ନୂଆଦିଲ୍ଲୀ, ୧୬/୦୯: ରହିବାକୁ ମୁଣ୍ଡ ଉପରେ ଛାତ ନାହିଁ । ଦୁଇ ଓଳା ଦୁଇ ମୁଠା ଖାଇବାକୁ ମିଳୁନି । ବର୍ଷକୁ ନୂଆ ଡ୍ରେସ୍ ଖଣ୍ଡେ ସ୍ୱପ୍ନ ହୋଇଥିବା ବେଳେ ପାଠପଢ଼ା କଥା ନ କହିବା ଭଲ । ଗରିବୀ ଏସବୁ ଛୁଆଙ୍କ ଶାରିରୀକ, ସାମାଜିକ ଓ ଭାବନାତ୍ମକ ବିକାଶ ଉପରେ ଗଭୀର ପ୍ରଭାବ ପକାଉଛି । ଜୀବନର ଗୁଣବତ୍ତାକୁ କମାଇବା ସହ ବିଶ୍ୱାସ ହ୍ରାସ ଏବଂ ଦୃଷ୍ଟିକୋଣ ଓ ବ୍ୟବହାର ଉପରେ ଖରାପ ପ୍ରଭାବ ପଡ଼ୁଛି । 

ବିଶ୍ୱ ବ୍ୟାଙ୍କ ଓ ୟୁନିସେଫର ବିଶ୍ଲେଷଣରୁ ଜଣାପଡ଼ିଛି, ଦୁନିଆରେ ଅତ୍ୟନ୍ତ ଗରିବୀର ସାମ୍ନା କରୁଥିବା ଜନସଂଖ୍ୟାରେ ୫୨.୫ ପ୍ରତିଶତ ଛୁଆ ରହିଛନ୍ତି । ଅତ୍ୟନ୍ତ ଗରିବୀ ମଧ୍ୟରେ ଥିବା ପ୍ରତି ଜଣଙ୍କ ମଧ୍ୟରେ ରହିଛି ଛୁଆଟିଏ । ରିପୋର୍ଟ ଅନୁସାରେ, ୨୦୧୩ରେ ଏହା ୪୭.୩ ପ୍ରତିଶତ ଥିଲା । ୨୦୨୨ରେ ଏହା ୫୨.୫ ପ୍ରତିଶତକୁ ବୃଦ୍ଧି ପାଇଛି ।

କେରଳରେ ‘ନିପା’ ଆକ୍ରାନ୍ତଙ୍କ ସଂଖ୍ୟା ୬କୁ ବୃଦ୍ଧି, କୋଝିକୋଡରେ ସପ୍ତାହକ ପର୍ଯ୍ୟନ୍ତ ସ୍କୁଲ୍ ଓ କଲେଜ ବନ୍ଦ

ରିପୋର୍ଟ ଅନୁସାରେ, ବିଶ୍ୱରେ ଗରିବ ସୀମା ରେଖା ତଳେ ରହୁଥିବା ଲୋକଙ୍କ ସଂଖ୍ୟା ଦ୍ରୁତଗତିରେ ବଢ଼ୁଛି । ସମସ୍ତ ପ୍ରୟାସ ପରେ ବି ଦୁନିଆରେ ଅତ୍ୟନ୍ତ ଗରିବ ଶ୍ରେଣୀରେ ରହୁଥିବା ଲୋକ ଦୈନିକ ୨.୧୫ ଡଲାର (ପ୍ରାୟ ୧୭୮ ଟଙ୍କା)ରୁ କମ ଖର୍ଚ୍ଚରେ ବଞ୍ଚିବାକୁ ବାଧ୍ୟ ହେଉଛନ୍ତି । 

ବୟସ୍କଙ୍କ ତୁଳନାରେ ଛୁଆଙ୍କ କ୍ଷେତ୍ରରେ ଗରିବୀ ଦ୍ରୁତ ମାତ୍ରାରେ ବଢ଼ୁଛି । ବିଶ୍ୱସ୍ତରରେ ୨୦୨୨ରେ ଅତ୍ୟନ୍ତ ଗରିବୀ ଶ୍ରେଣୀର ୬.୬ ପ୍ରତିଶତ ଲୋକ କଚ୍ଚା ଘରେ ରହୁଥିବା ସେଥିରେ ଛୁଆଙ୍କ ପ୍ରତିଶତ ଥିଲା ୧୫.୯ । ସେହିଭଳି ଭାରତରେ ଏହି ପ୍ରତିଶତ ଯଥାକ୍ରମେ ୫.୨, ୧୧.୫ । ଯାହାକି ବିଶ୍ୱସ୍ତରରର ଅନୁପାତ ଠାରୁ କମ୍ ହୋଇଥିଲେ ମଧ୍ୟ ଚିନ୍ତାଜନକ । ଆଉ ସବୁଠୁ ଚିନ୍ତାଜନକ କଥା ହେଲେ ଅତ୍ୟନ୍ତ ଗରିବୀର ସାମ୍ନା କରୁଥିବା ୧୮.୩ ପ୍ରତିଶତ ଅର୍ଥାତ୍ ୯.୯ କୋଟି ଛୁଆଙ୍କ ବୟସ ୫ ବର୍ଷରୁ କମ୍ ।

ଭାପୁରରୁ ମିଳିଲା ଦୁର୍ଲ୍ଲଭ ଧାତୁ, ସୁନାଠୁ ବି ମୂଲ୍ୟବାନ: ମୋବାଇଲ୍‌, ଲାପଟପ୍‌ ଚିପ୍‌ରେ ବ୍ୟବହାର ହୁଏ..

ୟୁନିସେଫ୍ ଅନୁସାରେ, ଅତ୍ୟଧିକ ଗରିବୀର ସାମ୍ନା କରୁଥିବା ଛୁଆ ସବ୍ ସହାରା ଆଫିକ୍ରା ଓ ଦକ୍ଷିଣ ଏସିଆରେ ଅଛନ୍ତି । ଆଫ୍ରିକାରେ ଏହା ୪୦ ପ୍ରତିଶତ ହୋଇଥିବା ବେଳେ ଦକ୍ଷିଣ ଏସିଆରେ ୯.୭ ପ୍ରତିଶତ । ଏଠାରେ ହିଁ ଦୁନିଆର ୯୦ ପ୍ରତିଶତ ଅତ୍ୟନ୍ତ ଗରିବ ଛୁଆ ରହିଛନ୍ତି ।