ନୂଆଦିଲ୍ଲୀ: ବେଙ୍ଗାଲୁରୁରେ କୁକୁର ପ୍ରଜନନକାରୀ (ଡଗ୍ ବ୍ରିଡର) ସତୀଶ୍ଙ୍କ ଘରେ ଚଢାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ବିଦେଶୀ ମୁଦ୍ରା ପରିଚାଳନା ଆଇନ (FEMA) ଉଲ୍ଲଂଘନ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଟିମ୍ ଏହି ଚଢାଉ କରିଛି । ଏହି ସମୟରେ ସତୀଶ ନାମକ ଏହି ବ୍ୟକ୍ତି ଜଣକ ଦାବି କରିଛନ୍ତି ଯେ, ସେ ୫୦ କୋଟି ଟଙ୍କାରେ ବିଶ୍ୱର ସବୁଠାରୁ ମହଙ୍ଗା କୁକୁର କିଣିଛନ୍ତି।
ଏହି ମାମଲାରେ, ଇଡି ତଦନ୍ତ କରୁଛି ଯେ, ଯଦି କୁକୁର କିଣିବା ପାଇଁ ୫୦ କୋଟି ଟଙ୍କା ଦିଆଯାଇଥିଲା, ତେବେ ତାହା କିପରି ଦିଆଯାଇଥିଲା। ଯେତେବେଳେ ସତୀଶଙ୍କ ଆକାଉଣ୍ଟର ବିବରଣୀ ଯାଞ୍ଚ କରାଗଲାସ ସେଥିରୁ ଜଣାପଡିଲା ଯେ, ଆକାଉଣ୍ଟରୁ କୌଣସି କାରବାର ହୋଇନାହିଁ। ଏପରି ପରିସ୍ଥିତିରେ, ଇଡି ସନ୍ଦେହ କରୁଛି ଯେ, ଏଥିପାଇଁ ହାୱାଲା ରୁଟ୍ ବ୍ୟବହାର କରାଯାଇଥିଲା କି ନାହିଁ ।
ଯେତେବେଳେ ଇଡି ଟିମ୍ ତଦନ୍ତ ପାଇଁ ତାଙ୍କ ବେଙ୍ଗାଲୁରୁ ସ୍ଥିତ ବାସଭବନରେ ଚଢ଼ାଉ କରିଥିଲା, ସେତେବେଳେ ଜଣାପଡ଼ିଥିଲା ଯେ ସତୀଶ ତଦନ୍ତକାରୀ ଦଳକୁ ଭ୍ରମିତ କରିବାକୁ ଚେଷ୍ଟା କରୁଥିଲେ। ଯେତେବେଳେ ED ଟିମ୍ ସତୀଶଙ୍କୁ ମୁହାଁମୁହିଁ ପଚରାଉଚରା କଲା, କାହାଣୀ ଅନ୍ୟ କିଛି ଥିଲା। ତଦନ୍ତରେ ସତୀଶଙ୍କ ଦାବି ମିଥ୍ୟା ପ୍ରମାଣିତ ହୋଇଥିଲା। ପ୍ରକୃତରେ, ପ୍ରାରମ୍ଭିକ ତଦନ୍ତରେ, ଯେଉଁ କୁକୁରକୁ ବିଦେଶୀ ପ୍ରଜାତିର ବୋଲି ଦାବି କରାଯାଇଥିଲା, ତାହା ମଧ୍ୟ ଭାରତୀୟ ବୋଲି ଜଣାପଡ଼ିଛି। ଏହି ମାମଲା ସମ୍ପର୍କରେ ଇଡି ତଦନ୍ତ ଜାରି ରଖିଛି ।
ତାଙ୍କ କୁକୁର ବିଷୟରେ ଏକ ଜାତୀୟ ଗଣମାଧ୍ୟମ ସହିତ କଥାବାର୍ତ୍ତା ସମୟରେ ସତୀଶ କହିଥିଲେ ଯେ, ଏହା ଏକ ଅତ୍ୟନ୍ତ ବିରଳ ପ୍ରଜାତିର କୁକୁର ଯାହା ଅବିକଳ ଗଧିଆ ପରି ଦେଖାଯାଏ। ଏହି ପ୍ରଜାତିର ଏକ କୁକୁର ପ୍ରଥମ ଥର ପାଇଁ ବିକ୍ରି ହୋଇଛି। ସତୀଶ କହିଥିଲେ ଯେ କୁକୁରଟି ଆମେରିକାରେ ପାଳିତ ହୋଇଥିଲା ଏବଂ ଏହା ଅସାଧାରଣ। ମୁଁ କୁକୁର ପ୍ରେମୀ ହୋଇଥିବାରୁ ଏହି କୁକୁର ଛୁଆ କିଣିବା ପାଇଁ ୫୦ କୋଟି ଟଙ୍କା ଖର୍ଚ୍ଚ କରିଛି। ମୁଁ ଏପରି ସ୍ବତନ୍ତ୍ର କୁକୁର ମାନଙ୍କୁ ପ୍ରଜନନ କରି ଭାରତରେ ଆଣିବାକୁ ଚାହୁଁଛି।
