ଭଦ୍ରକ, ୧୩/୦୭: ଚାନ୍ଦବାଲି ଥାନା ସମ୍ମୁଖରେ ଜଣେ ଦଳିତ ମହିଳାଙ୍କୁ ଘୋଷାରି ଘୋଷାରି ମାଡ଼ ଘଟଣାରେ ଜାତୀୟ ମାନବାଧିକାର ଆୟୋଗ (ଏନ୍ଏଚ୍ଆର୍ସି) ଭଦ୍ରକ ଏସ୍ପିଙ୍କୁ ନୋଟିସ୍ ଜାରି କରିଛନ୍ତି । ୪ସପ୍ତାହ ମଧ୍ୟରେ ଆକ୍ସନ ଟେକେନ୍ ରିପୋର୍ଟ ପ୍ରଦାନ କରିବାକୁ ଆୟୋଗ ନିର୍ଦ୍ଦେଶ ଦେଇଛନ୍ତି । ଏହି ଆଦେଶର ଏକ କପି ରାଜ୍ୟ ପୁଲିସ ଡିଜିଙ୍କୁ ପ୍ରଦାନ କରିଛନ୍ତି ।
ଗତ ଜୁନ୍ ୨୫ତାରିଖରେ ଥାନାରେ ଥିବା ନିଜ ସ୍ୱାମୀଙ୍କୁ ଦେଖାକରିବାକୁ ନିଜ ଛୋଟ ୨ ଛୁଆଙ୍କ ସହ ଚାନ୍ଦବାଲି ଥାନାକୁ ଯାଇଥିଲେ ଚାନ୍ଦବାଲି ଏନ୍ଏସି ଅଞ୍ଚଳର ମିତା ଓରଫ୍ ପୂର୍ଣ୍ଣିମା ସେଠୀ । ସେଠାରେ ପଡ଼ିଥିବା ଏକ ଚପଲ ଖୋଳକୁ ତାଙ୍କ ଝିଅ (ନାବାଳିକା) ହାତରେ ଧରି ଥାନା ପରିସରରେ ଫିଙ୍ଗିବା ନେଇ ପୁଲିସ କନ୍ଷ୍ଟେବଲ୍ ରବୀନ୍ଦ୍ର ସେଠୀଙ୍କ ସହ ମିତାଙ୍କର ଯୁକ୍ତିତର୍କ ହୋଇଥିଲା । ପରେ ୩ ଜଣ ପୁଲିସ କର୍ମଚାରୀ ଅତି ଅମାନୁଷିକ ଭାବେ ଉକ୍ତ ମହିଳାଙ୍କୁ ଘୋଷାରି ଘୋଷାରି ମାଡ଼ ମାରିଥିଲେ । ଘଟଣାର ଭିଡିଓ ବିଭିନ୍ନ ସାମାଜିକ ତଥା ଗଣମାଧ୍ୟମରେ ପ୍ରସାରଣ ହୋଇଥିଲା । ସମ୍ପୃକ୍ତ ମହିଳା ତାଙ୍କୁ ଆକ୍ରମଣ କରିଥିବା ୩ ଜଣ ପୁଲିସ କର୍ମଚାରୀ ଏଏସ୍ଆଇ ନେପାଳ ସାହା, କନ୍ଷ୍ଟେବଲ୍ ରବୀନ୍ଦ୍ର ସେଠୀ ଓ ଜଣେ ହୋମଗାର୍ଡଙ୍କ ନାମରେ ଚାନ୍ଦବାଲି ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ଚାନ୍ଦବାଲି ଥାନାଧିକାରୀ ମାମଲା ରୁଜୁ କରିଥିଲେ । ଏସ୍ପି ନିର୍ଦ୍ଦେଶ କ୍ରମେ ୩ କର୍ମଚାରୀଙ୍କୁ ଜିଲ୍ଲା କାର୍ଯ୍ୟାଳୟକୁ ବଦଳି କରାଯାଇଥିଲା । ପରେ ଏଏସ୍ଆଇ ନେପାଳ ଓ କନ୍ଷ୍ଟେବଲ୍ ରବୀନ୍ଦ୍ରଙ୍କୁ ନିଲମ୍ବନ କରାଯାଇଥିଲା । ଏହି ଅମାନୁଷିକ ଘଟଣା ନେଇ ଗତ ୧ ତାରିଖରେ ଆଇନଜୀବୀ ତଥା ମାନବାଧିକାରକର୍ମୀ ରାଧାକାନ୍ତ ତ୍ରିପାଠୀ ଜାତୀୟ ମାନବାଧିକାର ଆୟୋଗଙ୍କଠାରେ ଅଭିଯୋଗ କରିଥିଲେ । ଏହି ମାମଲାରେ ଆୟୋଗ ଗତ ୮ତାରିଖରେ ଭଦ୍ରକ ଏସ୍ପିଙ୍କୁ ଘଟଣାରେ ଗ୍ରହଣ କରାଯାଇଥିବା କାର୍ଯ୍ୟାନୁଷ୍ଠାନ (ଏଟିଆର ବା ଆକ୍ସନ ଟେକେନ୍ ରିପୋର୍ଟ) ୪ସପ୍ତାହ ମଧ୍ୟରେ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
