ଡର୍ଟମଣ୍ଡ,୧୯/୦୬ : ୧୯ବର୍ଷୀୟ ଯୁବ ବିସ୍ମୟ ଆର୍ଦା ଗୁଲରଙ୍କ ଦର୍ଶନୀୟ ଗୋଲ୍ ବଳରେ ତୁର୍କୀ ଚଳିତ ୟୁରୋ ଚାମ୍ପିଅନ୍ସିପ୍ରେ ରୋମାଞ୍ଚକର ବିଜୟ ସହ ଅଭିଯାନ ଆରମ୍ଭ କରିଛି । ମଙ୍ଗଳବାର ସିଗନାଲ ଇଡୁନା ପାର୍କ ଗ୍ରାଉଣ୍ଡରେ ଅନୁଷ୍ଠିତ ଗ୍ରୁପ୍-ଏଫ୍ର ଏକ ମ୍ୟାଚ୍ରେ ତୁର୍କୀ ୩-୧ ଗୋଲ୍ରେ ନବାଗତ ଜର୍ଜିୟାକୁ ପରାଜିତ କରିଛି । ପ୍ରଥମ କରି ୟୁରୋ ଖେଳୁଥିବା ଜର୍ଜିୟା ଲଢୁଆ ଖେଳ ପ୍ରଦର୍ଶନ କରିଥିଲା । ମାତ୍ର ୬୫ତମ ମିନିଟ୍ରେ ଆର୍ଦା ଗୁଲରଙ୍କ ଗୋଲ୍ ଜର୍ଜିଆର ପଏଣ୍ଟ ସ୍ୱପ୍ନ ମଉଳାଇ ଦେଇଥିଲା । ୟୁରୋ ଇତିହାସରେ କନିଷ୍ଠ ଖେଳାଳି ଭାବେ ପଦାର୍ପଣ ମ୍ୟାଚ୍ରେ ଗୋଲ୍ କରି ଗୁଲର ନୂଆ ରେକର୍ଡ ସ୍ଥାପନ କରିଥିଲେ । ପୂର୍ବରୁ ଏହି ରେକର୍ଡ ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲ୍ଡୋଙ୍କ ନାମରେ ରହିଥିଲା । ସେ ୨୦୦୪ ୟୁରୋରେ ପଦାର୍ପଣ କରି ୧୯ବର୍ଷ ୧୨୮ ଦିନ ବୟସରେ ଗୋଲ୍ କରିଥିଲେ ।
ବର୍ତ୍ତମାନ ଗୁଲରଙ୍କ ବୟସ ୧୯ବର୍ଷ ୧୧୪ ଦିନ । ମ୍ୟାଚ୍ ଆରମ୍ଭରୁ ତୁର୍କୀ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା । ୨୫ତମ ମିନିଟ୍ରେ ମର୍ଟ ମୁଲ୍ଡରଙ୍କ ଗୋଲ୍ ବଳରେ ତୁର୍କୀ ଅଗ୍ରଣୀ ହାସଲ କରିଥିଲା । ଫର୍ହି କାଡିଲୋଗ୍ଲୁଙ୍କ ଏକ ପାସ୍ ଜର୍ଜିୟାର ରକ୍ଷଣ ଭାଗ ଭେଦ କରି ବକ୍ସ ନିକଟରେ ପହଞ୍ଚିଥିଲା । ନିକଟରେ ଥିବା ମୁଲ୍ଡର ତତ୍କ୍ଷଣାତ ବଲ୍କୁ ଜର୍ଜିୟା ଗୋଲ୍ ପୋଷ୍ଟରେ ପହଞ୍ଚାଇ ଦେଇଥିଲେ । ୨୮ତମ ମିନିଟ୍ରେ ଗୁଲରଙ୍କ ଏକ ପାସ୍କୁ କିନାନ ୟିଲଡିଜ୍ ଗୋଲ୍ରେ ପରିଣତ କରିଥିଲେ । ମାତ୍ର ଜର୍ଜିୟା ଖେଳାଳିଙ୍କ ଅପିଲ୍ ପରେ ଭାର୍ ସହାୟତା ନିଆଯାଇଥିଲା ଓ ରେଫରୀ ଅଫ୍ସାଇଡ୍ ଦର୍ଶାଇ ଗୋଲ୍ ନାକଚ କରିଦେଇଥିଲେ । ୩୨ତମ ମିନିଟ୍ରେ ଜର୍ଜିୟା ଗୋଲ୍ ପରିଶୋଧ କରି ମ୍ୟାଚ୍ରେ ରୋମାଞ୍ଚ ଭରି ଦେଇଥିଲା । ମେଜ୍ ଷ୍ଟ୍ରାଇକର ଜର୍ଜେସ ମିକାଉତେଜ ଏହି ଗୋଲ କରି ୧-୧ରେ ସ୍ଥିତି ବରାବର କରିଥିଲେ ।
ୟୁରୋ ଇତିହାସରେ ଏହା ଜର୍ଜିୟାର ପ୍ରଥମ ଗୋଲ୍ ରହିଥିଲା । ଏହାପରେ ମ୍ୟାଚ୍ ସଂଘର୍ଷପୂର୍ଣ୍ଣ ରହିଥିଲା । ଅନେକ ସୁଯୋଗ ସୃଷ୍ଟି ହୋଇଥିଲେ ହେଁ ଗୋଲ୍ କରିବାରେ ଉଭୟ ଦଳ ବିଫଳ ହୋଇଥିଲେ । ଶେଷରେ ୬୫ତମ ମିନିଟ୍ରେ ଗୁଲର ଗୋଲ କରି ରୋମାଞ୍ଚ ଭରିଦେଇଥିଲେ । ଜର୍ଜିୟା ପାଇଁ ମ୍ୟାଚ୍କୁ ଫେରିବା କଷ୍ଟକର ହୋଇଥିଲା । ତୁର୍କୀର ବିଜୟ ଏକପ୍ରକାର ପକ୍କା ହୋଇଯାଇଥିଲା । ତଥାପି ଇନ୍ଜୁରୀ ଟାଇମ(୯୦୍ମ୭ତମ ମିନିଟ୍)ରେ ତୁର୍କୀ ପକ୍ଷରୁ ମହମ୍ମଦ କିରିମ ଅକତୁରକୋଗ୍ଲୁ ତୃତୀୟ ଗୋଲ୍ କରିଥିଲେ ।
