ନୂଆଦିଲ୍ଲୀ,୦୨/୦୭: ପହଲଗାମ ଆକ୍ରମଣ ପରେ, ଭାରତ ପାକିସ୍ତାନରେ ଚାଲିଥିବା ଆତଙ୍କବାଦୀ କାର୍ଯ୍ୟକଳାପ ବିରୁଦ୍ଧରେ କଠୋର ଆଭିମୁଖ୍ୟ ଗ୍ରହଣ କରିଛି। ଭାରତ ପାକିସ୍ତାନ ଉପରେ ଏପରି କଠୋର ହୋଇଛି ଯେ, ପାକିସ୍ତାନର ଅବସ୍ଥା ଏବେ ବିଶ୍ବ ସମୁହରେ କଷ୍ଟକର ହୋଇପଡ଼ିଛି। ଭାରତ କ୍ୱାଡରୁ ଏସ୍ସିଓ (ସଂଘାଇ ସହଯୋଗ ସଂଗଠନ) ଏବଂ ବ୍ରିକ୍ସ ପର୍ଯ୍ୟନ୍ତ ସବୁଥିରେ ପାକିସ୍ତାନର ଆତଙ୍କବାଦର ପର୍ଦ୍ଦାଫାସ କରୁଛି। ପ୍ରଧାନମନ୍ତ୍ରୀ ମୋଦି ମଧ୍ୟ ପାକିସ୍ତାନ ପ୍ରାୟୋଜିତ ଆତଙ୍କବାଦ ଉପରେ ଲଗାତାର ଆକ୍ରମଣ କରୁଛନ୍ତି।
ବୈଦେଶିକ ମନ୍ତ୍ରୀ ଡକ୍ଟର ଏସ ଜୟଶଙ୍କର ପୁଣି ଥରେ କହିଛନ୍ତି ଯେ ଆତଙ୍କବାଦ ବିରୁଦ୍ଧରେ ବିଶ୍ୱର ଶୂନ୍ୟ ସହନଶୀଳତା ରହିବା ଉଚିତ। ସେ ଏହା ମଧ୍ୟ କହିଛନ୍ତି ଯେ ପୀଡ଼ିତ ଏବଂ ଆତଙ୍କବାଦୀଙ୍କ ସହିତ କେବେବି ସମାନ ବ୍ୟବହାର କରାଯିବା ଉଚିତ୍ ନୁହେଁ। ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓଙ୍କ ଦ୍ୱାରା ଆୟୋଜିତ କ୍ୱାଡ୍ ଗ୍ରୁପ୍ର ବୈଦେଶିକ ମନ୍ତ୍ରୀଙ୍କ ଏକ ଗୁରୁତ୍ୱପୂର୍ଣ୍ଣ ବୈଠକ ପୂର୍ବରୁ ଜୟଶଙ୍କର ଏହା କହିଛନ୍ତି। କାହାର ନାମ ନ ନେଇ ସେ କହିଛନ୍ତି ଯେ ଭାରତକୁ ଆତଙ୍କବାଦରୁ ନିଜ ଲୋକଙ୍କୁ ସୁରକ୍ଷା ଦେବାର ସମ୍ପୂର୍ଣ୍ଣ ଅଧିକାର ଅଛି ଏବଂ ଦେଶ ଏହି ଅଧିକାରକୁ ବ୍ୟବହାର କରିବ।
କ୍ୱାଡରେ ଭାରତ, ଆମେରିକା, ଅଷ୍ଟ୍ରେଲିଆ ଏବଂ ଜାପାନ ସାମିଲ ଅଛନ୍ତି। ଏହି ଗୋଷ୍ଠୀ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଶାନ୍ତି, ସୁରକ୍ଷା ଏବଂ ସ୍ଥିରତା ଉପରେ ଧ୍ୟାନ ଦେଉଛି। କ୍ୱାଡ ବୈଦେଶିକ ମନ୍ତ୍ରୀଙ୍କ ବୈଠକ ଚଳିତ ବର୍ଷ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା କ୍ୱାଡର ବାର୍ଷିକ ଶିଖର ସମ୍ମିଳନୀ ପାଇଁ ପ୍ରସ୍ତୁତି କରିବ। ବୈଦେଶିକ ମନ୍ତ୍ରୀ ଜୟଶଙ୍କର କହିଛନ୍ତି ଯେ ଭାରତ-ପ୍ରଶାନ୍ତ ମହାସାଗରୀୟ ଦେଶଗୁଡ଼ିକୁ ବିକାଶ ଏବଂ ସୁରକ୍ଷା ଉପରେ ସଠିକ୍ ନିଷ୍ପତ୍ତି ନେବା ପାଇଁ ସ୍ୱାଧୀନତା ଦିଆଯିବା ଉଚିତ। ସେ କହିଛନ୍ତି ଯେ ସେମାନେ ଏକ ମୁକ୍ତ ଏବଂ ଖୋଲା ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ର ଚଢ଼ି ତୋଳିବା ପାଇଁ ପ୍ରତିବଦ୍ଧ। ଏଥିପାଇଁ, ସେମାନଙ୍କର ପ୍ରୟାସ ଏକ ନିୟମ-ଭିତ୍ତିକ ଅନ୍ତର୍ଜାତୀୟ ଧାରାକୁ ପ୍ରୋତ୍ସାହିତ କରିବ।
ଆତଙ୍କବାଦ ପ୍ରତି ଭାରତର 'ଶୂନ୍ୟ ସହନଶୀଳ' ନୀତି:
ଆତଙ୍କବାଦ ଉପରେ କଠୋର ଆଭିମୁଖ୍ୟ ଗ୍ରହଣ କରି ଡକ୍ଟର ଜୟଶଙ୍କର କହିଛନ୍ତି ଯେ ବିଶ୍ୱକୁ ଏହା ବିରୁଦ୍ଧରେ 'ଶୂନ୍ୟ ସହନଶୀଳତା' ପ୍ରଦର୍ଶନ କରିବାକୁ ପଡ଼ିବ। ଏହାର ଅର୍ଥ ହେଉଛି ଯେ ଆତଙ୍କବାଦକୁ କୌଣସି ମୂଲ୍ୟରେ ସହ୍ୟ କରାଯିବା ଉଚିତ୍ ନୁହେଁ। ସେ ଏହା ମଧ୍ୟ କହିଛନ୍ତି ଯେ 'ପୀଡ଼ିତ ଏବଂ ଅପରାଧୀ'ଙ୍କୁ କେବେବି ସମାନ ଭାବରେ ବିବେଚନା କରାଯିବା ଉଚିତ୍ ନୁହେଁ। ଅର୍ଥାତ୍, ଯେଉଁମାନେ ଆତଙ୍କବାଦର ଶିକାର ହୋଇଛନ୍ତି ଏବଂ ଯେଉଁମାନେ ଆତଙ୍କବାଦ ବିସ୍ତାର କରିଛନ୍ତି ସେମାନଙ୍କୁ ସମାନ ମାପରେ ତଉଲିବା ଉଚିତ୍ ନୁହେଁ।'
ପାଣି ପାଇଁ ହନ୍ତସନ୍ତ ପାକିସ୍ତାନ:
ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିଥିଲା। ଏହା ସହିତ, ଭାରତ ମଧ୍ୟସ୍ଥତା କୋର୍ଟର ନିଷ୍ପତ୍ତିକୁ ଅବୈଧ ବୋଲି କହି ଗ୍ରହଣ କରିବାକୁ ମନା କରିଦେଇଛି। ଭାରତ ବିଶ୍ୱକୁ କହୁଛି ଯେ ତାଙ୍କ ବିରୁଦ୍ଧରେ ହୋଇଥିବା ଚୁକ୍ତିନାମାକୁ ଗ୍ରହଣ କରିବ ନାହିଁ। ଭାରତ କହୁଛି ଯେ ଆମେ ନିଜ ଇଚ୍ଛା ଅନୁଯାୟୀ ଆମର ସମ୍ବଳ ବ୍ୟବହାର କରିବୁ। ଭାରତ ଏବେ ପାକିସ୍ତାନରେ ସମସ୍ୟା ସୃଷ୍ଟି କରିଛି। ଭାରତ ୧୯୬୦ ର ସିନ୍ଧୁ ଜଳ ଚୁକ୍ତିନାମା ଅନୁଯାୟୀ ଗଠିତ ମଧ୍ୟସ୍ଥତା କୋର୍ଟକୁ ଭୁଲ କହିଛି। ଭାରତ କହିଛି ଯେ ସେ ଏହି କୋର୍ଟର ନିଷ୍ପତ୍ତିକୁ ଗ୍ରହଣ କରିବ ନାହିଁ।
ପାକିସ୍ତାନକୁ ବଡ଼ ଝଟ୍କା:
ଚୀନର କ୍ୱିଙ୍ଗଡାଓରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ (ଏସ୍ସିଓ)ର ପ୍ରତିରକ୍ଷା ମନ୍ତ୍ରୀମାନଙ୍କ ବୈଠକରେ ଏହି ମିଳିତ ବିବୃତ୍ତି ପାରିତ ହୋଇପାରିଲା ନାହିଁ। ଏହାର କାରଣ ଦର୍ଶାଇ ଭାରତ କହିଛି ଯେ ଏହି ଡକ୍ୟୁମେଣ୍ଟରେ ଆତଙ୍କବାଦ ସମ୍ପର୍କରେ ଭାରତର ଚିନ୍ତାଧାରା ଓ ପ୍ରତିକ୍ରିୟାକୁ ସାମିଲ କରିବାକୁ ଦାବି କରାଯାଇଥିଲା, ଯାହାକି ଏକ ସଦସ୍ୟ ଦେଶ ଗ୍ରହଣ କରିନଥିଲା, ତେଣୁ ସହମତି ହୋଇପାରିଲା ନାହିଁ। ତେଣୁ ଡକ୍ୟୁମେଣ୍ଟରେ ସ୍ୱାକ୍ଷର କରିବାକୁ ମନା କରିଦିଆଗଲା। ରାଜନାଥ ସିଂହ ପାକିସ୍ତାନର ନାଁ ନ ନେଇ ତାକୁ ଏକ ଶିକ୍ଷା ଦେଇଥିଲେ।
