କନ୍ଧମାଳ,୩୦/୦୯: ଡାଙ୍ଗଣାମୁ ଘାଟି ରାସ୍ତାରୁ ଜଣେ ଗଞ୍ଜେଇ ବେପାରୀଙ୍କ ମୃତଦେହ ଠାବ ହୋଇଛି । ତାଙ୍କୁ ପୋଲିସ ମାନେ ପିଟି ହତ୍ୟା କରିଥିବା ପରିବାର ଲୋକ ଗୋଛାପଡ଼ା ଥାନାରେ ଅଭିଯୋଗ କରିଛନ୍ତି । ମୃତ ବ୍ୟକ୍ତି ବୌଦ୍ଧ ଜିଲ୍ଲା କଣ୍ଟାମାଳ ଥାନା ବେହେରାପଡ଼ା ଗ୍ରାମର ଜ୍ୟୋଷ୍ଠ ବଣ୍ଡକି ବୋଲି ଜଣାପଡ଼ାଛି । କନ୍ଧମାଳ ଜିଲ୍ଲା ଗୋଛାପଡ଼ା ଥାନା ଡାଙ୍ଗଣାମୁ ଘାଟି ରାସ୍ତା ଏଭଳି ଘଟଣା ଘଟିଛି ।
ସୂଚନା ମୁତାବକ, ସେପ୍ଟେମ୍ୱର ୨୬ ତାରିଖରେ ଜ୍ୟୋଷ୍ଠ ବଣ୍ଡକି ଏବଂ ଦାସିରି ଦିଗାଲ ନାମକ ଦୁଇ ଜଣ ମିଶି ଗୋଟିଏ ବାଇକରେ ଗଞ୍ଜେଇ ଧରି କଣ୍ଟାମାଳ ଅଭିମୁଖେ ଯାଉଥୁଲେ । ଏହି ସମୟରେ ପୋଲିସ ପେଟ୍ରୋଲିଂ ଗାଡ଼ି ସେମାନଙ୍କୁ ଡାଙ୍ଗଣାମୁ ଘାଟିରେ କାବୁ କରିଥିଲେ । କିନ୍ତୁ ପୋଲିସମାନଙ୍କ କବଳରୁ ଦାସିରି ଦିଗାଲ ଖସି ପଳାଇଥିଲା । ତାପରେ ଜ୍ୟୋଷ୍ଠକୁ ପୋଲିସମାନେ ଧରି ବାଡେଇ ଥିଲେ ଏବଂ ସେ ମରିଯିବାରୁ ତାକୁ ଘାଟି ତଳେ ପକାଇ ଦେଇ ତାର ବାଇକ୍କୁ ନେଇଁ ଥାନାକୁ ପଳାଇଥିଲେ । ଏହି ଖବର ଗ୍ରାମବାସୀ ମାନେ ମୃତକଙ୍କ ଘର ଲୋକଙ୍କୁ ଜଣାଇଥିଲେ । ତାପରେ ଘର ଲୋକ ଶନିବାର ଜ୍ୟୋଷ୍ଠର ମୃତଦେହ ଘାଟି ତଳେ ପଡ଼ିଥିବା ଦେଖି ଗୋଛାପଡ଼ା ଥାନାରେ ଲିଖିତ ଏତଲା ଦେଇଥିଲେ । ତାଙ୍କୁ ହତ୍ୟା କରିଥିବା ପୋଲିସମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଦାବି କରିଛନ୍ତି ପରିବାରଲୋକେ । ଅଭିଯୋଗ ଆଧାରରେ ଘଟଣା ସ୍ଥଳକୁ ଡଗ୍ ସ୍କ୍ୱାର୍ଡ ଏବଂ ସାଇଣ୍ଟିଫିକ୍ ଟିମ୍ ଯାଇ ମୃତକଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି ।
ଅନ୍ୟପଟେ ଘଟଣାକୁ ନେଇଁ ଗୋଛାପଡ଼ା ଅଞ୍ଚଳରେ ଚାପା ଉତ୍ତେଜନା ଲାଗିରହିଛି । ତେବେ ଏହି ଘଟଣାକୁ ଗୁରୁତର ସହିତ ନେଇଛନ୍ତି କନ୍ଧମାଳ ଏସପି ଶୁଭେନ୍ଦୁ କୁମାର ପାତ୍ର। ଘଟଣାର ନିରପେକ୍ଷ ତଦନ୍ତ ପାଇଁ ଜଣେ ଡିଏସପିଙ୍କୁ ଦାୟିତ୍ୱ ଦେବା ସହିତ ତାଙ୍କର ହତ୍ୟା କିଭଳି ପରିସ୍ଥିତିରେ ହେଇଛି, ତାର ତଦନ୍ତ ଚାଲିଛି । ତଦନ୍ତରେ ଯାହାର ମଧ୍ୟ ସମ୍ପୃକ୍ତି ଆସିବ ତାଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଫୁଲବାଣୀ ଡିଏସପିଓ ସୁପ୍ରସନ୍ନ ମଲ୍ଲିକ କହିଛନ୍ତି ।
