ନୂଆଦିଲ୍ଲୀ: ବାଂଲାଦେଶରେ ଥିବା ଭାରତୀୟ ଭିସା ଆବେଦନ କେନ୍ଦ୍ର ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ ହୋଇଯାଇଛି । ଦେଶରେ ଚାଲିଥିବା ହିଂସା ମଧ୍ୟରେ ଭାରତୀୟ ଭିସା କେନ୍ଦ୍ରକୁ ବନ୍ଦ ରଖାଯାଇଛି । ପରବର୍ତ୍ତୀ ସୂଚନା ନ ଆସିବା ପର୍ଯ୍ୟନ୍ତ ଏହା ବନ୍ଦ ରହିବ ବୋଲି ଏକ ନୋଟିସ ମାଧ୍ୟମରେ ଭିସା କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ୱେବସାଇଟରେ ଭାରତୀୟ ଭିସା ଆବେଦନ କେନ୍ଦ୍ର ସୂଚନା ଦେଇଛି ଯେ, କେବେ ଭିସା କେନ୍ଦ୍ର ଖୋଲାଯିବ, ସେନେଇ ଏସଏମଏସ ଜରିଆରେ ଜଣାଇ ଦିଆଯିବ । ପରବର୍ତ୍ତୀ କାର୍ଯ୍ୟ ଦିବସରେ ପାସପୋର୍ଟ ସଂଗ୍ରହ କରାଯିବ ।
ସଂରକ୍ଷଣ ବ୍ୟବସ୍ଥାକୁ ନେଇ ବାଂଲାଦେଶରେ ଚାଲିଥିବା ହିଂସା ମଧ୍ୟରେ ଶେଖ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଏହାପରେ ସେ ଦେଶ ଛାଡ଼ି ଭାରତ ଚାଲିଆସିଥିଲେ । ଏହା ସତ୍ତ୍ବେ ବାଂଲାଦେଶରେ ହିଂସା ଥମିନାହିଁ । ସଂରକ୍ଷଣ ବିରୋଧୀ ହିଂସା ଆହୁରି ବ୍ୟାପକ ହୋଇଥିବା କୁହାଯାଉଛି । ଏହା ଭିତରେ ଆଜି ରାତିରେ ମହମ୍ମଦ ୟୁନୁସ୍ ଦେଶର ଅନ୍ତରୀଣ ପ୍ରଧାନମନ୍ତ୍ରୀ ଭାବରେ ଶପଥ ନେବେ ।
ସେପେଟେ ଅପ୍ରୀତିକର ପରିସ୍ଥିତିକୁ ଦୃଷ୍ଟିରେ ରଖି ଢାକାରେ ଥିବା ଭାରତୀୟ ଉଚ୍ଚ ଆୟୋଗର ୧୯୦ ଜଣ ଅଣ-ଅତ୍ୟାବଶ୍ୟକ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ଭାରତକୁ ସ୍ଥାନାନ୍ତର କରାଯାଇଥିଲା । କର୍ମଚାରୀଙ୍କ ସ୍ଥାନାନ୍ତର ପରେ ଭିସା ଆବେଦନ କେନ୍ଦ୍ର ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ ନେଇ ଘୋଷଣା କରାଯାଇଛି । କିନ୍ତୁ କୌଣସି କୂଟନୀତିଜ୍ଞ ଭାରତ ପ୍ରତ୍ୟାବର୍ତ୍ତନ କରିନାହାନ୍ତି । ସେମାନେ ସେଠାରେ ଅଛନ୍ତି ଏବଂ ସ୍ଥିତି ଉପରେ ନଜର ରଖିଛନ୍ତି ।
