ହାଇଦ୍ରାବାଦ: ୟେମେନରେ ମୃତ୍ୟୁଦଣ୍ଡରେ ଦଣ୍ଡିତ ଭାରତୀୟ ନର୍ସ ନିମିଷା ପ୍ରିୟାଙ୍କ ଫାଶୀ ଦଣ୍ଡାଦେଶକୁ ସ୍ଥଗିତ ରଖା ଯାଇଛି। ଏହି ମାମଲାରେ ଭାରତର ଗ୍ରାଣ୍ଡ ମୁଫତି ଶେଖ୍ ଆବୁବକର ଅହମ୍ମଦ, ଯିଏ କାନ୍ଥାପୁରମ ଏ.ପି. ଆବୁବକ୍କର ମୁସଲିୟାର ନାମରେ ମଧ୍ୟ ପରିଚିତ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସୂଚନା ମୁତାବକ, ନିମିଷା ପ୍ରିୟା ହେଉଛନ୍ତି କେରଳର ପାଲକ୍କଡ଼ ଜିଲ୍ଲାର ଜଣେ ୩୭ ବର୍ଷୀୟ ନର୍ସ। ୨୦୧୭ ମସିହାରେ ସେ ତାଙ୍କ ବ୍ୟବସାୟିକ ସହଯୋଗୀ ତାଲାଲ ଅବଦୋ ମାହଦିଙ୍କ ହତ୍ୟା ଅଭିଯୋଗରେ ୨୦୨୦ରେ ମୃତ୍ୟୁଦଣ୍ଡାଦେଶ ପାଇଥିଲେ। ତାଙ୍କର ଅନ୍ତିମ ଅପିଲ ୨୦୨୩ ମସିହାରେ ଖାରଜ ହେବା ପରେ ତାଙ୍କୁ ଚଳିତ ବର୍ଷ ଜୁଲାଇ ୧୬ ତାରିଖରେ ଫାଶୀ ଦଣ୍ଡାଦେଶ ପ୍ରଦାନ କରାଯାଇଥିଲା।
ଗ୍ରାଣ୍ଡ ମୁଫତି ଶେଖ୍ ଆବୁବକ୍କର ଅହମ୍ମଦ କେରଳରେ ରହୁଥିବା ଭାରତର ସୁନ୍ନୀ ସମ୍ପ୍ରଦାୟର ଜଣେ ପ୍ରମୁଖ ନେତା। ୟେମେନର ଅନ୍ୟ ଧାର୍ମୀକ ନେତାମାନଙ୍କ ସହ ଆଲୋଚନା କରି ସେ ଏହି ଫାଶୀ ଦଣ୍ଡାଦେଶକୁ ସ୍ଥଗିତ କରିବାରେ ସଫଳ ହୋଇଛନ୍ତି। ସେ କହିଛନ୍ତି, “ଇସଲାମରେ ଏକ ନିୟମ ରହିଛି। ଯଦି ହତ୍ୟାକାରୀଙ୍କୁ ମୃତ୍ୟୁଦଣ୍ଡ ଦିଆଯାଏ, ତେବେ ପୀଡ଼ିତଙ୍କ ପରିବାରକୁ କ୍ଷମା କରିବାର ଅଧିକାର ରହିଛି।” ସେ ୟେମେନର ପ୍ରସିଦ୍ଧ ସୁଫି ଧର୍ମଗୁରୁ ଶେଖ ହାବିବ ଉମର ବିନ ହାଫିଜଙ୍କୁ ହସ୍ତକ୍ଷେପ କରିବାକୁ ଅନୁରୋଧ କରିଥିଲେ। ଯାହାଫଳରେ ତାଲାଲଙ୍କ ପରିବାରଙ୍କ ସହ ଆଲୋଚନା ଆରମ୍ଭ ହୋଇଛି।
ୟେମେନର ଥିବା ଶରିଆ ନିୟମ ଅନୁଯାୟୀ, ପୀଡ଼ିତଙ୍କ ପରିବାର ‘ଦିୟା’ (ରକ୍ତ ପଣ ବା ବ୍ଲଡ ମନି) ଗ୍ରହଣ କରି ଅଭିଯୁକ୍ତଙ୍କୁ କ୍ଷମା ପ୍ରଦାନ କରିପାରିବାର ନିୟମ ରହିଛି। ନିମିଷାଙ୍କ ପରିବାର ପୀଡ଼ିତଙ୍କ ପରିବାରକୁ ୮.୬ କୋଟି ଟଙ୍କା ପ୍ରଦାନ କରିବାକୁ ପ୍ରସ୍ତାବ ଦେଇଛନ୍ତି। ଏହି ଆଲୋଚନା ଏବେ ମଧ୍ୟ ଜାରି ରହିଛି, ଯାହା ନିମିଷାଙ୍କ ଜୀବନ ରକ୍ଷା ପାଇଁ ନୂତନ ଆଶା ସୃଷ୍ଟି କରିଛି।
ଭାରତ ସରକାର ମଧ୍ୟ ଏହି ମାମଲାରେ କୂଟନୈତିକ ସ୍ତରରେ ସହାୟତା କରୁଛନ୍ତି। ନିମିଷାଙ୍କ ଓକିଲ ସୁଭାଷ ଚନ୍ଦ୍ରନ ଓ ‘ସେଭ୍ ନିମିଷା ପ୍ରିୟା ଇଣ୍ଟରନ୍ୟାସନାଲ ଆକ୍ସନ କାଉନସିଲ’ ମଧ୍ୟ ଏହି ପ୍ରୟାସରେ ସାମିଲ ରହିଛନ୍ତି। ଗ୍ରାଣ୍ଡ ମୁଫତିଙ୍କ କହିବା ଅନୁଯାୟୀ, ଏହି ସ୍ଥଗିତାଦେଶ ଆଲୋଚନା ପାଇଁ ଅଧିକ ସମୟ ଦେଇଛି। ଯାହା ନିମିଷାଙ୍କ ମୃତ୍ୟୁଦଣ୍ଡ ରଦ୍ଦ କରିବାରେ ସହାୟକ ହୋଇପାରେ।
ଗ୍ରାଣ୍ଡ ମୁଫତିଙ୍କ ହସ୍ତକ୍ଷେପ ଓ ୟେମେନର ଧର୍ମୀୟ ନେତାଙ୍କ ସହଯୋଗ ନିମିଷାଙ୍କ ଜୀବନ ରକ୍ଷା କରିବାରେ ଆଶାର କିରଣ ଦେଖାଇଛି।
