ଭୁବନେଶ୍ୱର ୨୭/୦୬: ଏବେକାର ଜୀବନଶୈଳୀ ଯେତେକି ସୁବିଧା ଦେଉଛି, ସେତିକି ନିରବ ସମସ୍ୟା ମଧ୍ୟ ସୃଷ୍ଟି କରୁଛି । କିଛି ବର୍ଷ ପୂର୍ବେ ଯେଉଁ ରୋଗ ୫୦ ବର୍ଷ ବୟସ୍କଙ୍କୁ ହେଉଥିଲା, ସେହି ସମସ୍ୟା ଏବେ ୨୫- ୩୦ ବର୍ଷର ଯୁବବର୍ଗଙ୍କଠାରେ ଦେଖିବାକୁ ମିଳୁଛି । ମଧୁମେହ, ଉଚ୍ଚ ରକ୍ତଚାପ, ମୋଟାପଣ ଓ ହୃଦ୍ଘାତଜନିତ ସମସ୍ୟା ଏବେ କେବଳ ବୟସ୍କଙ୍କ ସମସ୍ୟା ହୋଇ ରହିନାହିଁ, ବରଂ ଯୁବବର୍ଗଙ୍କୁ ମଧ୍ୟ କରାଗ୍ରତ କରିଚାଲିଛି । ଯୁବବର୍ଗ ଏବେ ବୟସ୍କଙ୍କ ରୋଗରେ ଆକ୍ରାନ୍ତ । ତେବେ କ'ଣ ପାଇଁ ହେଉଛି ଏହି ସମସ୍ୟା ଚାଲନ୍ତୁ ଜାଣିବା ବିଶେଷଜ୍ଞଙ୍କଠାରୁ । ଏଣ୍ଡୋକ୍ରୋନୋଲୋଜି ଏବଂ ମଧୁମେହ ବିଭାଗର ବରିଷ୍ଠ ବିଶେଷଜ୍ଞ ଡାକ୍ତର ଅପରାଜିତା ପ୍ରଧାନ କଣ କହୁଛନ୍ତି ।
ବସି ବସି ରୋଗଣା ହେଉଛି ଶରୀର
ବିଶେଷଜ୍ଞଙ୍କ ମତରେ ଏବେକାର ଯୁବବର୍ଗ ସାରାଦିନ ଲାପଟପ୍, ମୋବାଇଲ୍, ଏବଂ ଅଫିସ୍ ଡେକ୍ସରେ ବସି କାମ କରୁଛନ୍ତି । ଫଳରେ ଶାରୀରିକ ସକ୍ରିୟତା କମିଚାଲିଛି । ଏହାବ୍ୟତୀତ ଲୋକଙ୍କ ପାଖରେ ବ୍ୟାୟାମ ଏବଂ ଯୋଗ କରିବା ପାଇଁ ସମୟ ନାହିଁ । ସେହିପରି ଲୋକମାନଙ୍କର ଚାଲିବା-ବୁଲିବା ଅଭ୍ୟାସ ମଧ୍ୟ କମିଚାଲିଛି । ଏହାସହିତ ସେମାନେ ଘଣ୍ଟା ଘଣ୍ଟା ସ୍କ୍ରିନ୍ ଆଗରେ ବିତାଇ ଚାଲିଛନ୍ତି, ଯାହା ଧୀରେ ଧୀରେ ଶରୀରକୁ ଭିତରୁ ଦୁର୍ବଳ କରିଚାଲିଛି ।
ଫାଷ୍ଟଫୁଡ୍ ସାଜୁଛି ନିରବ ଘାତକ
ଅଧିକାଂଶ ଯୁବବର୍ଗ ପ୍ୟାକେଜ୍ଡ ଫୁଡ୍ ଓ ଉଚ୍ଚ ଶର୍କରାଯୁକ୍ତ ପାନୀୟ ଉପରେ ବେଶୀ ନିର୍ଭରଶୀଳ ରହୁଛନ୍ତି । ଘର ଖାଦ୍ୟକୁ ଛାଡି ବାହାର ଖାଦ୍ୟକୁ ଗୁରୁତ୍ୱ ଦେବା ଖୁବ୍ ସାଧାରଣ ହୋଇପଡିଲାଣି । ଫଳରେ ଶରୀରରେ ଫ୍ୟାଟ୍, ଶର୍କରା ଓ ଖରାପ କୋଲେଷ୍ଟେରଲ୍ର ସ୍ତର ବଢିବାରେ ଲାଗିଛି, ଯାହା ମଧୁମେହ ଓ ହୃଦ୍ଘାତ ପରି ରୋଗର କାରଣ ସାଜୁଛି ।
ମାନସିକ ଚିନ୍ତା
କଲେଜ୍ରେ ଟପ୍ କରିବା ଅବା କ୍ୟାରିଅରରେ ଆଗକୁ ଯିବା ଏହାକୁ ପ୍ରାୟ ଯୁବବର୍ଗଙ୍କ ଭିତରେ ବଢିଚାଲିଛି ପ୍ରତିଯୋଗିତା, ଯାହା ବଢାଉଛି ସେମାନଙ୍କର ମାନସିକ ଚାପ । ଏହାସହ ପାରିବାରିକ ଦାୟିତ୍ୱ, ସୋସିଆଲ୍ ମିଡିଆ ଚାପ ଏବଂ ଭବିଷ୍ୟତ ଚାପ ମାନସିକ ସ୍ୱାସ୍ଥ୍ୟକୁ ପ୍ରଭାବିତ କରିଥାଏ । ଏହି ଚିନ୍ତା ବଢିବାରୁ ଧୀରେ ଧୀରେ ନିଦର ଅଭାବ, ଭାବପ୍ରବଣ ଭାବେ ଖାଇବା ଏବଂ ହର୍ମୋନାଲ୍ ଅସନ୍ତୁଳନ ଯୋଗୁ ପରିବର୍ତ୍ତନ ଆଦି ରୋଗକୁ ନିମନ୍ତ୍ରଣ ଦେଇଥାଏ ।
ନିଶାର ଅଭ୍ୟାସ
କିଛି ଯୁବବର୍ଗ ଧୂମପାନ, ମଦ୍ୟପାନ ଓ ନିଶା ଅଭ୍ୟାସରେ ଅଭ୍ୟସ୍ତ ହୋଇପଡିଥାନ୍ତି । ଏହି ଅଭ୍ୟାସ ଶରୀରକୁ ଭିତରୁ ପ୍ରଭାବିତ କରିଚାଲେ। ଦୀର୍ଘଦିନ ପରେ ଏହା ହୃଦୟ, ଲିଭର୍ ଓ ଅନ୍ୟାନ୍ୟ ଅଙ୍ଗକୁ ଖୁବ୍ କ୍ଷତି ପହଞ୍ଚାଇଥାଏ । ସମୟ ବ୍ୟବଧାନରେ ପରୀକ୍ଷା ଜରୁରି ପ୍ରାୟ ଯୁବବର୍ଗଙ୍କୁ ଲାଗିଥାଏ ‘ଆମେ ତ ଯୁବା, ଆମକୁ କଣ ହେବ ।’ ଏହି ଭାବନା ଯୋଗୁ ନିୟମିତ ସ୍ୱାସ୍ଥ୍ୟ ପରୀକ୍ଷାଠାରୁ ଦୂରେଇ ରହିଥାନ୍ତି । ଶେଷରେ ଯେବେ ରୋଗ ଜଣାପଡିଥାଏ, ସେତେବେଳକୁ ଶରୀରର ବିଭିନ୍ନ ଅଙ୍ଗ ସଂକ୍ରମିତ ହୋଇସାରିଥାଏ ।
କେତେ ପ୍ରଭାବିତ ହୁଏ ଶରୀର
ଜୀବନ ଜୀଇଁବାର ଗୁଣବତ୍ତା କମିଚାଲେ । ଥକାପଣ, ଚିଡଚିଡାପଣ, ନିଦର ଅଭାବ ଏବଂ ଆତ୍ମବିଶ୍ୱାସର ଅଭାବ ଆସିଥାଏ । କର୍ମକ୍ଷେତ୍ରରେ ପ୍ରଦର୍ଶନ ପ୍ରଭାବିତ ହେବା ସହ କ୍ୟାରିଅର ବିକାଶ ଅଟକିଯାଇଥାଏ । ଭବିଷ୍ୟତରେ ରୋଗ ଚରମ ସ୍ଥିତିରେ ପହଞ୍ଚିସାରିଥାଏ।
କେମିତି ଦୂରେଇବେ ରୋଗଠାରୁ
ନିୟମିତ ବ୍ୟାୟାମ, ସନ୍ତୁଳିତ ଡାଏଟ୍, ଚିନ୍ତାକୁ ଚିହ୍ନନ୍ତୁ ଓ ଦୂରାନ୍ତୁ, ସମୟ ବ୍ୟବଧାନରେ ସ୍ୱାସ୍ଥ୍ୟ ଚେକ୍ଅପ୍ କରାନ୍ତୁ ଓ ନିଶାଠାରୁ ଦୂରେଇ ରୁହନ୍ତୁ
