କଟକ, ୦୧/୧୨ : ସହରର ଗଳିକନ୍ଦିଠୁ ଆରମ୍ଭ କରି ଥାନା ପାର୍ଶ୍ୱ ପର୍ଯ୍ୟନ୍ତ । କେବଳ ସେତିକି ନୁହେଁ, ଗଡ଼ଖାଇ ପାଶ୍ୱର୍ବର୍ତ୍ତୀ ଅଞ୍ଚଳ ବି ବାଦ୍ ପଡ଼ୁନି । ଯେଉଁଠି ଫାଙ୍କା ଜାଗା ଦେଖିଲେ ସେଠି ବାଡ଼ ବୁଲାଇଲେ । ତା’ପରେ ଗୋଟିଏ କି ଦୁଇଟି ନୁହେଁ, ଶହ ଶହ ବାଇକ୍ କାର୍ ରଖି ବେଆଇନ ଭାବେ ଟଙ୍କା ଆଦାୟ କରୁଛନ୍ତି । ବାଲିଯାତ୍ରା ପାଇଁ ଚଳିତ ବର୍ଷ ପଡ଼ିଆ ଆଖପାଖ ଅଞ୍ଚଳରେ ବେଆଇନ ପାର୍କିଂ କରାଯାଇ ଏଭଳି ଅର୍ଥ ଶୋଷଣ କରାଯାଉଛି । ସବୁଠୁ ବଡ଼ କଥା ହେଲା ଏହି ବେଆଇନ ପାର୍କିଂକୁ ପ୍ରଥମେ ସିଏମ୍ସି ଓ ପୁଲିସ ଆଗ ଚଢ଼ଉ କରି ଘଉଡ଼ାଇଦେଉଛି । ହେଲେ ପୁଣି କିଭଳି ଆଉ କେଉଁ ଆଧାରରେ ସେଠାରେ ବେଆଇନ ପାର୍କିଂ କରାଯାଉଛି ତାକୁ ନେଇ ଉଠିଛି ପ୍ରଶ୍ନ । ଏଥିଲାଗି କିଏ ଅନୁମତି ଦେଉଛି ତାକୁ ନେଇ ଚର୍ଚ୍ଚା । ଏମିତିକି ବିନା ଟେଣ୍ଡର୍ରେ କାହିଁକି ବେଆଇନ ପାର୍କିଂ ପାଇଁ ସିଏମ୍ସି ଟଙ୍କା ଆଦାୟ କରୁଛି ତାହା ଏବେ ଅଧିକାରୀଙ୍କ କାର୍ଯ୍ୟଦକ୍ଷତାରେ ଉପରେ ସନ୍ଦେହ ସୃଷ୍ଟି କରିଛି ।
କଟକ ବାଲିଯାତ୍ରା ପାଇଁ ମୁତୟନ ହେବେ ୭୦ ପ୍ଲାଟୁନ୍ ଫୋର୍ସ
ଚଳିତ ବର୍ଷ ବାଲିଯାତ୍ରା ପାଇଁ ୧୫ଟି ଷ୍ଟାଣ୍ଡ୍ କରାଯାଇଥିଲା । ଏଥିପାଇଁ ଅନ୍ଲାଇନ୍ ଟେଣ୍ଡର୍ ଡକାଯାଇଥିଲା । ଯାହାକୁ ନେଇ ଆରମ୍ଭରୁ ହିଁ କେଁ ପଶିଥିଲା । କାରଣ ଅନ୍ଲାଇନ୍ ଟେଣ୍ଡର୍ ମାଧ୍ୟମରେ ଟେଣ୍ଡର୍ ଫିକ୍ସିଂ କରିବାକୁ ଜୋରଦାର୍ ଉଦ୍ୟମ ହୋଇଥିଲା । ଏହା ସାଧାରଣରେ ଅସନ୍ତୋଷ ସୃଷ୍ଟି କରିବାରୁ ସିଏମ୍ସି ପରବର୍ତ୍ତୀ ସମୟରେ ସବୁ ପାର୍କିଂ ସ୍ଥାନକୁ ଖୋଲ ଟେଣ୍ଡର୍ କରିଥିଲା । ଏଥିରେ ଅନେକ କର୍ପୋରେଟରମାନେ ନିଜ ସମ୍ପର୍କୀୟଙ୍କୁ ପାର୍କିଂ ସ୍ଥାନ ଦେବାକୁ ଜୋର୍ ଉଦ୍ୟମ କରିଥିଲେ । କିନ୍ତୁ ସବୁଆଡୁ ବିଫଳ ହୋଇଥିଲେ । କିନ୍ତୁ ଆଶ୍ଚର୍ଯ୍ୟର କଥା ହେଉଛି ଯେ, ୧୫ଟି ଷ୍ଟାଣ୍ଡ୍ ଅନ୍ଲାଇନ୍ରେ ଯିବା ପରେ ମଧ୍ୟ ଯୋବ୍ରାରୁ ଆରମ୍ଭ କରି କ୍ୟାଣ୍ଟନମେଣ୍ଟ୍ ଥାନା ପର୍ଯ୍ୟନ୍ତ ମାଳ ମାଳ ବେଆଇନ ପାର୍କିଂ ଖୋଲିଛି । ଏମିତିକି ପାର୍କିଂ କରି ଲୋକଙ୍କଠୁ ମନ ଇଚ୍ଛା ଟଙ୍କା ଆଦାୟ କରାଯାଉଛି । ଏହିସବୁ ପ୍ରଶାସନର ଆଖି ଆଗରେ ହେଉଥିଲେ ମଧ୍ୟ ଏବେ ଲୋକଙ୍କ ସହ ଲୁଚକାଳି ଖେଳ ଖେଳୁଛନ୍ତି କର୍ତ୍ତୃପକ୍ଷ । କାରଣ ବେଆଇନ ପାର୍କିଂକୁ ଘଟଣା ଲୋକଲୋଚନକୁ ଆସିବା ପରେ ଏବେ ସିଏମ୍ସି ଓ ପୁଲିସ୍ ପକ୍ଷରୁ ମିଳିତ ଚଢ଼ଉ କରାଯାଇ ଗଡଖାଇ ଭିତରେ, କ୍ୟାଣ୍ଟନ୍ମେଣ୍ଟ ଥାନା ପାଖରେ, ସିଡିଏମ୍ଓ ଅଫିସ୍ ପାଖ ଓ କେବିକେ ସାମ୍ନାରେ ରସିଦ୍ ଜବତ କରାଯାଇଛି ।
ଏହାସହ ଦିନ ତମାମ୍ ଏନ୍ଫୋର୍ସମେଣ୍ଟ ଟିମ୍ ସମସ୍ତଙ୍କୁ ଘୋଡ଼ାଉଛି । କିନ୍ତୁ ଆଶ୍ଚର୍ଯ୍ୟର କଥା ହେଉଛି ଯେ, ଯାହାକୁ ଘଉଡ଼ାଯାଉଛି ସେ ଦିନକ ପରେ ପୁଣି ଖୋଲୁଛନ୍ତି । ସେମାନେ ପୁଣି ଟଙ୍କା ଦେଇ ଅନୁମତି ଆଣୁଥିବା ନେଇ କହୁଛନ୍ତି । ପ୍ରକୃତରେ ଏଥିରେ ସ୍ଥାନୀୟ କର୍ପୋରେଟରଙ୍କ ଠାରୁ ସ୍ଥାନୀୟ ପୁଲିସ୍ ପ୍ରଶାସନର ମଧ୍ୟ ସମ୍ପୃକ୍ତି ଥିବା ନେଇ ସାଧାରଣରେ ଚର୍ଚ୍ଚା ଜୋର୍ ଧରିଛି । କାରଣ ଏହାକୁ ନେଇ ଯଦି ଚଢ଼ଉ ହେଉଛି କାହିଁକି ଆଜି ପର୍ଯ୍ୟନ୍ତ କେହି ଗିରଫ ହୋଇନାହାନ୍ତି । ଲୋକଙ୍କ ଠାରୁ ଲୁଟ୍ ହେଉଥିଲେ ମଧ୍ୟ ସିଏମ୍ସି କର୍ତ୍ତୃପକ୍ଷ କାହା ଭୟରେ ଚୁପ୍ ବସିଛନ୍ତି ତାହା ଚିନ୍ତାର ବିଷୟ । ଏ ନେଇ ସିଏମ୍ସି ଅଧିକାରୀ କହିଛନ୍ତି ଯେ, ଆମେ ଯାଞ୍ଚ୍ କରୁଛୁ ବେଆଇନ ଷ୍ଟାଣ୍ଡ୍ ଉପରେ ନଜର ରହିଛି ।