ନୂଆଦିଲ୍ଲୀ: ଦମଦାର ପ୍ରଦର୍ଶନ କରି ଭାରତୀୟ ହକି ଟିମ୍‌ ପ୍ୟାରିସ ଅଲିମ୍ପିକ୍ସ ୨୦୨୪ରେ ବ୍ରୋଞ୍ଜ ମେଡାଲ ହାସଲ କରିଛି । ସ୍ପେନକୁ ହରାଇ ପଦକ ଜିତିଛି ଭାରତୀୟ ହକି ଟିମ୍‌ । ପ୍ରଥମ କ୍ବାର୍ଟରରେ ଦୁଇ ଟିମ୍‌ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଥିଲା । କିନ୍ତୁ ଗୋଟିଏ ବି ଗୋଲ ହୋଇପାରି ନଥିଲା । ଦ୍ବିତୀୟ କ୍ବାର୍ଟରରେ ସ୍ପେନ୍‌ ଗୋଲ କରିଥିଲା ।  ମାର୍କ ମିରାଲେସ୍‌ ୧୮ ମିନିଟରେ ଗୋଲ କରିଥିଲେ । 

ଏହା ପରେ ଭାରତୀୟ ଅଧିନାୟକ ହରମନପ୍ରୀତ ସିଂହ ଭାରତ ପାଇଁ ପ୍ରଥମ ଗୋଲ କରିବାରେ ସକ୍ଷମ ହୋଇଥିଲେ । ଦ୍ବିତୀୟ କ୍ବାର୍ଟର ଶେଷ ହେବା ସହ ଉଭୟ ଟିମ୍‌କୁ ଗୋଟିଏ ଲେଖାଏଁ ଗୋଲ୍‌ ମିଳିଥିଲା । ତୃତୀୟ କ୍ବାର୍ଟରରେ ଭାରତୀୟ ଟିମ୍‌ ଆକ୍ରମଣାତ୍ମକ ଢ଼ଙ୍ଗରେ ଖେଳିଥିଲା । ତୃତୀୟ କ୍ବାର୍ଟର ଆରମ୍ଭରୁ ଭାରତ ଗୋଲ କରିଥିଲା । ହରମନପ୍ରୀତ  ୩୩ ମିନିଟରେ ପେନାଲ୍ଟି କର୍ଣ୍ଣରର ଫାଇଦା ଉଠାଇବା ସହ ଗୋଲ କରିଥିଲେ । 

ଏହା ପରେ ୩୫ ମିନିଟ ବେଳକୁ ଅଭିଷକଙ୍କୁ ଗ୍ରୀନ୍‌ କାର୍ଡ ଦେଖାଇ ଦେଇଥିଲେ ରେଫରି । ୩୭ ମିନିଟ ବେଳକୁ ସେ ପୁଣି ପଡ଼ିଆକୁ ଆସିଥିଲେ । ତୃତୀୟ କ୍ବାର୍ଟର ଶେଷ ସୁଦ୍ଧା ଭାରତ ୨-୧ରେ ଆଗୁଆ ରହିଥିଲା ।  ଭାରତୀୟ ହକି ଟିମ୍‌ ପ୍ୟାରିସ ଅଲିମ୍ପିକ୍ସ ୨୦୨୪ରେ ବହୁତ ଭଲ ପ୍ରଦର୍ଶନ କରିଛି । ପ୍ରଥମ ମ୍ୟାଚ୍‌ରେ ନ୍ୟୁଜିଲାଣ୍ଡକୁ ୩-୨ରେ ହରାଇଥିଲା ଭାରତ । ପରବର୍ତ୍ତୀ ମ୍ୟାଚ୍‌ ଆର୍ଜେଣ୍ଟିନା ସହ ଡ୍ର ରହିଥିଲା ।

 ତୃତୀୟ ମ୍ୟାଚ୍‌ରେ ଆୟର୍ଲାଣ୍ଡକୁ ୨-୦ରେ ହରାଇଥିଲା ଟିମ୍‌ ଇଣ୍ଡିଆ । କିନ୍ତୁ ବେଲଜିୟମ ପାଖରୁ ହାରିଥିଲା ଭାରତ । ସବୁଠୁ ବଡ଼ କଥା ଚଳିତ ଅଲିମ୍ପିକରେ ଭାରତୀୟ ହକି ଟିମ୍‌ ଦୀର୍ଘ ୫୨ ବର୍ଷ ପରେ ଅଷ୍ଟ୍ରେଲିଆକୁ ହରାଇ ରେକର୍ଡ କରିଥିଲା । ବ୍ରିଟେନକୁ ପରାସ୍ତ କରିଥିବା ଭାରତୀୟ ଟିମ୍‌କୁ ଜର୍ମାନୀ ପାଖରୁ ପରାଜୟ ବରଣ କରିଥିଲା । କିନ୍ତୁ ଆଜି ସ୍ପେନ୍‌କୁ ହରାଇ ବ୍ରୋଞ୍ଜ ମେଡାଲ ହାତେଇଛି ଭାରତୀୟ ହକି ଟିମ୍‌ । ସେପଟେ ଭାରତୀୟ ହକି ଟିମ୍‌ ମହାନ ଗୋଲ କିପର ପିଆର ଶ୍ରୀଜେଶ ଆଜିର ବିଜୟ ସହ ହକିରୁ ବିଦାୟ ନେଇଛନ୍ତି ।