ପୁରୀ,୦୫/୦୯: ପ୍ରାୟ ଶହେ ବର୍ଷ ପରେ ଶ୍ରୀଜଗନ୍ନାଥଙ୍କ ଶ୍ରୀକୃଷ୍ଣ ଲୀଳାର ବସ୍ତ୍ରହରଣ ନୀତିରେ ଯୋଗ ଦେଇଛନ୍ତି କାଳିକାଦେବୀ ସାହି ବାସିନ୍ଦା । ମହାପ୍ରଭୁଙ୍କ ଶ୍ରୀକୃଷ୍ଣ ଲୀଳା ପାଳନରେ ଚଳିତ ବର୍ଷ ବେଶ୍‌ ଆଗ୍ରହ ଦେଖାଇଛନ୍ତି ପୁରୀ ବାସିନ୍ଦା । ବହୁ ବର୍ଷ ପରେ କାଳିକାଦେବୀ ସାହି ପକ୍ଷରୁ ଦ୍ୱାପର ଯୁଗୀୟ ବସ୍ତ୍ରହରଣ ଲୀଳା ପ୍ରସ୍ତାବ ଆଗତ ହୋଇଥିଲା । ଆଗେ ଶ୍ରୀମନ୍ଦିରରେ କେବଳ ଠାକୁରଙ୍କ ନୀତି ହେଉଥିଲା । ଅଧିକାଂଶ ଭକ୍ତ ଜାଣି ପାରୁ  ନଥିଲେ ଶ୍ରୀମନ୍ଦିରରେ ଶ୍ରୀକୃଷ୍ଣ ଲୀଳାର ଏହି  ଅଭିନୟ । ଚଳିତ ବର୍ଷ  କାଳିକାଦେବୀ ସାହି ଆଖଡ଼ା  ପକ୍ଷରୁ ଶ୍ରୀକୃଷ୍ଣଙ୍କ ସହ ଗୋପୀମାନେ ବାହାରି ଠାକୁରଙ୍କ ନୀତି କରିଛନ୍ତି ।  

ଶ୍ରୀକୃଷ୍ଣ ଲୀଳା ଅବସରରେ କାଳିକାଦେବୀ  ସାହି ପକ୍ଷରୁ କେକେସୀ ବଧ ପ୍ରସ୍ତାବ ପାଳିତ  ହୋଇଆସୁଛି । ହେଲେ ବସ୍ତ୍ରହରଣ ଲୀଳାରେ  ସାହିଆଙ୍କ ପକ୍ଷରୁ ଯୋଗଦାନ ନଥିଲା ।  ୨୦୨୪ରେ ଶ୍ରୀକୃଷ୍ଣ ଲୀଳାର ବସ୍ତ୍ରହରଣ  ପ୍ରସଙ୍ଗରେ କାଳିକାଦେବୀ ସାହିଆଙ୍କ ଯୋଗଦାନ  କଳାପ୍ରେମୀଙ୍କ ଭିତରେ ନୂତନ ଉତ୍ସାହ  ଭରିଛି । ମଙ୍ଗଳବାର ରାତିରେ କାଳିଆଦେବୀ  ସାହିରୁ ବାହାରିଥିବା ଶ୍ରୀକୃଷ୍ଣ ଲୀଳା ପଟୁଆର  ଦର୍ଶନାର୍ଥୀଙ୍କ ମୁଖ୍ୟ ଆକର୍ଷଣ ଥିଲା । ସାହି  ମୁରବୀମାନେ ସାଥିରେ ରହି ଶ୍ରୀଜଗନ୍ନାଥଙ୍କ  ଶ୍ରୀକୃଷ୍ଣ ଲୀଳାର ଆନନ୍ଦ ଲଭିଥିଲେ । ଏନେଇ  କାଳିକାଦେବୀ ସାହି ଆଖଡ଼ା ସମ୍ପାଦକ  ପ୍ରଫୁଲ କୁମାର ଖୁଣ୍ଟିଆ କୁହନ୍ତି ଆମେ ପିଲା  ଦିନୁ ଜାଣିନୁ କେବେ ସାହିବାସିନ୍ଦା ଏହି  ନୀତିରେ ସାମିଲ ହୁଅନ୍ତି! ଆମ ବଡ଼ ମାନେ  ମଧ୍ୟ ଜାଣନ୍ତିନି । 

ଶ୍ରୀକୃଷ୍ଣ ଲୀଳାର ବସ୍ତ୍ରହରଣ  ଅଭିନୟରେ ସାହିବାସିନ୍ଦା ହୁଏତ ଶହେ ବର୍ଷ  ପୂର୍ବେ ଯୋଗ ଦେଉଥିବେ! ପ୍ରତି ବର୍ଷ ଆମ  ସାହିରୁ କେକେସୀ ବଧ ପ୍ରସ୍ତାବ ଅନୁଷ୍ଠିତ  ହୋଇଆସୁଛି । ଚଳିତ ବର୍ଷ କାଳିକାଦେବୀ  ସାହି ପକ୍ଷରୁ ବସ୍ତ୍ରହରଣ ନୀତି ପାଳନ ପାଇଁ  ଆମକୁ ଜଣାଇଥିଲେ । ଏଣୁ ଆମେ ଆଗ୍ରହରେ  ଠାକୁରଙ୍କ ନୀତି କରିଥିଲୁ । ଚଳିତ ବର୍ଷ  ଶ୍ରୀମନ୍ଦିର ସେବାୟତ ଛତିଶା ନିଯୋଗ ମୁଖ୍ୟ  ଜନାର୍ଦ୍ଦନ ପାଟଯୋଶୀ ମହାପାତ୍ର ମହାପ୍ରଭୁଙ୍କ  ଶ୍ରୀରାମ ଲୀଳାଭଳି ଶ୍ରୀକୃଷ୍ଣ ଲୀଳାକୁ ଅଧିକ  ଉତ୍ସାହର ସହ ପାଳନ କରିବାକୁ ପରାମର୍ଶ  ଦେଇଥିଲେ । ଏନେଇ ଜିଲ୍ଲା ପ୍ରଶାସନ ସହ  ଆଠ ସାହି ଆଖଡ଼ା କର୍ମକର୍ତ୍ତାଙ୍କ ଆଲୋଚନା  ଚାଲିଛି । ଆଗାମୀ ବର୍ଷରେ ଆହୁରି ଭଲରେ  ଶ୍ରୀଜଗନ୍ନାଥଙ୍କ ଶ୍ରୀକୃଷ୍ଣ ଲୀଳା କରିବାକୁ ପ୍ରସ୍ତୁତ  ହେଉଥିବା ସମ୍ପାଦକ ଶ୍ରୀ ଖୁଣ୍ଟିଆ କୁହନ୍ତି।