ନୂଆଦିଲ୍ଲୀ: ଝାଡ଼ଖଣ୍ଡ ଶିକ୍ଷା ମନ୍ତ୍ରୀ ତଥା JMM ବିଧାୟକ ରାମଦାସ ସୋରେନଙ୍କ ଶୁକ୍ରବାର ମୃତ୍ୟୁ ଘଟିଛି। ଦିଲ୍ଲୀର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଥିବା ବେଳେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କ ପୁଅ ସୋସିଆଲ ମିଡିଆରେ ମୃତ୍ୟୁ ଖବର ନିଶ୍ଚିତ କରିଛନ୍ତି । ଘାଟସିଲାରୁ ନିର୍ବାଚିତ ବିଧାୟକ ରାମଦାସ ସୋରେନ ଝାଡ଼ଖଣ୍ଡ ସରକାରରେ ମନ୍ତ୍ରୀ ଭାବରେ ୩୦ ଅଗଷ୍ଟ ୨୦୨୪ ରେ ଶପଥ ନେଇଥିଲେ। ସେ ଘାଟସିଲାରୁ ଦୁଇଥର ବିଧାୟକ ନିର୍ବାଚିତ ହୋଇଥିଲେ।

ବୋକାରୋ ଆସନରୁ କଂଗ୍ରେସ ବିଧାୟକ ଶ୍ୱେତା ସିଂହ କହିଛନ୍ତି, "ଝାଡ଼ଖଣ୍ଡ ଶିକ୍ଷା ମନ୍ତ୍ରୀ ଶ୍ରୀ ରାମଦାସ ସୋରେନ ଜୀଙ୍କ ମୃତ୍ୟୁ ଖବର ଶୁଣି ମୁଁ ମର୍ମାହତ। ଏହା କେବଳ ଝାଡ଼ଖଣ୍ଡ ରାଜନୀତି ପାଇଁ ନୁହେଁ ବରଂ ସମଗ୍ର ରାଜ୍ୟ ପାଇଁ ଏକ ଅପୂରଣୀୟ କ୍ଷତି। ତାଙ୍କର ସରଳ ବ୍ୟକ୍ତିତ୍ୱ, ଜନସେବା ପ୍ରତି ସମର୍ପଣ ଏବଂ ଶିକ୍ଷା କ୍ଷେତ୍ରରେ ତାଙ୍କର ଅବଦାନ ସର୍ବଦା ମନେ ରହିବ। ଈଶ୍ୱର ସ୍ୱର୍ଗତ ଆତ୍ମାକୁ ଶାନ୍ତି ଦିଅନ୍ତୁ ଏବଂ ଏହି ଦୁଃଖର ମୁହୂର୍ତ୍ତରେ ଶୋକସନ୍ତପ୍ତ ପରିବାରକୁ ଶକ୍ତି ଦିଅନ୍ତୁ। ଓମ୍ ଶାନ୍ତି।" 

ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ କହିଛନ୍ତି, "ଝାଡ଼ଖଣ୍ଡର ସ୍କୁଲ ଶିକ୍ଷା ମନ୍ତ୍ରୀ ଶ୍ରୀ ରାମଦାସ ସୋରେନ ଜୀଙ୍କ ଦେହାନ୍ତର ଦୁଃଖଦ ଖବର ପାଇଲି। ବାବା ବୈଦ୍ୟନାଥ ତାଙ୍କ ଆତ୍ମାକୁ ଶାନ୍ତି ଏବଂ ତାଙ୍କ ପରିବାରକୁ ଏହି ବିଶାଳ ଦୁଃଖ ସହ୍ୟ କରିବାକୁ ଶକ୍ତି ଦିଅନ୍ତୁ। ଓମ ଶାନ୍ତି।"