ପୁରୀ,୨୯/୦୭: ବିଶ୍ୱପ୍ରସିଦ୍ଧ ତୀର୍ଥସ୍ଥଳ ଶ୍ରୀକ୍ଷେତ୍ର । ଧାର୍ମିକ ପର୍ଯ୍ୟଟନ ସହର ଭାବେ ବେଶ୍ ପରିଚିତ । ସମସ୍ତ ଲକ୍ଷ୍ୟ ମହାପ୍ରଭୁଙ୍କ ଦର୍ଶନ ଆଉ ବେଳାଭୂମିରେ ଚିତ୍ତ ବିନୋଦନ । ସେଥିପାଇଁ ବର୍ଷସାରା ଦିନରାତି ଶ୍ରୀକ୍ଷେତ୍ରରେ ଯାତ୍ରୀଙ୍କ ଭିଡ଼ । ତେଣୁ ହଜାର ହଜାର ଉଠା ଦୋକାନୀଙ୍କ ପେଟପାଟଣାର ସ୍ଥାନ। ଫୁଟ୍ପାଥ୍ଠାରୁ ଆରମ୍ଭ କରି ବଡ଼ ହୋଟେଲ୍ ଶିଳ୍ପ ଗଢ଼ି ଉଠିଛି । ଏହା ଉପରେ ନଜର ପଡ଼ିଛି ଅସାମାଜିକଙ୍କର । ବଡ଼ଦାଣ୍ଡରୁ ବେଳାଭୂମି ସବୁଠି ଚାଲିଛି ଏହି ଅସାମାଜିକଙ୍କ ଗୁଣ୍ଡାରାଜ୍ । ପୁରୀ ଏବେ ଦାଦାବଟି ଆଦାୟର ଏକ ପେଣ୍ଠସ୍ଥଳ ପାଲଟିଛି । ଲକ୍ଷ ଲକ୍ଷ ଟଙ୍କା ରୋଜଗାର କରୁଛନ୍ତି ଏହି ଅସାମାଜିକମାନେ। ବଟି ନପାଇଲେ ଆତଙ୍କ ରଚୁଛନ୍ତି । ବ୍ୟବସାୟୀଙ୍କୁ ହାଣି କୋକୁଆ ଭୟ ସୃଷ୍ଟି କରୁଛନ୍ତି । ହକ୍ ପରିଶ୍ରମ କରି କ୍ଷତି ସହୁଛନ୍ତି ଛୋଟରୁ ବଡ଼ ବ୍ୟବସାୟୀ ।
ଗୁଣ୍ଡାଶ୍ରେଣୀଙ୍କ ପାଇଁ ବଡ଼ଦାଣ୍ଡ ପାଲଟିଛି ବେଆଇନ୍ ରୋଜଗାରର ଉତ୍ସ । ଅନେକ ଅସାମାଜିକ ବଡ଼ଦାଣ୍ଡର କିଛି କିଛି ସ୍ଥାନକୁ ନିଜ ଅକ୍ତିଆରରେ ରଖିଛନ୍ତି । ସେଠାରେ ବେପାର କରିବାକୁ ହେଲେ ଏହି ଅସାମାଜିକଙ୍କୁ ପ୍ରତିଦିନ ବଟି ଦେବାକୁ ପଡ଼ୁଛି । ବ୍ୟବସାୟୀ ବଟି ନଦେଲେ ବେପାର ବନ୍ଦ । ବର୍ଷ ବର୍ଷ ଧରି ଏହି କାରବାର ଚାଲିଛି । କିନ୍ତୁ ପୁଲିସ ଏଦିଗରେ ଚୁପ୍ ରହିଛି ।
ବଡ଼ଶଙ୍ଖ ପରିବା ମାର୍କେଟ୍କୁ ବିଭିନ୍ନ ଅଞ୍ଚଳରୁ ବ୍ୟବସାୟୀ ଆସୁଛନ୍ତି । ପୌରସଂସ୍ଥାକୁ ଏହି ବ୍ୟବସାୟୀ ଇଜିରା ଦେଉଥିବା ବେଳେ ଗୁଣ୍ଡା ଆଦାୟ କରୁଛନ୍ତି ଦାଦାବଟି । ନିୟମିତ ଭାବେ ବଡ଼ଶଙ୍ଖ ପରିବା ମାର୍କେଟ୍ରେ ନିଶାଖୋର ପଶି ବଟି ଆଦାୟ କରୁଥିବା ଦେଖିବାକୁ ମିଳିଛି । ଏହି ଅଭିଯୋଗରେ କୁମ୍ଭାରପଡ଼ା ଥାନା ପୁଲିସ ପୂର୍ବରୁ ବହୁ ସଂଖ୍ୟାରେ ନିଶାଖୋରଙ୍କୁ ଗିରଫ କରିଛି । କିନ୍ତୁ ୩ ମାସ ଭିତରେ ଏହି ଦାଦାବଟି ଆଦାୟ କରୁଥିବା ନିଶାଖୋରଙ୍କ ଗିରଫ ସଂଖ୍ୟା କମିଛି । ଅନ୍ୟପଟେ ବଡ଼ଶଙ୍ଖରେ ଥିବା ଫଳ ଦୋକାନୀଙ୍କଠାରୁ ମଧ୍ୟ ବାହୁବଳୀ ବଟି ଆଦାୟ କରୁଛନ୍ତି । ବଟି ବଦଳରେ ବ୍ୟବସାୟ କରିବାକୁ ଜାଗା ମିଳୁଥିବା ବେଳେ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି ।
ସୂଚନାଯୋଗ୍ୟ ଯେ, କିଛିଦିନ ତଳେ ବଡ଼ଶଙ୍ଖଠାରେ ଜଣେ ଦୋକାନୀଙ୍କୁ ବଟି ମାଗିବା ବେଳେ କିଛି ବ୍ୟବସାୟୀ ଘେରିଯାଇ ନିସ୍ତୁକ ପିଟିଥିଲେ । କିନ୍ତୁ ପୁଲିସ ନପହଞ୍ଚିବାରୁ ଅସାମାଜିକ ଜଣକ ଖସି ପଳାଇଥିଲା । ସହରର ଅନେକ ବ୍ୟବସାୟିକ ପ୍ରତିଷ୍ଠାନରୁ ଅସାମାଜିକମାନେ ବଟି ଆଦାୟ କରୁଥିବା ନଜିର ରହିଛି । ପହିଲି ରଜ ଦିନ ବଡ଼ଦାଣ୍ଡସ୍ଥିତ ସନ୍ତୋଷୀ ଟେକ୍ସଟାଇଲ୍ରେ ପଶି ବଟି ମାଗିଥିଲେ । ବଟି ନଦେବାରୁ କର୍ମଚାରୀ ଗୁଡ଼ିଆ ସାହିର ସନ୍ଦୀପ ପାଢ଼ୀ ଓରଫ ବାପୁ(୨୪)ଙ୍କୁ ଅସାମାଜିକମାନେ ହାଣିଥିଲେ । ପୂର୍ବରୁ ସ୍ୱର୍ଗଦ୍ୱାର ନିକଟ ମାଛ ମାର୍କେଟ୍ରେ ଜଣେ ବ୍ୟବସାୟୀଙ୍କୁ ଦାଦାବଟି ପାଇଁ ଗୁଳିମାଡ଼ ହୋଇଥିଲା । ପ୍ରତି ମାସରେ ଛୋଟବଡ଼ ଦୋକାନୀ ଓ ହୋଟେଲ୍ ମାଲିକମାନେ ଦାଦାବଟି ଦେଇ ବ୍ୟବସାୟ କରୁଥିବା ଅଭିଯୋଗ ହୋଇ ଆସୁଛି ।
ସହରରେ ଥିବା ବିଭିନ୍ନ ଟ୍ରାଭେଲ୍ସ ଏଜେଣ୍ଟଙ୍କଠାରୁ ଦାଦାବଟି ଆଦାୟ ଜାରି ରହିଛି । ସିଟି ରୋଡସ୍ଥିତ ବିଏନ୍ଆର୍ ହୋଟେଲ୍ ଗଳିର ସତ୍ୟବାନ ବରାଳ ଓରଫ ତେଣ୍ଟେଇକୁ ଗତ ମାସରେ ଦାଦାବଟି ମାଗି ସ୍ଥାନୀୟ ଅଞ୍ଚଳର କିଛି ଯୁବକ ଆକ୍ରମଣ କରି ଆହତ କରିଥିଲେ । ସେହିପରି ତେଣ୍ଟେଇ ମଧ୍ୟ ବଟି ମାଗି ଦୋକାନ ଭଙ୍ଗାରୁଜା କରିଥିବା ନେଇ ଉଭୟ ପକ୍ଷରୁ ୨ଟି ମାମଲା ରୁଜୁ କରିଛି ସମୁଦ୍ର କୂଳ ଥାନା ପୁଲିସ । ବେଳାଭୂମିରେ ନିର୍ଭର କରୁଥିବା ଅନେକ ଉଠା ଦୋକାନୀ ଓ ଫେରିବାଲା ବଟି ଦେଇ ବେପାର କରୁଛନ୍ତି । ଏପରିକି ଓଟ ଓ ଘୋଡ଼ା ଚଳାଇ ପରିବାର ପୋଷୁଥିବା ବ୍ୟବସାୟୀଙ୍କଠାରୁ ବି ବଟି ନେଉଛନ୍ତି ଅସାମାଜିକ । ବଟି ନଦେବାରୁ ଗତ ୧୭ ତାରିଖରେ ଏକ ଓଟକୁ ହତ୍ୟା କରାଯାଇଥିବା ନେଇ ବଳିଆପଣ୍ଡା ଥାନା ପୁଲିସ ମାମଲା ରୁଜୁ କରିଛି । ପୂର୍ବରୁ ବଟି ପାଇଁ ଏକ ଘୋଡ଼ାକୁ ହାଣିଥିଲେ ଦୁର୍ବୃତ୍ତ।
ବ୍ୟବସାୟୀଙ୍କ ମଧ୍ୟରେ ଏଭଳି ଆତଙ୍କ ରଚି ବଟି ଆଦାୟ କରୁଛନ୍ତି ଅସାମାଜିକ । ସାହି ବସ୍ତିରେ ବ୍ୟବସାୟ କରୁଥିବା ଛୋଡ଼ବଡ଼ ବ୍ୟବସାୟୀ ମଧ୍ୟ ସ୍ଥାନୀୟ ଗୁଣ୍ଡାଙ୍କୁ ବଟି ଦେବାକୁ ବାଧ୍ୟ ହେଉଛନ୍ତି । ବଡ଼ଦାଣ୍ଡରୁ ବେଳାଭୂମି ଯାଏଁ ଖଜା ବ୍ୟବସାୟୀଙ୍କଠାରୁ ବଟି ଆଦାୟ ହେଉଛି । ବଡ଼ଦାଣ୍ଡରେ ଫେବ୍ରୁଆରୀ ମାସରେ ତଳନୂଆସାହିର ଖଜା ବ୍ୟବସାୟୀ ରାଜୁ ବେହେରାଙ୍କୁ ବଟି ମାଗି ଘୋଡ଼ା ନାମକ ଜଣେ ବ୍ୟକ୍ତି ପିଟିଥିଲା । ଏନେଇ ସିଂହଦ୍ୱାର ଥାନାରେ ମାମଲା ରୁଜୁ ହୋଇଥିବା ବେଳେ ଘୋଡ଼ା ଫେରାର୍ ରହିଛି । ସେହିପରି ବିଭିନ୍ନ ଅଞ୍ଚଳରେ ଜମି କିଣୁଥିବା ବ୍ୟକ୍ତିଙ୍କ ପାଇଁ ସମସ୍ୟା ସୃଷ୍ଟି କରୁଛନ୍ତି ଅସାମାଜିକ । ବାହାରୁ ଆସି ପୁରୀରେ ଶେଷ ଜୀବନ ବିତାଇବାକୁ ଅନେକ ମନସ୍ଥ କରି ଏଠାରେ ଜମି କିଣି ଘର ନିର୍ମାଣ କରୁଛନ୍ତି । ଏପରିକି ହୋଟେଲ୍ ନିର୍ମାଣ କରିବାକୁ ମଧ୍ୟ ଅନେକ ଜମି କିଣୁଛନ୍ତି । ଜମି କିଣିବାକୁ ହେଲେ ଗୁଣ୍ଡାଙ୍କ ଅନୁମତି ଆବଶ୍ୟକ ହେଉଛି । ଘର କିମ୍ବା ହୋଟେଲ୍ ନିର୍ମାଣ କରିବାକୁ ହେଲେ ଏହି ଗୁଣ୍ଡା ପ୍ରଥମେ ପହଞ୍ଚି ପତିଆରା ଜାହିର କରୁଛନ୍ତି । କେହି ଜମି କିଣିବା ନଚେତ୍ ନିର୍ମାଣ କାର୍ଯ୍ୟ କରିବା ପୂର୍ବରୁ ବଟି ଦେବାକୁ ବାଧ୍ୟ ହେଉଛନ୍ତି ।
ସହରର ବିଭିନ୍ନ ଅଞ୍ଚଳରେ ବାହୁବଳୀମାନେ ବାଲି ଓ ଗୋଡ଼ି ବେପାର କରୁଛନ୍ତି । ନିର୍ମାଣ କରୁଥିବା ବ୍ୟକ୍ତି ଏହି ଗୁଣ୍ଡାମାନଙ୍କଠାରୁ ବାଲିଗୋଡ଼ି ନ କିଣିଲେ କାମ ବନ୍ଦ କରୁଛନ୍ତି ଅସାମାଜିକ । ସହରରେ ବିଭିନ୍ନ ଅଟୋ ଷ୍ଟାଣ୍ଡ୍ରୁ ବଟି ଆଦାୟ କରାଯାଉଛି । ବସ୍ଷ୍ଟାଣ୍ଡ୍ ହେଉ କି ରେଳ ଷ୍ଟେସନ୍ ସବୁଠି ଚାଲିଛି ଦାଦାବଟି କାରବାର । ଏପ୍ରିଲ୍ ୫ ତାରିଖରେ ଶ୍ରୀମନ୍ଦିର ପଛପଟ ବାହ୍ୟ ପରିକ୍ରମା ମାର୍ଗରେ ଏକ ଅଟୋକୁ ହାଣିଥିଲେ ଦୁର୍ବୃତ୍ତ । ଅଟୋ ଷ୍ଟାଣ୍ଡ୍ରେ ବଟି ମାଗି ଏଭଳି କାଣ୍ଡ ଭିଆଇଥିଲେ । ଅଟୋ ହାଣିବା ସହ ଏକାଧିକ ଚାଳକଙ୍କୁ ଖଣ୍ଡା ଧରି ଗୋଡ଼ାଇଥିଲା । ସେହିଦିନ ଲୋକନାଥ ରୋଡ୍ରେ ବୋମାମାଡ଼ କରି ଫେରାର୍ ହୋଇଥିଲେ । ଏହି ମାମଲାରେ ଅଭିଯୁକ୍ତ ମେ ୧୬ ତାରିଖରେ ବନଦୁର୍ଗା ଛକର ଚିତ୍ତରଞ୍ଜନ ପୁରୋହିତ(୨୬) ଓ ପଣାପ୍ରିୟା ଲେନ୍ର ସନ୍ତୋଷ କୁମାର ମହାନ୍ତି ଓରଫ କଛୁ(୨୩)କୁ ଜେଲ୍ ପଠା ଯାଇଥିଲା । ହେଲେ ମାମଲାରେ ଆଉ ୩ ଜଣ ଏଯାଏଁ ଗିରଫ ହୋଇ ନାହାନ୍ତି ।
ସବୁ ପରେ ବି ପୁଲିସ ଦାଦାବଟି ଆଦାୟକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ କରୁନାହିଁ । ପୁଲିସ ନିରବତା ପଛରେ କିଛି ରହସ୍ୟ ରହୁଥିବା ଆଲୋଚନା ହେଉଛି । ଜଣେ ଅଟୋ ଚାଳକଙ୍କଠାରୁ ବଟି ନେଇ ପୂର୍ବରୁ ପୁଲିସ କର୍ମଚାରୀ ନିଲମ୍ବିତ ହୋଇଥିବା ନଜିର ରହିଛି । ବିଭିନ୍ନ ଅଞ୍ଚଳରେ ଦାଦାବଟି ଆଦାୟ କରୁଥିବା ଅସାମାଜିକ ଓ ବାହୁବଳୀଙ୍କ ସହ ବିଭିନ୍ନ ଥାନାର ଅସାଧୁ କର୍ମଚାରୀଙ୍କ ମେଣ୍ଟ ଥିବା ଅଭିଯୋଗ ହେଉଛି । ଏହି କ୍ଷେତ୍ରରେ ଏସ୍ପିଙ୍କ ହସ୍ତକ୍ଷେପ ଜରୁରୀ ବୋଲି ବ୍ୟବସାୟୀମାନେ ଦାବି କରିଛନ୍ତି । ଶ୍ରୀକ୍ଷେତ୍ର ଭଳି ଧାର୍ମିକ ସହରରେ ଏଭଳି ଘୃଣ୍ୟ ଦାଦାବଟି ଆଦାୟ ପ୍ରଥାକୁ ବନ୍ଦ କରିବା ଲାଗି ଦାବି ଜୋର୍ ଧରିଛି । ଏନେଇ ଏସ୍ପି ପିନାକ ମିଶ୍ର କହିଛନ୍ତି, ଯିଏ ବି ବଟି ଆଦାୟ କରୁଛି ସୂଚନା ମିଳିଲେ ସେମାନଙ୍କ ବିରୋଧ ନିଶ୍ଚିତ କାର୍ଯ୍ୟାନୁଷ୍ଠାନ କରାଯିବ ।
