ତୁରିନ,୨୧/୧୧: ସର୍ବିୟା ତାରକା ନୋଭାକ ଜୋକୋଭିକ୍ ରେକର୍ଡ଼ ସପ୍ତମ ଥର ଏଟିପି ଫାଇନାଲ୍ସ ଚାମ୍ପିଅନ୍ ହୋଇଛନ୍ତି । ଫାଇନାଲ୍ରେ ସେ ସିଧାସଳଖ ୬-୩, ୬-୩ ସେଟ୍ରେ ଇଟାଲୀର ଜାନିକ ସିନରଙ୍କୁ ପରାସ୍ତ କରିଥିଲେ । ମ୍ୟାଚ୍ ଜିତିବା ପାଇଁ ତାଙ୍କୁ ୧ଘଣ୍ଟା ୪୪ମିନିଟ୍ ଲାଗିଥିଲା । ଚଳିତ ବର୍ଷର ଅନ୍ତିମ ଟୁର୍ଣ୍ଣାମେଣ୍ଟରେ ଜୋକୋଭିକ୍ ସ୍ୱିଜରଲାଣ୍ଡର ପ୍ରସିଦ୍ଧ ଖେଳାଳି ରୋଜର ଫେଡେରରଙ୍କ ରେକର୍ଡ଼ ଭଙ୍ଗ କରିବା ସହ ପେପରଷ୍ଟୋନ ଏଟିପି ମାନ୍ୟତା ତାଲିକାରେ ଏକ ନମ୍ବର ଖେଳାଳି ଭାବେ ୪୦୦ ସପ୍ତାହ ପୂରଣ କରିଛନ୍ତି । ଫେଡେରର ପୂର୍ବରୁ ୬ଥର ଏଟିପି ଫାଇନାଲ୍ସ ଚାମ୍ପିଅନ୍ ହୋଇଥିଲେ । ଆଜି ପେପରଷ୍ଟୋନ ପକ୍ଷରୁ ଜୋକୋଭିକଙ୍କୁ ବର୍ଷର ଶୀର୍ଷ ଖେଳାଳି ଭାବେ ଟ୍ରଫି ପ୍ରଦାନ କରାଯାଇଥିଲା । ସେ କ୍ୟାରିୟରର ମଧ୍ୟରେ ଅଷ୍ଟମ ଥର ଏହି ଟ୍ରଫି ହାତେଇବାରେ ସଫଳ ହୋଇଛନ୍ତି ।
ଏଟିପି ମାନ୍ୟତାରେ ପ୍ରଥମ ଖେଳାଳି ଭାବେ ଜୋକୋଭିକ୍ ଶୀର୍ଷ ସ୍ଥାନରେ ମୋଟ ୪୦୦ ସପ୍ତାହ ରହିବାର ବିରଳ ଉପଲବ୍ଧି ହାସଲ କରିଛନ୍ତି । ପ୍ରଥମ ଥର ସେ ୨୦୧୧ ଅଗଷ୍ଟରୁ ୨୦୧୨ ଜୁଲାଇ ପର୍ଯ୍ୟନ୍ତ ୫୩ ସପ୍ତାହ ଧରି ଶୀର୍ଷରେ ରହିଥିଲେ । ଏହାପରେ ୨୦୧୨ ଜୁନ୍ରୁ ୨୦୧୩ ଅକ୍ଟୋବର ଯାଏଁ ୪୮ ସପ୍ତାହ, ୨୦୧୪ ଜୁନ୍ରୁ ୨୦୧୬ ନଭେମ୍ବର ଯାଏଁ ସର୍ବାଧିକ ୧୨୨ ସପ୍ତାହ ଏକ ନମ୍ବର ସ୍ଥାନରେ ରହିଥିଲେ । ଚଳିତ ସିଜନରେ ସେ ୧୧ ସପ୍ତାହ ଧରି ଶୀର୍ଷରେ ରହିଛନ୍ତି । ଗତ ଫେବ୍ରୁଆରୀ ମାସ ଜୋକୋଭିକ୍ ପ୍ରସିଦ୍ଧ ମହିଳା ଖେଳାଳି ଷ୍ଟେଫି ଗ୍ରାଫ୍ଙ୍କ ରେକର୍ଡ଼ ଭଙ୍ଗ କରିଥିଲେ । ଗ୍ରାଫ୍ ୩୭୭ ସପ୍ତାହ ଶୀର୍ଷ ସ୍ଥାନରେ ରହିଥିଲେ । ଏଟିପି ଫାଇନାଲ୍ସ ଟାଇଟଲ୍ ସହ ଜୋକୋଭିକ୍ କ୍ୟାରିୟରରେ ୪୦ତମ ମାଷ୍ଟର୍ସ ୧୦୦୦ ଟାଇଟଲ୍ ପୂରଣ କରିଥିଲେ ।
