ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଛି। ପାକିସ୍ତାନ ଜମ୍ମୁ ଓ ପଞ୍ଜାବର ଏକାଧିକ ସ୍ଥାନରେ ହମଲା ଆରମ୍ଭ କରିବା ପରେ ଭାରତର ଏୟାର ଡିଫେନ୍ସ ସିଷ୍ଟମ ପାକିସ୍ତାନର ଏକ ଏଫ-୧୬ ଯୁଦ୍ଧ ବିମାନକୁ ଖସାଇ ଦେଇଛି। ଏହା ସହ, ଉଧମପୁରରେ ଡ୍ରୋନ ହମଲାକୁ ମଧ୍ୟ ବିଫଳ କରାଯାଇଛି ଏବଂ ଅଖନୁରରେ ଏକ ଡ୍ରୋନ ଧ୍ୱଂସ କରାଯାଇଛି।
ଗୁରୁବାର ରାତିରେ ପାକିସ୍ତାନ ଜମ୍ମୁର ଏକାଧିକ ସ୍ଥାନ, ମୁଖ୍ୟତଃ ଜମ୍ମୁ ବିମାନବନ୍ଦର ଉପରେ ଏକକାଳୀନ ହମଲା ଆରମ୍ଭ କରିଥିଲା। ଆନ୍ତର୍ଜାତୀୟ ସୀମାରୁ ପାକିସ୍ତାନଠୁ ଜମ୍ମୁ ଆଡ଼କୁ ରକେଟ ନିକ୍ଷେପ କରାଯାଇଥିଲା। ଏକ ପାକିସ୍ତାନୀ ଡ୍ରୋନ ଜମ୍ମୁ ବିମାନବନ୍ଦର ଭିତରକୁ ଧସେଇ ପଶିବାକୁ ଚେଷ୍ଟା କରିଥିଲା। ଏହାର ଜବାବରେ ଭାରତ ତୁରନ୍ତ ଯୁଦ୍ଧ ବିମାନ ପଠାଇ ଏହାର ଉପଯୁକ୍ତ ଜବାବ ଦେଇଥିଲା।
ଭାରତ ତା’ର ଅତ୍ୟାଧୁନିକ ଏୟାର ଡିଫେନ୍ସ ସିଷ୍ଟମକୁ ସକ୍ରିୟ କରି ପାକିସ୍ତାନର ହମଲାକୁ ବିଫଳ କରିଛି। ଏସ-୪୦୦ ଏୟାର ଡିଫେନ୍ସ ସିଷ୍ଟମ ଜମ୍ମୁ ସିଭିଲ ଏୟାରପୋର୍ଟ, ସମ୍ବା, ଆରଏସ ପୁରା, ଅର୍ନିଆ ଓ ନିକଟବର୍ତ୍ତୀ ଅଞ୍ଚଳ ଉପରେ ଆସୁଥିବା ଆଠଟି ପାକିସ୍ତାନୀ ମିସାଇଲକୁ ଅଟକାଇଥିଲା। ଏହା ସହ, ଜମ୍ମୁ ବିଶ୍ୱବିଦ୍ୟାଳୟ ନିକଟରେ ଦୁଇଟି ପାକିସ୍ତାନୀ ଡ୍ରୋନ ମଧ୍ୟ ଧ୍ୱଂସ କରାଯାଇଛି। ଏହା ବ୍ୟତୀତ, ରାଜସ୍ଥାନର ଜୟସଲମେରରେ ମଧ୍ୟ ପାକିସ୍ତାନୀ ଡ୍ରୋନକୁ ଅଟକାଯାଇଥିବା ଜଣାପଡିଛି।
ଏହି ଘଟଣା ଭାରତର “ଅପରେସନ୍ ସିନ୍ଦୁର”ର ପରିଣାମ ବୋଲି କୁହାଯାଉଛି। ଯେଉଁଥିରେ ଭାରତ ମେ ୭ ତାରିଖରେ ପାକିସ୍ତାନ ଓ ପିଓକେରେ ଆତଙ୍କବାଦୀ ଶିବିର ଉପରେ ମିସାଇଲ ହମଲା କରିଥିଲା। ପହଲଗାମରେ ହୋଇଥିବା ଆତଙ୍କବାଦୀ ହମଲାର ପ୍ରତିଶୋଧ ସ୍ୱରୁପ ଏହି ଅପରେସନକୁ ବାରତୀୟ ସେନା ରୂପରେଖା ଦେଇଥିଲା। ପାକିସ୍ତାନ ଏହି ହମଲାକୁ “ଯୁଦ୍ଧର କାର୍ଯ୍ୟ” ବୋଲି ଅଭିହିତ କରି କଡ଼ା ଜବାବ ଦେବ ବୋଲି ଧମକ ଦେଇଥିଲା।
ଆମେରିକା, ବ୍ରିଟେନ, ରୁଷିଆ ଓ କତାର ଉଭୟ ଦେଶକୁ ଶାନ୍ତି ଓ ସଂଯମ ଅବଲମ୍ବନ କରିବାକୁ ଆହ୍ୱାନ ଜଣାଇଛନ୍ତି। ଉଭୟ ଦେଶରେ ବିମାନ ଚଳାଚଳ ବନ୍ଦ ରହିଛି। ପରମାଣୁ ଅସ୍ତ୍ର ସଜ୍ଜିତ ଏହି ଦୁଇ ପଡ଼ୋଶୀ ଦେଶ ମଧ୍ୟରେ ଯୁଦ୍ଧର ଆଶଙ୍କା ଘନେଇବାରେ ଲାଗିଛି।
ଏହି ଘଟଣା ଦୁଇ ଦେଶ ମଧ୍ୟରେ ଦୀର୍ଘ ଦିନର ଶତ୍ରୁତା ଓ କାଶ୍ମୀର ବିବାଦକୁ ଆହୁରି ଜଟିଳ କରିଛି। ସ୍ଥିତି ନିୟନ୍ତ୍ରଣ ପାଇଁ ଆନ୍ତର୍ଜାତୀୟ ସମୁଦାୟର ହସ୍ତକ୍ଷେପ ଏବଂ ଉଭୟ ପକ୍ଷର ସଂଯମ ଅତ୍ୟନ୍ତ ଜରୁରୀ ହୋଇପଡ଼ିଛି।
