ଅମରାବତୀ: ୨୦୧୯ରେ ପାଓ୍ବାରକୁ ଆସୁ ଆସୁ ଚନ୍ଦ୍ରବାବୁ ନାଇଡୁଙ୍କ ଦ୍ବାରା ନିର୍ମିତ ଏକ ବିଳାଶପୂର୍ଣ୍ଣ ଘରକୁ ଭାଙ୍ଗିବାକୁ ନିର୍ଦ୍ଦେଶ ଦେଇଥିଲେ ତତ୍କାଳୀନ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡି । ଅମରାବତୀର କୃଷ୍ଣା ନଦୀ କୂଳରେ ଥିବା ‘ପ୍ରଜ୍ଞା ବେଦୀକା’ ବଙ୍ଗଳାକୁ ମାଟିରେ ମିଶାଇ ଦେଇଥିଲେ ଜଗନମୋହନଙ୍କ ସରକାର । ବର୍ତ୍ତମାନ ସମୟ ବଦଳିଛି । ଆଉ ତା ସହ ବଦଳିଯାଇଛି ସରକାର । ଜଗନମୋହନ ରେଡ୍ଡିଙ୍କ ସ୍ଥାନରେ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ହୋଇଛନ୍ତି ଟିଡିପି ମୁଖିଆ ଚନ୍ଦ୍ରବାବୁ ନାଇଡୁ । ଏହା ପରେ ରାଜ୍ୟରେ ଆରମ୍ଭ ହୋଇଯାଇଛି ପ୍ରତିଶୋଧର ରାଜନୀତି । ପୂର୍ବତନ ମୁଖ୍ୟମନ୍ତ୍ରୀ ଜଗନ ମୋହନଙ୍କ ଦ୍ବାରା ନିର୍ମିତ ଏକ ତଥାକଥିତ ଅବୈଧ ନିର୍ମାଣ ଉପରେ ଚାଲିଛି ବୁଲଡୋଜର । 

ଆନ୍ଧ୍ରପ୍ରଦେଶରେ ନୂତନ ସରକାର ଶପଥ ଗ୍ରହଣ କରିବା ପରେ ପୂର୍ବତନ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡିଙ୍କ ବେଆଇନ ନିର୍ମାଣ କାର୍ଯ୍ୟକୁ ଭାଙ୍ଗି ଦେଇଛି ଗ୍ରେଟର ହାଇଦ୍ରାବାଦ ମହାନଗର ନିଗମ। ଲୋଟସ୍ ପଣ୍ଡ୍ ସ୍ଥିତ ଜଗନ୍ ମୋହନ ରେଡ୍ଡିଙ୍କ ବାସଭବନ ସମ୍ମୁଖରେ ତାଙ୍କ ସୁରକ୍ଷା ପାଇଁ ଜବରଦଖଲ କରାଯାଇ ଏକ ନିର୍ମାଣ କାର୍ଯ୍ୟ କରାଯାଇଥିଲା, ଯେଉଁଥିପାଇଁ ଜନସାଧାରଣଙ୍କୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡିଥିଲା।

ଜବରଦଖଲ ତଥା ରାସ୍ତା ନିର୍ମାଣକୁ ନେଇ ମହାନଗର ନିଗମ କାର୍ଯ୍ୟାଳୟକୁ ଅନେକ ଅଭିଯୋଗ ଆସିଥିଲା । ଜଗନମୋହନ ରେଡ୍ଡିଙ୍କ ସମର୍ଥକଙ୍କ ଅନୁଯାୟୀ, ତାଙ୍କ ସୁରକ୍ଷାକୁ ଦୃଷ୍ଟିରେ ରଖି ରାସ୍ତା କଡ଼ରେ କିଛି କୋଠରୀ  ନିର୍ମାଣ କରାଯାଇଥିଲା। ଆନ୍ଧ୍ରପ୍ରଦେଶରେ ଜଗନମୋହନ ରେଡ୍ଡିଙ୍କ ପରାଜୟ ପରେ କୌଣସି ସୁରକ୍ଷା ନଥିଲା । ସେପଟେ ଗ୍ରେଟର ହାଇଦ୍ରବାଦ ମହାନଗର ନିଗମର ନିର୍ଦ୍ଦେଶ କ୍ରମେ ସ୍ଥାନୀୟ ପୋଲିସ ରେଡ୍ଡିଙ୍କ ବାସଭବନରେ ବୁଲଡୋଜର ଚଲାଇଛି । ଏହା ସହ ରାସ୍ତାକୁ ଜବରଦଖଲ କରି ନିର୍ମାଣ ହୋଇଥିବା କେତେକ ରୁମ୍‌କୁ ଭାଙ୍ଗିଦିଆଯାଇଛି । 

ନିକଟରେ ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନରେ ଜଗନମୋହନ ରେଡ୍ଡିଙ୍କ ଦଳ YSRCPକୁ ପରାଜୟର ସମ୍ମୁଖୀନ ହେବାକୁ ପଡିଛି। ରାଜ୍ୟର ୧୭୫ ବିଧାନସଭା ଆସନ ମଧ୍ୟରୁ ତାଙ୍କ ଦଳ ମାତ୍ର ୧୧ଟି ସିଟ୍ ଜିତିଛି।  ସେପଟେ ତେଲୁଗୁ ଦେଶମ ପାର୍ଟି (ଟିଡିପି) ୧୩୫ଟି ସିଟ୍ ଜିତି ସର୍ବବୃହତ୍ତ ଦଳ ଭାବରେ ସରକାର ଗଢ଼ିଛି। ପବନ କଲ୍ୟାଣଙ୍କ ଜନସେନା ପାର୍ଟି ୨୧ଟି ସିଟ୍ ପାଇଥିବାବେଳେ ବିଜେପି ୮ଟି ସିଟ୍ରେ ବିଜୟୀ ହୋଇଛି ।