ଲକ୍ଷ୍ନୌ,୧୨/୦୨: ମାଟ୍ରିମୋନିଆଲ୍ ସାଇଟ୍ ଜରିଆରେ ହେଉଥିବା ବିବାହରେ ଅନେକ ସମୟରେ ମିଛ କଥା କହି ଲୋକଙ୍କୁ ଠକାଯାଉଥିବା ସାମ୍ନାକୁ ଆସିଥାଏ । ତେବେ ୟୁପିର ଜଣେ ମହିଳା ଡିଏସ୍ପି ଏଭଳି ଠକେଇର ଶିକାର ହୋଇଛନ୍ତି । ନିଜକୁ ଆଇଆରଏସ୍ ଅଧିକାରୀ ଭାବେ ଦର୍ଶାଇ ଜଣେ ବ୍ୟକ୍ତି ତାଙ୍କୁ ବିବାହ କରିବା ସହ ଲକ୍ଷାଧିକ ଟଙ୍କା ଠକିନେବାର ମାମଲା ସାମ୍ନାକୁ ଆସିଛି । ଏ ସଂପର୍କରେ ଜାଣିବା ପରେ ମହିଳା ଡିଏସ୍ପି ଠକଙ୍କ ଠାରୁ ଛାଡପତ୍ର ନେଇସାରିଛନ୍ତି । କିନ୍ତୁ ସେ ନିଜ ପତ୍ନୀଙ୍କ ନାମରେ ଠକେଇ ଜାରି ରଖିଥିବା ଜଣାପଡିବାରୁ ବାଧ୍ୟହୋଇ ଗାଜିଆବାଦର କୌଶାମ୍ବୀ ଥାନାରେ ପୂର୍ବତନ ସ୍ୱାମୀଙ୍କ ନାମରେ ମାମଲା ରୁଜୁ କରିଛନ୍ତି ମହିଳା ଅଧିକାରୀ ।
ରିପୋର୍ଟ ଅନୁସାରେ, ପୀଡିତା ଡିଏସ୍ପି ହେଲେ ଶ୍ରେଷ୍ଠା ଠାକୁର । ସେ ୨୦୧୨ ବ୍ୟାଚ୍ର ଅଧିକାରୀ ହୋଇଥିବାବେଳେ ଏବେ ୟୁପିର ଶାମଲିରେ ମୁତୟନ ଅଛନ୍ତି । ଶ୍ରେଷ୍ଠା ଜଣେ କଡା ମିଜାଜର ପୁଲିସ ଅଧିକାରୀ ଭାବେ ପ୍ରସିଦ୍ଧ । ଲୋକେ ତାଙ୍କୁ ‘ଲେଡି ସିଂଘମ୍’ ନାମରେ ବି ଜାଣନ୍ତି । କୌଶାମ୍ବୀ ଥାନାରେ ସେ ଦାଖଲ କରିଥିବା ଅଭିଯୋଗ ଅନୁସାରେ, ୨୦୧୮ରେ ତାଙ୍କର ବିବାହ ରୋହିତ ରାଜ୍ ନାମକ ଜଣେ ବ୍ୟକ୍ତିଙ୍କ ସହ ହୋଇଥିଲା । ଏକ ମାଟ୍ରିମୋନିଆଲ୍ ସାଇଟ୍ ମାଧ୍ୟମରେ ଯୋଡି ହୋଇଥିଲା ସେମାନଙ୍କ ସଂପର୍କ । ରାଜ୍ ନିଜକୁ
୨୦୦୮ ବ୍ୟାଚ୍ର ଆଇଆରଏସ୍ ଅଧିକାରୀ ହୋଇଥିବାବେଳେ ରାଞ୍ଚିରେ ଡେପୁଟି କମିଶନର ପଦରେ ମୁତୟନ ଥିବା ଦର୍ଶାଇଥିଲେ । ଶ୍ରେଷ୍ଠାଙ୍କର ପରିଜନମାନେ ତାଙ୍କ ସଂପର୍କରେ ବିଭିନ୍ନ ସ୍ଥାନରୁ ପଚାରି ମଧ୍ୟ ବୁଝିଥିଲେ । ସେତେବେଳେ ରୋହିତ ରାଜ୍ ନାମକ ଜଣେ ବ୍ୟକ୍ତି ସତରେ ରାଞ୍ଚିରେ ଡେପୁଟି କମିଶନର ଥିବା ଜଣାପଡିଥିଲା । ଏଭଳି ଭୁଲ୍ ବୁଝାମଣା କେବଳ ସମାନ ନାମ ଯୋଗୁ ହୋଇଥିଲା । ଏହାପରେ ରୋହିତ-ଶ୍ରେଷ୍ଠାଙ୍କର ବିବାହ ହୋଇଥିଲା ।
ବିବାହ ପରେ ସତ ଜାଣିବାରୁ ଶ୍ରେଷ୍ଠାଙ୍କ ପାଦତଳୁ ମାଟି ଖସିଯାଇଥିଲା । କିନ୍ତୁ ବିବାହକୁ ବଞ୍ଚାଇ ରଖିବା ଉଦ୍ଦେଶ୍ୟରେ ସେ କାହାକୁ ଏ ସଂପର୍କରେ ଜଣାଇନଥିଲେ । ଇତିମଧ୍ୟରେ ରୋହିତଙ୍କ ଠକେଇ ଅଭ୍ୟାସ ବଢ଼ିଥିଲା । ସେ ଶ୍ରେଷ୍ଠାଙ୍କ ନାମରେ ଅନ୍ୟମାନଙ୍କଠାରୁ ଟଙ୍କା ଆଦାୟ ଆରମ୍ଭ କରିଥିଲେ । ସେଥିଯୋଗୁ ବିରକ୍ତ ହୋଇ ୨ ବର୍ଷ ପରେ ସ୍ୱାମୀଙ୍କଠାରୁ ଅଲଗା ହୋଇଯାଇଥିଲେ ଶ୍ରେଷ୍ଠା । ଏହାସତ୍ତେ୍ୱ ରୋହିତ ତାଙ୍କର ଅଭ୍ୟାସ ବଦଳାଇନଥିଲେ । ସେ ଶ୍ରେଷ୍ଠାଙ୍କ ନାମରେ ଟଙ୍କା ଠକେଇ ଜାରି ରଖିବାରୁ ବାଧ୍ୟହୋଇ ଶ୍ରେଷ୍ଠା କୌଶାମ୍ବୀ ଥାନାରେ ଏ ସଂପର୍କରେ ମାମଲା ରୁଜୁ କରିଛନ୍ତି । ପୁଲିସ ଏହା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତଙ୍କୁ ଗିରଫ କରିଛି ।
