ଭୁବନେଶ୍ୱର,୨୮/୦୯: ଆଗକୁ ଶୀତ ଋତୁ ଆସୁଥିବାରୁ ଥଣ୍ଡା ପାଗରେ ଅଧିକାଂଶ ଲୋକ ସୁସ୍ଥ ରହିବା ପାଇଁ ଉଷୁମ ପାଣି ପିଇବାକୁ ଭଲ ପାଆନ୍ତି । ଉଷୁମ ପାଣି ପଇବା ଦ୍ୱାରା ଗଳାକୁ ଆରାମ ମିଳିଥାଏ ଏବଂ ଏହା ପାଚନ କ୍ରିୟାକୁ ସୁସ୍ଥ ରଖିବାରେ ସାହାଯ୍ୟ କରିଥାଏ । ତେବେ ଅନେକ ଲୋକ ବିଶ୍ୱାସ କରନ୍ତି ଯେ, ଉଷୁମ ପାଣି ପିଇବା ଦ୍ୱାରା ରକ୍ତଚାପ ବୃଦ୍ଧି ପାଇଥାଏ । ଯାହାକି ଉଚ୍ଚ ରକ୍ତଚାପ ଥିବା ବ୍ୟକ୍ତିଙ୍କ ପାଇଁ କ୍ଷତିକାରକ ହୋଇପାରେ ।  

ଉଷୁମ ପାଣି ପିଇବା ବିପଜ୍ଜନକ କି?

ନୂଆଦିଲ୍ଲୀର ଡାକ୍ତର ସୋନିଆ ରାୱତଙ୍କ ମତରେ ପରିବର୍ତ୍ତିତ ପାଣିପାଗରେ ହାଲୁକା ଉଷୁମ ପାଣି ପିଇବା ଦ୍ୱାରା ଗଳାକୁ ଆରାମ ମିଳିଥାଏ । ସାଧାରଣତଃ ଶୀତଦିନେ ଲୋକମାନେ ଥଣ୍ଡା ପାଣି ପରିବର୍ତ୍ତେ ଉଷୁମ ପାଣି ପିଇବାକୁ ପସନ୍ଦ କରିଥାନ୍ତି । ଉଷୁମ ପାଣି ଶରୀରରେ ପାଚନ କ୍ରିୟାକୁ ଠିକ୍‌‌ ରଖିବାରେ ସାହାଯ୍ୟ କରିଥାଏ । ଏହାସହିତ ଉଷୁମ ପାଣି ପିଇବା ଦ୍ୱାରା ଶରୀରରେ ରକ୍ତ ପ୍ରବାହରେ ଉନ୍ନତି ହୋଇଥାଏ । ଯେଉଁମାନଙ୍କୁ ଅତ୍ୟଧିକ ଥଣ୍ଡା ହେଉଛି ସେମାନେ ଉଷୁମ ପାଣି ପିଇବା ଉଚିତ । ଏହା ସ୍ୱାସ୍ଥ୍ୟକୁ ଅନେକ ଫାଇଦା ଦେବା ସହ କୌଣସି କ୍ଷତି କରିନଥାଏ ।

ଡାକ୍ତର ସୋନିଆ ରାୱତ କହିଛନ୍ତି ଯେ, ଉଷୁମ ପାଣି ପିଇବା ଦ୍ୱାରା ରକ୍ତଚାପରେ କୌଣସି ପରିବର୍ତ୍ତନ ହୋଇନଥାଏ । ଏହାସହିତ ଉଚ୍ଚ ରକ୍ତଚାପ ଥିବା ବ୍ୟକ୍ତି ମଧ୍ୟ ଗରମ ପାଣି ପିଇପାରିବେ । ଏହାଦ୍ୱାରା ସେମାନଙ୍କର କୌଣସି କ୍ଷତି ହେବ ନାହିଁ । ଉଚ୍ଚ ରକ୍ତଚାପ ରୋଗୀମାନେ ପ୍ରତ୍ୟେକ ଋତୁରେ ପ୍ରତିଦିନ ପର୍ଯ୍ୟାପ୍ତ ପରିମାଣରେ ପାଣି ପିଇବା ଉଚିତ୍‌‌ । ଶରୀରର ଜଳୀୟଂଶ ଭଲ ରହିଲେ ଏହା ରକ୍ତଚାପକୁ ନିୟନ୍ତ୍ରଣ କରିବାରେ ସାହାଯ୍ୟ କରିବ । ଲୋକମାନେ ନିଜ ଆରାମ ଅନୁଯାୟୀ ଉଷୁମ କିମ୍ବା ସାଧା ପାଣି ପିଇପାରିବେ । ଉଚ୍ଚ ରକ୍ତଚାପ ଲୋକମାନେ ଭଲ ଖାଦ୍ୟ ଖାଇବା, ପର୍ଯ୍ୟାପ୍ତ ଶୋଇବା ଏବଂ ଡାକ୍ତରଙ୍କ ପରାମର୍ଶ ଅନୁଯାୟୀ ଔଷଧ ସେବନ କରିବା ଜରୁରୀ ।

ଗବେଷଣାରୁ ଜଣାପଡ଼ିଛି ଯେ, ପ୍ରତିଦିନ ଉଷୁମ ପାଣି ପିଇବା ଦ୍ୱାରା ଗ୍ୟାସ ଏବଂ ବଦହଜମ ସମସ୍ୟା ଦୂର ହୋଇଥାଏ । ଉଷୁମ ପାଣି ପିଇବା ଦ୍ୱାରା ରକ୍ତ ପ୍ରବାହରେ ଉନ୍ନତି ଆସିଥାଏ, ଯାହାକି ହାର୍ଟ ପାଇଁ ଲାଭଦାୟକ ହୋଇଥାଏ । ଶୀତ ଋତୁରେ ଉଷୁମ ପାଣି ଆମ ମାଂସପେଶୀକୁ ଆରାମ ଦେଇଥାଏ ଏବଂ ମାନସିକ ଚାପ ହ୍ରାସ କରିବାରେ ସାହାଯ୍ୟ କରିଥାଏ। ଯଦି କୌଣସି ବ୍ୟକ୍ତି ଉଷୁମ ପାଣି ପିଇବା ଦ୍ୱାରା ଅସୁବିଧାର ଶିକାର ହେଉଛନ୍ତି ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ ।