ବାରିପଦା, ୧୪/୦୯ : ଲକ୍ଷ୍ମୀପୋଷି ଠାରେ ଆଦିବାସୀଙ୍କୁ ଧର୍ମ ପରିବର୍ତ୍ତନ ପାଇଁ ଚାଲିଥିବା ଷଡ଼ଯନ୍ତ୍ରକୁ ବିରୋଧ କରି ଭଞ୍ଜପୁର ଥାନାରେ ସୃଷ୍ଟି ହୋଇଥିବା ଉତ୍ତେଜନା ପ୍ରସଙ୍ଗରେ ଆକ୍ସନ ମୋଡ଼ରେ ଜିଲ୍ଲା ପୁଲିସ। ଦାୟିତ୍ବରେ ଅବହେଳା ପାଇଁ ମୟୂରଭଞ୍ଜ ଏସପି ବି. ଗଙ୍ଗାଧର ଭଞ୍ଜପୁର ଥାନାର ଜଣେ ପୁଲିସ ଏଏସଆଇ ଛବିଳକାନ୍ତ ନାୟକଙ୍କୁ ଚାକିରୀରୁ ନିଲମ୍ବିତ କରିଛନ୍ତି। ସେହିପରି ସବ୍-ଇନ୍ସପେକ୍ଟର ସାବିତ୍ରୀ ଦଳେଇଙ୍କୁ ପୁଲିସ ମୁଖ୍ୟାଳୟକୁ ବଦଳି କରିଥିବା ଜଣାପଡିଛି।
ବାରିପଦା ପୌରପାଳିକାର ଲକ୍ଷ୍ମୀପୋଷି ସ୍ଥିତ ହେମଚନ୍ଦ୍ରପୁରରେ ନିରୀହ ଆଦିବାସୀଙ୍କୁ ପ୍ରଲୋଭିତ କରି ଧର୍ମାନ୍ତରୀକରଣ କରୁଥିବା ଅଭିଯୋଗରେ ଭଞ୍ଜପୁର ଥାନାରେ ବିଜେପି, ବିଶ୍ଵହିନ୍ଦୁ ପରିଷଦ ଏବଂ ବଜରଙ୍ଗ ଦଳ ପକ୍ଷରୁ ଅଭିଯୋଗ ହୋଇଥିଲା। ସେଠାରେ ଧର୍ମସଭା କରି ଖ୍ରୀଷ୍ଟ ଧର୍ମ ପ୍ରଚାର କରୁଥିବା ଗୋଷ୍ଠୀ ପକ୍ଷରୁ ମଧ୍ୟ ଭଞ୍ଜପୁର ଥାନାରେ ଆଉ ଏକ ପ୍ରତି ଅଭିଯୋଗ ହୋଇଥିଲା। ପୃଥକ ଭାବେ ଦୁଇ ଗୋଟି ଅଭିଯୋଗକୁ ବିଚାର କରି କାର୍ଯ୍ୟାନୁଷ୍ଠାନ ନେବେ ବୋଲି ଏସପି କହିଥିଲେ।
ଅଭିଯୋଗ ଅନୁଯାୟୀ, ବାରିପଦାର ହେମଚନ୍ଦ୍ରପୁର ସ୍ଥିତ ଏକ କଲ୍ୟାଣ ମଣ୍ଡପରେ ଖ୍ରୀଷ୍ଟ ଧର୍ମଗୁରୁଙ୍କ ବାଇବେଲ ପ୍ରଚାର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଯେଉଁଥିରେ ୩୦୦ରୁ ଉର୍ଦ୍ଧ୍ବ ଲୋକଙ୍କୁ ଅନ୍ଧବିଶ୍ୱାସ ଓ ପ୍ରଲୋଭନ ଦେଖାଇ ଧର୍ମାନ୍ତରୀକରଣ କାର୍ଯ୍ୟ ଜାରି ରଖି ହିନ୍ଦୁ ଧର୍ମକୁ ଅପମାନିତ କରି ଧର୍ମ ପରିବର୍ତ୍ତନ ପ୍ରଚେଷ୍ଟା କରାଯାଉଥିଲା। ଏନେଇ ବଜରଙ୍ଗ ଦଳ ପକ୍ଷରୁ ଭଞ୍ଜପୁର ଥାନାରେ ଅଭିଯୋଗ ହୋଇଥିଲା । ସେପଟେ ଏହି ଅଭିଯୋଗକୁ ଖଣ୍ଡନ କରି ଏହାର ପ୍ରତିଅଭିଯୋଗରେ ଅନ୍ୟ ଏକ ଅଭିଯୋଗ ମଧ୍ୟ ଖ୍ରୀଷ୍ଟ ଧର୍ମଵଲମ୍ବୀଙ୍କ ପକ୍ଷରୁ ହୋଇଥିଲା ।