ନୂଆଦିଲ୍ଲୀ: ଜମ୍ମୁ ନିକଟରେ ଡ୍ରୋନ ଆକ୍ରମଣ ଏବଂ ଅପରେସନ ସିନ୍ଦୁର ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହି ପରିପ୍ରେକ୍ଷୀରେ ଆମେରିକାର ସେକ୍ରେଟାରୀ ଅଫ୍ ଷ୍ଟେଟ୍ ମାର୍କୋ ରୁବିଓ ଭାରତର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ଏବଂ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ ସହ ଫୋନ୍ ଯୋଗେ କଥାବାର୍ତ୍ତା କରି ଉଭୟ ଦେଶକୁ ଉତ୍ତେଜନା ହ୍ରାସ କରିବାକୁ ଆହ୍ୱାନ ଦେଇଛନ୍ତି।
ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କର ମୃତ୍ୟୁ ଘଟିଥିଲା। ଏହାର ପ୍ରତିଶୋଧ ସ୍ୱରୂପ, ୭ ମଇରେ ଭାରତ ଅପରେସନ ସିନ୍ଦୁର ଜରିଆରେ ପାକିସ୍ତାନ ଏବଂ ପାକିସ୍ତାନ ଅଧିକୃତ କାଶ୍ମୀରରେ ୯ଟି ଆତଙ୍କବାଦୀ ଶିବିର ଉପରେ ସଠିକ ଆକ୍ରମଣ କରିଥିଲା। ଭାରତ ଦାବି କରିଛି ଯେ ଏହି ଆକ୍ରମଣ ଆତଙ୍କବାଦୀ ଭିତ୍ତିଭୂମିକୁ ଟାର୍ଗେଟ କରିଥିଲା ଏବଂ ପାକିସ୍ତାନୀ ସୈନ୍ୟ ସ୍ଥାନକୁ ଟାର୍ଗେଟ କରାଯାଇ ନଥିଲା।
ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଏହାକୁ "ଯୁଦ୍ଧର କାର୍ଯ୍ୟ" ବୋଲି ଅଭିହିତ କରି ପ୍ରତିଶୋଧ ନେବାକୁ ଧମକ ଦେଇଥିଲେ। ସେ ରୁବିଓଙ୍କ ସହ କଥାବାର୍ତ୍ତା ସମୟରେ ପହଲଗାମ ଆକ୍ରମଣରେ ପାକିସ୍ତାନର ସମ୍ପୃକ୍ତିକୁ ଅସ୍ୱୀକାର କରି ଏକ ନିରପେକ୍ଷ ତଦନ୍ତ ଦାବି କରିଛନ୍ତି। ଅନ୍ୟପକ୍ଷରେ, ଜୟଶଙ୍କର ରୁବିଓଙ୍କୁ ଆତଙ୍କବାଦ ବିରୋଧରେ ଭାରତର ଦୃଢ଼ ନିଷ୍ପତ୍ତି ବିଷୟରେ ଅବଗତ କରାଇ ଏହି ଆକ୍ରମଣର ମୂଳ କାରଣ ଏବଂ ପୃଷ୍ଠପୋଷକମାନଙ୍କୁ ନ୍ୟାୟ ପରିସରକୁ ଆଣିବା ଉପରେ ଜୋର ଦେଇଛନ୍ତି।
ଆମେରିକା ରାଜ୍ୟ ବିଭାଗର ମୁଖପାତ୍ର ଟାମି ବ୍ରୁସ କହିଛନ୍ତି ଯେ ୱାଶିଂଟନ ଜମ୍ମୁ-କାଶ୍ମୀର ସ୍ଥିତି ସମ୍ବନ୍ଧରେ ଉଭୟ ଦେଶ ସହ ଯୋଗାଯୋଗ ରଖିଛି ଏବଂ ଉତ୍ତେଜନା ବୃଦ୍ଧି ନ କରିବାକୁ ପରାମର୍ଶ ଦେଇଛି। ରୁବିଓ ପାହାଲଗାମ ଆକ୍ରମଣରେ ଜୀବନ ହାନି ପାଇଁ ଦୁଃଖ ପ୍ରକାଶ କରି ଭାରତ ସହ ଆତଙ୍କବାଦ ବିରୋଧରେ ସହଯୋଗ ଜାରି ରଖିବାକୁ ପ୍ରତିଶ୍ରୁତି ଦେଇଛନ୍ତି। ସେ ପାକିସ୍ତାନକୁ ତଦନ୍ତରେ ସହଯୋଗ କରିବାକୁ ଏବଂ ଉତ୍ତେଜନା ହ୍ରାସ କରିବାକୁ ଅନୁରୋଧ କରିଛନ୍ତି।
ଏହି ଘଟଣା ପରେ ଭାରତ ପାକିସ୍ତାନୀ ବିମାନ ପାଇଁ ନିଜ ବାୟୁସୀମା ବନ୍ଦ କରିଦେଇଛି। ଯାହା ୩୦ ଏପ୍ରିଲରୁ ୨୩ ମଇ ପର୍ଯ୍ୟନ୍ତ ବଳବତ୍ତର ରହିବ। ନିୟନ୍ତ୍ରଣ ରେଖାରେ ପାକିସ୍ତାନ ପକ୍ଷରୁ ଗୁଳିଚାଳନା ଏବଂ ଡ୍ରୋନ ଆକ୍ରମଣ ମଧ୍ୟ ଜାରି ରଖିଛି। ଯାହାକୁ ଭାରତୀୟ ସେନା ନାକଚ କରିଥିବା ଦାବି କରାଯାଇଛି। ପାକିସ୍ତାନ ମଧ୍ୟ ଭାରତୀୟ ଡ୍ରୋନ ଏବଂ ଯୁଦ୍ଧ ବିମାନ ନଷ୍ଟ କରିଥିବା ଦାବି କରିଛି, ତେବେ ଏହି ଦାବିକୁ ଭାରତ ଅସ୍ୱୀକାର କରିବା ସହ ଏହା ପାକିସ୍ତାନର ଚାଲ ବୋଲି ଘୋଷଣା କରିଛି।
ଏହି ସମୟରେ ଲାହୋର ନିକଟରେ ଡ୍ରୋନ ବିସ୍ଫୋରଣର ଖବର ପ୍ରକାଶ ପାଇଛି। ଯାହା ଯୋଗୁଁ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି। ଆମେରିକାର ଲାହୋର କନସୁଲେଟ ସମସ୍ତ କର୍ମଚାରୀଙ୍କୁ ନିରାପଦ ସ୍ଥାନରେ ରହିବାକୁ ନିର୍ଦ୍ଦେଶ ଦେଇଛି। ଭାରତୀୟ ସେନା ଲାହୋରର ବାୟୁ ପ୍ରତିରକ୍ଷା ବ୍ୟବସ୍ଥାକୁ ନିଷ୍କ୍ରିୟ କରିଥିବା ଦାବି କରିଛି। ତେବେ ରକ୍ତ ଚାଉଳ ଚୋବାଉଥିବା ପାକିସ୍ତାନ ଏହାକୁ "ନଗଣ୍ୟ" କ୍ଷତି ବୋଲି କହିଛି।
ଭାରତୀୟ ବିଦେଶ ସଚିବ ବିକ୍ରମ ମିଶ୍ରୀ କହିଛନ୍ତି ଯେ ପାକିସ୍ତାନର ଗୁଳିଚାଳନାରେ ୧୬ ନାଗରିକଙ୍କ ମୃତ୍ୟୁ ହୋଇଛି, ଯେଉଁଥିରେ ତିନି ମହିଳା ଏବଂ ପାଞ୍ଚ ଶିଶୁ ରହିଛନ୍ତି। ଭାରତୀୟ ସେନା ଏହାର ପ୍ରତିକ୍ରିୟାରେ ମୋର୍ଟାର ଏବଂ ଆର୍ଟିଲେରୀ ଗୁଳିଚାଳନାକୁ ରୋକିବା ପାଇଁ ପାକିସ୍ତାନ ବିରକ୍ଷରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ଅନ୍ତର୍ଜାତୀୟ ସ୍ତରରେ ଇରାନ ଏବଂ ସାଉଦି ଆରବ ଭଳି ଦେଶ ଏହି ମାମଲାରେ ଉଭୟ ଦେଶ ମଧ୍ୟରେ ମଧ୍ୟସ୍ଥତା କରିବାକୁ ପ୍ରସ୍ତାବ ଦେଇଛନ୍ତି। ବ୍ରିଟିଶ ସଂସଦରେ ମଧ୍ୟ ଏହି ଉତ୍ତେଜନାକୁ ହ୍ରାସ କରିବା ପାଇଁ ଆଲୋଚନା ହୋଇଛି। ଭାରତ ଏବଂ ପାକିସ୍ତାନ ଉଭୟ ସମ୍ପୂର୍ଣ୍ଣ ଯୁଦ୍ଧ ଏଡ଼ାଇବାକୁ ଚେଷ୍ଟା କରୁଛନ୍ତି। କିନ୍ତୁ ସୀମାରେ ଜାରି ରହିଥିବା ଗୁଳିଚାଳନା ଏବଂ ଡ୍ରୋନ ଆକ୍ରମଣ ସ୍ଥିତିକୁ ଜଟିଳ କରିଛି।
