ଭୁବନେଶ୍ୱର,୩୦/୦୬: ଜଙ୍ଗଲର ଅସଲ ମାଲିକଙ୍କୁ ଏବେ ଗୁଲାମ କରି ଦିଆଯାଇଛି । ଏଠି କାହାକୁ ବି ସ୍ୱାଧୀନତା ନାହିଁ । ଜଗନ୍ନାଥଙ୍କର ବି ସ୍ୱାଧୀନତା ନାହିଁ । ତାଙ୍କ ରଥକୁ ରୋକି ଦିଆଯାଉଛି। ହେଲେ ଅଦାନୀକୁ ସ୍ବାଗତ କରାଯାଉଛି । ଏବେ ସଂସଦ କି ବିଧାନସଭାର ସ୍ୱରାଜ ନାହିଁ। ନାରୀ ନିର୍ଯାତନା ପାଇଁ ଆଲୋଚନା ହୋଇ ପାରିଲା ନାହିଁ। ଲେଖକ ଉପରେ କବଜା। ସେ ସ୍ୱତନ୍ତ୍ର ଭାବେ ଲେଖି ପାରିବ ନାହିଁ। ବିଶ୍ୱବିଦ୍ୟାଳୟର ସ୍ୱାଧୀନତା ନାହିଁ। ଓଡ଼ିଶା ସ୍ୱରାଜ ପୁରସ୍କାର କାର୍ଯ୍ୟକ୍ରମରେ ଏହା କହିଛନ୍ତି ପିସିସି ସଭାପତି ଭକ୍ତ ଚରଣ ଦାସ ।
ସୋମବାର ଓଡିଶା ସ୍ୱରାଜ ଅଭିଯାନର ଓଡିଶା ସ୍ୱରାଜ ପୁରସ୍କାର ଉତ୍ସବରେ ଅତିଥି ଭାବେ ଯୋଗ ଦେଇଥିଲେ ପିସିସି ସଭାପତି ଭକ୍ତ ଚରଣ ଦାସ । ସେ କହିଛନ୍ତି, ''ପ୍ରଥମ ସ୍ୱରାଜର ଅଧିକାରୀ ହେଉଛନ୍ତି ଆଦିବାସୀ । ସେମାନେ ହେଉଛନ୍ତି ଜଙ୍ଗଲର ଅସଲ ମାଲିକ । ହେଲେ ସେମାନେ ଏବେ ଦୟନୀୟ ଅବସ୍ଥାରେ ଜଙ୍ଗଲରେ ରହୁଛନ୍ତି । ବିମାନ ବନ୍ଦର କରିବାକୁ ଆଦିବାସୀଙ୍କ ଘରଭାଙ୍ଗି ଦିଆଯାଇଛି । ରାଜ୍ୟରେ ୨୦ ଲକ୍ଷ ଲୋକଙ୍କ ଘର ଭାଙ୍ଗି ଦିଆଯାଇଛି ।''
ସେ ଆହୁରି କହିଛନ୍ତି, ''ସ୍ୱରାଜ ଉପରେ ଆକ୍ରମଣ କଲେ ମାନବତା ପୀଡା ପାଉଛି । ଏ ବାବଦରେ ଜାଗରଣ ଦରକାର । ପ୍ରଧାନମନ୍ତ୍ରୀ ଆସିଥିଲେ ଓଡିଶା ହେଲେ ଯାଜପୁରରେ ଝାଡାବାନ୍ତିରେ ମରିଥିବା ଲୋକଙ୍କୁ ଭେଟିଲେ ନାହିଁ । ଓଡ଼ିଶା ସ୍ୱାଭିମାନରେ ଧନୀ । ଏଠି ବ୍ୟାପକ ପତିବର୍ତ୍ତନ ଦରକାର । ତେବେ ଯାଇ ଓଡିଶାର ସ୍ୱରାଜ ବଞ୍ଚି ପାରିବ ।''
ସେହିପରି ଓଡିଶା କଂଗ୍ରେସ ପ୍ରଭାରୀ ଅଜୟ କୁମାର ଲଲ୍ଲୁ, ପୂର୍ବତନ ପ୍ରଭାରୀ ବି କେ ହରିପ୍ରସାଦ ପ୍ରମୁଖ ସମ୍ବିଧାନ ସମ୍ପୂର୍ଣ ଭାବେ ଲାଗୁ ପାଇଁ ଜାତି ଜନଗଣନା ଜରୁରୀ ବୋଲି କହିଥିଲେ । ସମସ୍ତେ ମିଳିତ ଭାବେ ଏଥି ପାଇଁ ଦାବି କରିବା ଆବଶ୍ୟକ । ଆରକ୍ଷଣ ଗରିବୀ ହଟାଇବା କାର୍ଯ୍ୟକ୍ରମ ନୁହେଁ,ସମସ୍ତଙ୍କୁ ସାମନତା ଦେବା କାର୍ଯ୍ୟକ୍ରମ ବୋଲି କହିଥିଲେ ।
ଏହି ଅବସରରେ ଜବାହାର ବାଲ ମଞ୍ଚର ଓଡିଶା ପ୍ରଭାରୀ ପ୍ରିୟଙ୍କା କହିଥିଲେ,ଓଡିଶାର ସବୁ ଜିଲ୍ଲାରେ ଖୋଲିବ ମଞ୍ଚ । ସମ୍ବିଧାନ ବିଷୟରେ ପିଲାଙ୍କୁ ଶିକ୍ଷା ଦିଆଯିବ । ୨୦୧୯ରୁ ଏହି କାର୍ଯ୍ୟକ୍ରମ ହେଉଛି । ପଞ୍ଚାୟତ ବ୍ୟବସ୍ଥାକୁ ସୁଦୃଢ କରିବା,କ୍ଷମତାର ବିକେନ୍ଦ୍ରିକରଣ ଏହି ସଂସ୍ଥାର ମୁଖ୍ୟ ଉଦ୍ଦେଶ୍ୟ ବୋଲି ସଭାପତିତ୍ୱ କରି ସୁଧାଂଶୁ ଶେଖର ଦେଓ କହିଥିଲେ। ପ୍ରଦୀପ ଦାସଙ୍କୁ ଆଦିବାସୀଙ୍କ ଜଙ୍ଗଲ ସୁରକ୍ଷା ଦେବା ପାଇଁ ସଂଗ୍ରାମ ବାବଦରେ,ବର୍ଜ୍ୟ ପରିଚାଳନା ପାଇଁ ଅଞ୍ଜନ କୁମାର ଜେନାଙ୍କୁ,ମହେନ୍ଦ୍ର କୁମାର ନନ୍ଦ,ସଂଘମିତ୍ରା ଜେନା ପ୍ରମୁଖଙ୍କୁ ଓଡିଶା ସ୍ୱରାଜ ପୁରସ୍କାରରେ ସମ୍ମାନିତ କରାଯାଇଛି ।
