ପୁରୀ,୦୧/୦୬: ଶ୍ରୀମନ୍ଦିର ସିଂହଦ୍ୱାର ସମ୍ମୁଖ ଅରୁଣ ସ୍ତମ୍ଭ ଚତୁଃପାଶ୍ୱର୍ରେ ନୂତନ ବାଡ଼ ଲାଗିଛି । ବ୍ରିଟିଶ ଅମଳର ପୁରୁଣା ଲୁହା ବାଡ଼ କଢ଼ାଯାଇ ପିତ୍ତଳର ବାଡ଼ ଲଗାଯାଇଛି । ତେବେ ଅରୁଣ ସ୍ତମ୍ଭକୁ ପ୍ରାୟ ୪ ଫୁଟ ଉଚ୍ଚର ବାଡ଼ ଘେରା ଯିବାରେ ଭକ୍ତର ଧର୍ମୀୟ ଭାବନାକୁ ଆଘାତ ପହଞ୍ଚିଥିବା ଅଭିଯୋଗ ହୋଇଛି । ଠାକୁରଙ୍କ ଦର୍ଶନ ପାଇଁ ଭକ୍ତମାନେ ସିଂହଦ୍ୱାରରେ ପ୍ରବେଶ କରିବା ପୂର୍ବରୁ ଅରୁଣ ସ୍ତମ୍ଭକୁ ସ୍ପର୍ଶ କରି ମୁଣ୍ଡିଆ ମାରନ୍ତି । ଏବେ ଛାତିଏ ଉଚ୍ଚତା ବିଶିଷ୍ଟ ବାଡ଼ ଲାଗିବାରେ ଭକ୍ତମାନେ ଏହି ଅଧିକାରରୁ ବଞ୍ଚିତ ହୋଇଥିବା କ୍ଷୋଭର ସହ କହିଛନ୍ତି ।
ଆଗେ ଶ୍ରୀମନ୍ଦିରରେ ରତ୍ନସିଂହାସନ ସମ୍ମୁଖକୁ ଯାଇ ମହାପ୍ରଭୁଙ୍କ ଦର୍ଶନ କରୁଥିଲୁ । ସାହାଣମେଲା ଦର୍ଶନ ବନ୍ଦ କରି ସେତକ ବାରଣ କଲେ। ପରେ ରଥରେ ଶ୍ରୀବିଗ୍ରହଙ୍କୁ ଛୁଇଁବା ମନା ହେଲା । ଠାକୁରଙ୍କ ରଥ ଛୁଇଁବାକୁ ମଧ୍ୟ ଦେଉ ନାହାନ୍ତି । ବର୍ତ୍ତମାନ ସିଂହଦ୍ୱାର ସମ୍ମୁଖ ଅରୁଣ ସ୍ତମ୍ଭଙ୍କୁ ସ୍ପର୍ଶ କରିବାର ଅଧିକାର ମଧ୍ୟ ଛଡ଼ାଇ ନିଆଗଲା ବୋଲି କହିଛନ୍ତି ବ୍ରହ୍ମପୁରରୁ ଆସିଥିବା ସୂର୍ଯ୍ୟନାରାୟଣ ପାଣିଗ୍ରାହୀ । ଅନ୍ୟ କିଛି ଶ୍ରଦ୍ଧାଳୁ କୁହନ୍ତି ଶ୍ରୀମନ୍ଦିରକୁ ପ୍ରବେଶ ପୂର୍ବରୁ ଅରୁଣ ସ୍ତମ୍ଭକୁ ଛୁଇଁ ମୁଣ୍ଡିଆ ମାରିବା ଅଧିକାଂଶ ଶ୍ରଦ୍ଧାଳୁଙ୍କ ଧର୍ମାଭ୍ୟାସ ।
ବାଡ଼ ଲଗାଯିବା ନେଇ ଅରୁଣ ସ୍ତମ୍ଭରେ ସେବା ଦେଉଥିବା ଚୁନରା ସେବାୟତଙ୍କୁ ପଚାରିବାରେ ଏନେଇ ତାଙ୍କ ନିକଟରେ କୌଣସି ପୂର୍ବ ସୂଚନା ନଥିବା ଜଣାଯାଇଛି । ୩୪ ଫୁଟ ଉଚ୍ଚ ଏହି ଶିଳାସ୍ତମ୍ଭ ଆଗେ କୋଣାର୍କ ମନ୍ଦିରର ଶୋଭାବର୍ଦ୍ଧନ କରୁଥିଲା । ୧୬ କୋଣୀ ଏହି ଶିଳାସ୍ତମ୍ଭର ଉପରି ଭାଗରେ ସୂର୍ଯ୍ୟଙ୍କ ସାରଥି ଅରୁଣ ଅଧିଷ୍ଠିତ ହୋଇଛନ୍ତି । ଅରୁଣଙ୍କ ସମାନ ଉଚ୍ଚତାରେ ବଡ଼ଦେଉଳ ରତ୍ନବେଦି ରହିଛି ବୋଲି କୁହାଯାଏ । ଅଷ୍ଟାଦଶ ଶତାବ୍ଦୀରେ ତତ୍କାଳୀନ ମହାରାଜା ଦିବ୍ୟସିଂହ ଦେବଙ୍କ ଶାସନ କାଳରେ କୋଣାର୍କରୁ ସ୍ଥାନାନ୍ତର ହୋଇ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ଶୋଭା ପାଉଛି ଅରୁଣ ସ୍ତମ୍ଭ । ଶ୍ରୀମନ୍ଦିର ଉନ୍ନୟନ ପ୍ରଶାସକ ଦେବବ୍ରତ ସାହୁ କୁହନ୍ତି ପୂର୍ବ ଲୁହାର ବାଡ଼ ମୁନିଆ ଥିଲା । ପ୍ରବଳ ଭିଡ଼ରେ ଭକ୍ତ ଆହତ ହେବାର ଆଶଙ୍କା ରହିଥିଲା । ବର୍ତ୍ତମାନ ପିତ୍ତଳ ବାଡ଼ ସୁନ୍ଦର ଦେଖାଯିବା ସହ ବିପଦର ସମ୍ଭାବନା ନାହିଁ ।
