ନୂଆଦିଲ୍ଲୀ ୨୨/୦୪: ବୈଜ୍ଞାନିକମାନେ ଆମ ଆକାଶଗଙ୍ଗା ମିଲ୍କି ୱେରେ ଏକ ନିଃସଙ୍ଗ ବ୍ଲାକ୍ହୋଲ ଆବିଷ୍କାର କରିଛନ୍ତି । କୌଣସି ନକ୍ଷତ୍ର ଏହି ବ୍ଲାକ୍ହୋଲକୁ ପରିକ୍ରମା କରୁନାହିଁ । ଅଧ୍ୟୟନର ତଥ୍ୟ ଆଷ୍ଟ୍ରୋଫିଜିକାଲ ପତ୍ରିକାରେ ପ୍ରକାଶ ପାଇଛି । ଅନେକ ବର୍ଷ ପୂର୍ବେ ଗବେଷକ ଟିମ୍ ଆବିଷ୍କାର କରିଥିବା ଏହି ତାରକୀୟ ବସ୍ତୁର ପରିଚୟକୁ ସଦ୍ୟ ଅଧ୍ୟୟନ ଲୋକଲୋଚନକୁ ଆଣିଛି ।
୨୦୨୨ ମସିହାରେ ବାଲ୍ଟିମୋର୍ ସ୍ଥିତ ସ୍ପେସ୍ ଟେଲିସ୍କୋପ୍ ସାଇନ୍ସ ଇନ୍ଷ୍ଟିଚ୍ୟୁଟ୍ର ନକ୍ଷତ୍ରବିଜ୍ଞାନୀ କୈଳାସ ସାହୁ ଓ ତାଙ୍କ ସାଥୀମାନେ ସାଗିଟାରିଅସ୍ ନକ୍ଷତ୍ରମଣ୍ଡଳରେ ଘୂରୁଥିବା ଏକ ଅନ୍ଧାରୁଆ ବସ୍ତୁ ଆବିଷ୍କାର କରିଥିଲେ । କିନ୍ତୁ ସେତେବେଳେ ସେମାନଙ୍କ ଅଧ୍ୟୟନକୁ ନେଇ ବିବାଦ ଉପୁଜିଲା । କାରଣ କିଛି ବୈଜ୍ଞାନିକ ଦାବି କଲେ ଯେ ଏହି ପିଣ୍ଡ ବାସ୍ତବରେ ଏକ ନ୍ୟୁଟ୍ରନ୍ ନକ୍ଷତ୍ର ।
ତେବେ ବୈଜ୍ଞାନିକମାନେ ଏହା ଉପରେ ଅଧ୍ୟୟନ ଜାରି ରଖିଲେ ଏବଂ ଆରମ୍ଭରୁ ସେମାନେ ଯାହା ଦାବି କରିଥିଲେ ଯେ ଏହା ଏକ ନିଃସଙ୍ଗ ବ୍ଲାକ୍ହୋଲ, ତା’ରି ଆଧାରରେ ଅଧିକ ପ୍ରମାଣ ପାଇଲେ । ସେମାନଙ୍କର ପ୍ରାରମ୍ଭିକ ପ୍ରୟାସ ପାଇଁ ୨୦୧୧ରୁ ୨୦୧୭ ମସିହା ମଧ୍ୟରେ ତଥ୍ୟ ଉପରେ ନଜର ପକାଇବା ପରେ ଅଧିକ ପ୍ରମାଣ ଯୋଗାଡ଼ କରିବାକୁ ଗବେଷକମାନେ ୨୦୨୧ ଓ ୨୦୨୨ ମସିହା ମଧ୍ୟରେ ହବଲ୍ ସ୍ପେସ୍ ଟେଲିସ୍କୋପ୍ ଓ ଗାଇଆ ସ୍ପେସ୍ ପ୍ରୋବ୍ର ତଥ୍ୟକୁ ଅବଲୋକନ କଲେ ।
ଉଲ୍ଲେଖଯୋଗ୍ୟ, ସଦ୍ୟ ଅଧ୍ୟୟନ ପୂର୍ବରୁ ଆଜି ପର୍ଯ୍ୟନ୍ତ ଆବିଷ୍କୃତ ସମସ୍ତ ବ୍ଲାକ୍ହୋଲକୁ ଏକ ସାଥୀ ନକ୍ଷତ୍ର ସହିତ ଚିହ୍ନଟ କରାଯାଇଛି । ବ୍ଲାକ୍ହୋଲ୍ ସମସ୍ତ ଆଲୋକ ଅବଶୋଷଣ କରିଥାନ୍ତି, ତେଣୁ ଯଦି ମାଧ୍ୟାକର୍ଷଣ ଲେନ୍ସିଂ ପ୍ରଭାବ ଯୋଗୁ ସାଥୀର ଉପସ୍ଥିତି ନ ଥାଏ, ଏଗୁଡ଼ିକୁ ଚିହ୍ନଟ କରିବା କଷ୍ଟକର । ତଥାପି ବୈଜ୍ଞାନିକ ସାହୁ ଓ ତାଙ୍କ ଟିମ୍ ଏହି ନିଃସଙ୍ଗ ବ୍ଲାକ୍ହୋଲକୁ ଚିହ୍ନଟ କଲେ । ଦୂରରେ ସ୍ଥିତ ଏକ ନକ୍ଷତ୍ର ସାମ୍ନାରୁ ଅତିକ୍ରମ କରିବା ସମୟରେ ଏହାକୁ ସେମାନେ ଚିହ୍ନଟ କଲେ, କାରଣ ଏହା ଦ୍ୱାରା ବ୍ଲାକ୍ହୋଲର ଆଲୋକ ବଢ଼ିଥିଲା ଏବଂ କ୍ଷଣିକ ପାଇଁ ଏହା ଆକାଶରେ ନିଜର ସ୍ଥିତିକୁ ବଦଳାଇଥିଲା । ସେମାନେ ଜାଣିବାକୁ ପାଇଲେ ଯେ ଏହି ପିଣ୍ଡ ଆମ ସୂର୍ଯ୍ୟଠୁ ହାରାହାରି ୭ ଗୁଣ ବିଶାଳ, ଯାହା ଏକ ନ୍ୟୁଟ୍ରନ୍ ନକ୍ଷତ୍ର ନୁହେଁ ବୋଲି ଦର୍ଶାଉଥିଲା ।
ଏହି ନିଃସଙ୍ଗ ବ୍ଲାକ୍ହୋଲ ପୃଥିବୀଠୁ ୫ ହଜାର ଆଲୋକ ବର୍ଷ ଦୂରରେ ଅବସ୍ଥିତ । ୨୭ ହଜାର ଆଲୋକ ବର୍ଷ ଦୂର, ମିଲ୍କି ୱେର କେନ୍ଦ୍ରରେ ଅବସ୍ଥିତ ସୁପର୍ମାସିଭ୍ ବ୍ଲାକ୍ହୋଲ ‘ସାଗିଟାରିଅସ୍ ଏ’ର ଏହା ଖୁବ୍ ନିକଟରେ ଅବସ୍ଥିତ । ସଦ୍ୟ ତଥ୍ୟ ଆଧାରରେ ସାହୁ ଓ ତାଙ୍କ ଟିମ୍ ୨୦୨୭ରେ ଲଞ୍ଚ୍ ହେବାକୁ ଥିବା ନାନ୍ସି ଗ୍ରେସ୍ ରୋମାନ୍ ସ୍ପେସ୍ ଟେଲିସ୍କୋପ୍ ମାଧ୍ୟମରେ ଏହି ଘଟଣାର ଅଧିକ ଉଦାହରଣ ଖୋଜିବାକୁ ଆଶା ରଖିଛନ୍ତି ।
