ଭଞ୍ଜନଗର, ୧/୯: ବାପା ମା' ଆଗରେ ଚାଲିଗଲା ୨ ବର୍ଷ ଶିଶୁର ଜୀବନ । ଭଞ୍ଜନଗର ଥାନା ଅନ୍ତର୍ଗତ ବାଇବାଲି ପଞ୍ଚାୟତର ତୋଟା ସାହି ଗଦରା ବଞ୍ଜରଠାରେ ଘରର ମାଟି କାନ୍ଥ ଭୁଶୁଡ଼ି ଜଣେ ୨ ବର୍ଷର ବାଳକର ମୃତ୍ୟୁ ଘଟିଛି । ମୃତକଙ୍କ ନାମ ଋଷି ପ୍ରଧାନ । ଶନିବାର ରାତିରେ ଖାଇ ସାରିବା ପରେ ଋଷି ବାପା ବସନ୍ତ ପ୍ରଧାନ ଓ ମାଆ ଭାଗ୍ୟ ପ୍ରଧାନଙ୍କ ସହ ଶୋଇଥିଲେ । ପୂର୍ବରୁ ୨ ମାସ ତଳେ ବସନ୍ତଙ୍କ ୪ ବଖରା ଘରକୁ ହାତୀ ପଲ ଭାଙ୍ଗି ଦେଇଥିଲେ ମଧ୍ୟ ସେହି ଭଙ୍ଗା ଦଦରା ଘରେ ସପରିବାର ରହୁଥିଲେ । ଶନିବାର ରାତିସାରା ବର୍ଷା ଲାଗି ରହିଥିଲା । ରବିବାର ଭୋର ୪ ଟାରେ ଘରର ଗୋଟିଏ କାନ୍ଥ ହଠାତ୍ ଭୁଶୁଡ଼ି ପଡ଼ିଥିଲା । ଶୋଇଥିବା ଅବସ୍ଥାରେ ପରିବାର ଲୋକଙ୍କ ଉପରେ କାନ୍ଥଟି ମାଡ଼ି ବସିଥିଲା । 

ତେବେ ମାଟି କାନ୍ଥ ଭିତରୁ ବାପା ବସନ୍ତ ଓ ମାଆ ଭାଗ୍ୟ ପ୍ରଧାନ ବାହାରି ଆସିଥିବା ବେଳେ ୨ ବର୍ଷର ପୁଅ ଋଷି ସେହି ମାଟି କାନ୍ଥ ତଳେ ଚାପି ହୋଇ ରହିଯାଇଥିଲେ । ପରେ ପରିବାର ସଦସ୍ୟଙ୍କ ସହ ମାଟି କାନ୍ଥ ତଳୁ ଋଷିକୁ ଉଦ୍ଧାର କରାଯାଇ ତୁରନ୍ତ ଆମ୍ବୁଲାନ୍ସ ଯୋଗେ ଭଞ୍ଜନଗର ମେଡିକାଲକୁ ଅଣାଯାଇଥିଲା । ଆଉ ଏଠାରେ ଡାକ୍ତର ଋଷିକୁ ମୃତ ଘୋଷଣା କରିଥିଲେ । ଶବ ମେଡିକାଲରେ ରହିଥିବା ବେଳେ ଘଟଣା ସମ୍ପର୍କରେ ପୁଲିସରେ ସୂଚନା ଦିଆଯାଇଥିବା ଜଣାପଡ଼ିଛି । ଏଭଳି ଅଭାବନୀୟ ଘଟଣା ପରେ ମେଡିକାଲ ପରିସରରେ ଶୋକାକୁଳ ପରିବେଶ ଦେଖିବାକୁ ମିଳିଛି ।