନ ଦୁଃଖ କରିଥାନ୍ତି । ଏପରିକି ମୁଡ୍ ମଧ୍ୟ ଖରାପ ହୋଇଯାଏ । କିଛି ଲୋକ କ୍ଷୀର ଛିଣ୍ଡିଗଲେ ଏହାକୁ ଫିଙ୍ଗି ଦେଉଥିବା ବେଳେ ଆଉ କିଛି ଛେନା ବାହାର କରି ପାଣିକୁ ଫିଙ୍ଗି ଦେଇଥାନ୍ତି । କିନ୍ତୁ ଜାଣନ୍ତି କି? ଆପଣ ଫିଙ୍ଗି ଦେଉଥିବା ଛେନା ପାଣି ହେଉଛି ପ୍ରୋଟିନ୍ର ପାୱାର ହାଉସ୍ । ଏହା ଶରୀରକୁ ବିଭିନ୍ନ ଭାବରେ ଲାଭ ପହଞ୍ଚାଇଥାଏ । ଏପରିକି ପାଟିର ସ୍ୱାସ୍ଥ୍ୟଠାରୁ ଆରମ୍ଭ କରି ହାଡ଼ ଯାଏ ସବୁକିଛି ପାଇଁ ଲାଭଦାୟକ ।
ପ୍ରୋଟିନ୍ର ପାୱାର ହାଉସ୍
କ୍ଷୀର ଛିଣ୍ଡିବା ପରେ ସେଥିରୁ ଛେନା ବାହାରିଥାଏ । ଏହି ଛେନାପାଣିରେ ଭରପୂର ମାତ୍ରାର ପ୍ରୋଟିନ୍ ରହିଥାଏ । ଏହି ପ୍ରୋଟିନ୍ ମାଂସପେଶୀର ବିକାଶ, ମରାମତି ଓ ସୁସ୍ଥ ରଖିବାରେ ଖୁବ୍ ସହାୟକ ହୋଇଥାଏ । ବିଶେଷକରି ଆଥ୍ଲେଟ୍ ଓ ଜିମ୍ ଯାଉଥିବା ବ୍ୟକ୍ତିମାନଙ୍କ ପାଇଁ କୌଣସି ବରଦାନଠାରୁ କମ୍ ନୁହେଁ । ଅବଶ୍ୟ ସାଧାରଣ ଲୋକମାନଙ୍କ ନିୟମିତ ଜୀବନରେ ଆବଶ୍ୟକ ପ୍ରୋଟିନ୍କୁ ପୂରଣ କରିଥାଏ । ଯଦି ଆପଣ ନିରାମୀଷ ଖାଉଥାନ୍ତି, ତେବେ ଏହା ଆପଣଙ୍କ ପାଇଁ ସବୁଠାରୁ ଶ୍ରେଷ୍ଠ ବିକଳ୍ପ ।
ବଢାଏ ହଜମ କ୍ଷମତା
ଛେନା ପାଣିରେ ଲାକ୍ଟିକ୍ ଏସିଡ୍ ଓ କିଛି ଏମିତି ଏନ୍ଜାଇମ୍ ରହିଥାନ୍ତି, ଯାହା ହଜମ ପ୍ରକ୍ରିୟାକୁ ବଢାଇଥାନ୍ତି । ଏହା ପେଟକୁ ହାଲ୍କା ରଖିବା ସହ କବ୍ଚ ସମସ୍ୟାକୁ ଦୂର କରିବାରେ ସାହାଯ୍ୟ କରିଥାଏ । ଏଥିରେ ଥିବା ପ୍ରୋବାୟୋଟିକ୍ସ ଅନ୍ତନଳୀକୁ ସୁସ୍ଥ ରଖିବାରେ ପ୍ରମୁଖ ଭୂମିକା ତୁଲାଇଥାନ୍ତି ।
ହାଡ଼କୁ ମଜଭୁତ କରେ
କ୍ୟାଲସିୟମ୍ ଓ ଫସ୍ଫରସ୍ ପରି ଖଣିଜ ପଦାର୍ଥ ହାଡ଼ ଓ ପାଟିର ସ୍ୱାସ୍ଥ୍ୟ ପାଇଁ ଖୁବ୍ ଜରୁରି, ଯାହା ପାଇଁ ଛେନା ପାଣି ଶ୍ରେଷ୍ଠ ବିକଳ୍ପ । ଛେନା ପାଣିରେ ଏହି ଖଣିଜ ପଦାର୍ଥ ଭରି ରହିଛି, ଯାହା ହାଡ଼କୁ ମଜଭୁତ କରିବା ସହ ଅଷ୍ଟିଓପୋରୋସିସ୍ ପରି ରୋଗର ଆଶଙ୍କାକୁ କମ୍ କରିଥାଏ ।
ଜଳ ଶୁଷ୍କତାକୁ ଦୂରାଏ
ଗରମ ଦିନ ହେଉ ଅବା ଅନ୍ୟଦିନରେ ଶରୀରକୁ ଜଳଶୁଷ୍କତାଠାରୁ ଦୂରେଇ ରଖିବା ଖୁବ୍ ଜରୁରି । ସେଥିପାଇଁ ଛେନା ପାଣି ଖୁବ୍ ଉପକାର । ଏଥିରେ ଥିବା ଇଲେକ୍ଟ୍ରୋଲାଇଟ୍ସ ଶରୀରରେ ତରଳ ପଦାଥରେ ସନ୍ତୁଳନ ରକ୍ଷା କରିଥାଏ । ଫଳରେ ଶରୀରରେ ଜଳଶୁଷ୍କତା ହେବାର ଆଶଙ୍କା କମ୍ ରହିଥାଏ ।
ତ୍ୱଚା ଓ କେଶ ପାଇଁ ବରଦାନ
ଏଥିରେ ଥିବା ପୋଷକ ତତ୍ତ୍ୱ ବିଶେଷକରି ପ୍ରୋଟିନ୍ ଏନଂ ଭିଟାମିନ୍, ତ୍ୱଚା ଓ କେଶକୁ ସୁସ୍ଥ ରଖିବାରେ ବେଶ୍ ସହାୟକ ହୋଇଥାଏ । ପ୍ରୋଟିନ୍ କେଲୋଜନ୍ ଉତ୍ପାଦ ପାଇଁ ଜରୁରି, ଯାହା ତ୍ୱଚାର ଚିକ୍କଣପଣ ସହ ଯୁବାବସ୍ଥା ବଜାୟ ରଖିବ । ସେହିପରି ଭିଟାମିନ୍ସ ଓ ମିନେରାଲ୍ସ କେଶକୁ ମଜଭୁତ ରଖିବା ସହ ଶରୀରକୁ ସୁସ୍ଥ ରଖିଥାଏ।
