ନୂଆଦିଲ୍ଲୀ: ପାକିସ୍ତାନରୁ ଏବେ ଏକ ବଡ଼ ଖବର ଆସୁଛି। ବାଲୁଚ୍ ଲିବରେସନ୍ ଆର୍ମି (BLA) ଏକ ଟ୍ରେନ୍ ଅପହରଣ କରିଛି । ଟ୍ରେନରେ ପାଖାପାଖି ୫ଶହରୁ ଅଧିକ ଯାତ୍ରୀ ଥିଲେ। ପାକିସ୍ତାନ ସେନାର କାର୍ଯ୍ୟାନୁଷ୍ଠାନର ପ୍ରତିବାଦରେ ବାଲୁଚ୍ ଲିବରେସନ ଆର୍ମି ଜାଫର ଏକ୍ସପ୍ରେସକୁ ଅପହରଣ କରିଛି।

ଆତଙ୍କବାଦୀ ମାନେ ରେଳ ଟ୍ରାକରେ ବିସ୍ଫୋରଣ କରି ଟ୍ରେନ୍‌କୁ ହାଇଜାକ୍ କରିଛନ୍ତି। ବନ୍ଧକଙ୍କ ମଧ୍ୟରେ ଅନେକ ପାକିସ୍ତାନୀ ସେନା ଅଧିକାରୀ ମଧ୍ୟ ସାମିଲ୍ ଅଛନ୍ତି। ସମସ୍ତ ଯାତ୍ରୀ ମାନଙ୍କୁ ବନ୍ଧକ ରଖାଯାଇଛି। ତେବେ ଆତଙ୍କବାଦୀ (BLA) ଏବଂ ପାକିସ୍ତାନୀ ସେନା ମଧ୍ୟରେ ହୋଇଥିବା ଏନକାଉଣ୍ଟରରେ ୬ ରୁ ଅଧିକ ପାକିସ୍ତାନୀ ସୈନିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।

କଚ୍ଛ (ବୋଲନ) ଜିଲ୍ଲାର ପିରୋକାନାରୀ ଅଞ୍ଚଳରେ ଏହି ଟ୍ରେନ୍ ଅପହରଣ ଘଟଣା ଘଟିଛି। ବର୍ତ୍ତମାନ ଟ୍ରେନ୍‌ଟି ଏକ ସୁଡ଼ଙ୍ଗ ଭିତରେ ଠିଆ ହୋଇଛି। ପ୍ରାଥମିକ ସୂଚନା ଅନୁଯାୟୀ, ଏହି ଯାତ୍ରୀବାହୀ ଟ୍ରେନ୍ ଟି କ୍ୱେଟାରୁ ପେଶାୱର ଅଭିମୂଖେ ଯାଉଥିଲା। ଏହି ସମୟରେ ପ୍ରଥମେ ରେଳ ଟ୍ରାକରେ ବିସ୍ଫୋରଣର ଶବ୍ଦ ଶୁଣାଗଲା ଏବଂ ତା'ପରେ ଟ୍ରେନ ଉପରେ ଗୁଳିମାଡ ଆରମ୍ଭ ହୋଇଗଲା। ଏହା ପରେ, ଟ୍ରେନରେ ଉପସ୍ଥିତ ସୁରକ୍ଷା କର୍ମୀ ଏବଂ ଆତଙ୍କବାଦୀଙ୍କ ମଧ୍ୟରେ ଏନକାଉଣ୍ଟର ଆରମ୍ଭ ହୋଇଥିଲା।

ରେଳବାଇ ଅଧିକାରୀ ମାନେ କହିଛନ୍ତି ଯେ ଜାଫର ଏକ୍ସପ୍ରେସରେ ୯ଟି କୋଚ୍ ଅଛି। ଟ୍ରେନରେ ପାଖାପାଖି ୫ଶହରୁ ଅଧିକ ଯାତ୍ରୀ ଅଛନ୍ତି। ଆଜି ସକାଳ ୯ଟାରେ ଟ୍ରେନଟି କ୍ୱେଟାରୁ ଛାଡିଥିଲା। ଘଟଣାସ୍ଥଳକୁ ଆମ୍ବୁଲାନ୍ସ ପଠାଯାଇଛି। ସିବି ହସ୍ପିଟାଲରେ ମଧ୍ୟ ଜରୁରୀକାଳୀନ ପରିସ୍ଥିତି ଜାରି କରାଯାଇଛି।