ମୁମ୍ୱାଇ, ୨୮।୪: ଝିଅଟିଏ ଜନ୍ମ ହେଉ ହେଉ ଘରକୁ ନ ନେଇ ରେଳଷ୍ଟେସନର ଡଷ୍ଟବିନ୍ରେ ଫୋଫାଡ଼ି ଦେଇଆସିଥିଲେ । ଆଉ ଆଜି ସେ ଝିଅ MPSC ପରୀକ୍ଷାରେ ହୋଇଛନ୍ତି ଉତ୍ତୀର୍ଣ୍ଣ । କଲେକ୍ଟର ଅଫିସରେ ପାଇଛନ୍ତି ସରକାରୀ ଚାକିରି । ସେହି ସଫଳ ଝିଅ ହେଉଛନ୍ତି ମାଲା ପାପଲକର । କ’ଣ ତାଙ୍କ କାହାଣୀ, କେମିତି ପାଇଲେ ଏତେ ବଡ଼ ସଫଳତା । ଆସନ୍ତୁ ଜାଣିବା । ପ୍ରାୟ ଅଢ଼େଇ ଦଶନ୍ଧି ପୂର୍ବର ଘଟଣା । ମହାରାଷ୍ଟ୍ରର ଜଳଗାଓଁ ରେଳ ଷ୍ଟେସନରେ ଗୋଟିଏ ନବଜାତ ଶିଶୁଟିଏ କାନ୍ଦୁଥିବାର ଲୋକ ଦେଖିବାକୁ ପାଇଲେ । କେହି ଶିଶୁକନ୍ୟାଟିକୁ ଫୋଫାଡ଼ିଦେଇ ଚାଲିଯାଇଥିଲେ ପରିବାର । ଏନେଇ ତୁରନ୍ତ ପୋଲିସକୁ ଖବର ଦେଇଥିଲେ । ପୋଲିସ ଦୃଷ୍ଟିହୀନ ଝିଅଟିକୁ ନିଜ ହେପାଜତକୁ ନେଇ ଶିଶୁଟିର ବାପାମାଆଙ୍କୁ ବହୁତ ଖୋଜାଖୋଜି କରିଥିଲା କିନ୍ତୁ ସଫଳ ହୋଇନଥିଲା । ପରେ ଶିଶୁକନ୍ୟାଟିକୁ ଜଳଗାଁଓର ଏକ ରିମାଣ୍ଡ ହୋମକୁ ଅଣାଗଲା । ପରେ ମାଲାଙ୍କୁ ୨୭୦ କିଲୋମିଟର ଦୂର ଅମରାବତୀର ପାରତୱାଡ଼ାରେ ବଧିର ଏବଂ ଦୃଷ୍ଟିହୀନଙ୍କ ପାଇଁ ଉନ୍ନତ ସୁବିଧା ସହିତ ଏକ ପୁନର୍ବାସ ଗୃହକୁ ପଠାଗଲା । ଯେଉଁଠାରୁ ଆରମ୍ଭ ହୋଇଥିଲା ତାଙ୍କର ପ୍ରକୃତ ଯାତ୍ରା । ସେଠାରେ ତାଙ୍କ ନାମ ରଖାଗଲା ମାଲା ପାପଲକର ।
ଜନ୍ମ ଦେଇଥିବା ବାପା-ମାଆ ସିନା ଫୋପାଡ଼ିଦେଲେ, ହେଲେ ମାଲାଙ୍କୁ ଆଦୋରି ନେଇଥିଲେ ଦୁଇ ଦମ୍ପତ୍ତି । ଯିଏ ମାଆ-ବାପାର ସ୍ନେହ ଦେଲେ । ପରେ ସେ ଦ୍ରୋଣାଚାର୍ଯ୍ୟ ଭଳି ଗୁରୁ ମଧ୍ୟ ପାଇଲେ, ବାପା-ମାଆ-ଗୁରୁ ଝିଅଟିକୁ କଠୋର ଦୁନିଆ ସହ ଲଢ଼ିବାକୁ ସକ୍ଷମ କଲେ । ମାଲାଙ୍କ ଗୁରୁ ପଦ୍ମ ପୁରସ୍କାର ବିଜେତା, ୮୧ ବର୍ଷୀୟ ଶଙ୍କରବାବା ପାପଲକର । ଯିଏ ମାଲାଙ୍କୁ ତାଙ୍କର ଉପନାମ ଦେଇଥିଲେ । ସେ ତାଙ୍କୁ ବ୍ରେଲିରେ ଶିକ୍ଷା ଦେଇଥିଲେ । ଦୃଷ୍ଟିହୀନ ହୋଇ ମଧ୍ୟ ଆତ୍ମନିର୍ଭଶୀଳ ହେବା ଶିଖାଇଥିଲେ । ଅମରାବତୀର ୟୁନିକ ଏକାଡେମୀର ନିର୍ଦ୍ଦେଶକ ପ୍ରଫେସର ଅମୋଲ ପାଟିଲ । ଯିଏ ମାଲାଙ୍କୁ MPSC ପରୀକ୍ଷା ପାଇଁ ମାଲାଙ୍କୁ ପ୍ରଶିକ୍ଷଣ ଦେବାର ଦାୟିତ୍ୱ ନେଇଥିଲେ । ଆଉ ମାଲା ଏଥିରେ ସଫଳ ହେବେ ବୋଲି ତାଙ୍କ ଦୃଢ଼ ବିଶ୍ୱାସ ଥିଲା । ଶେଷରେ ତାହା ହିଁ ହେଲା ।
ମାଲା ମହାରାଷ୍ଟ୍ର ପବ୍ଲିକ ସର୍ଭିସ କମିଶନ (MPSC) ଦ୍ୱାରା ପରିଚାଳିତ ପରୀକ୍ଷାରେ ଉତ୍ତୀର୍ଣ୍ଣ ହୋଇ କଲେକ୍ଟର ଅଫିସରେ ସରକାରୀ ଚାକିରି ପାଇଛନ୍ତି । ଏବେ ସେ ନାଗପୁର କଲେକ୍ଟର ଅଫିସରେ ତାଙ୍କର ପ୍ରଥମ ପୋଷ୍ଟିଂ ନେବାକୁ ଯାଉଛନ୍ତି । ମାଲା ପାପଲକର ଗତ ବର୍ଷ ମେ ମାସରେ ମହାରାଷ୍ଟ୍ର ପବ୍ଲିକ ସର୍ଭିସ କମିଶନ (MPSC)ର କ୍ଲର୍କ-କମ୍-ଟାଇପିଷ୍ଟ ପରୀକ୍ଷା (ଗ୍ରୁପ-C) ଉତ୍ତୀର୍ଣ୍ଣ ହୋଇ ଖବର ଶିରୋନାମାରେ ସ୍ଥାନ ପାଇଥିଲେ । ୨୬ ବର୍ଷୀୟା ମାଲାଙ୍କୁ ନାଗପୁର କଲେକ୍ଟରେଟରେ ରାଜସ୍ବ ସହାୟକ ଭାବେ ନିଯୁକ୍ତି ପତ୍ର ମିଳିଛି । ଯଦି ସେଦିନ ମାଲାଙ୍କ ବାପା ମାଆ ଝିଅଟିକୁ ଡଷ୍ଟବିନ୍ରେ ନଫୋଫାଡ଼ି ଆଦରି ନେଇଥାନ୍ତେ । ଆଜି ବୋଧହୁଏ ଉଭୟେ ନିଜ ଝିଅ ପାଇଁ ଗର୍ବ ଅନୁଭବ କରୁଥାନ୍ତେ ।
