ଭୁବନେଶ୍ୱର, ୪।୯: ଭାରତର ଅଭିବୃଦ୍ଧି ଅନୁମାନକୁ ବଢ଼ାଇଛି ବିଶ୍ୱବ୍ୟାଙ୍କ । ଚଳିତ ଆର୍ଥିକବର୍ଷ ଦେଶର ମୋଟ ଘରୋଇ ଉତ୍ପାଦ(ଜିଡିପି) ୭% ବଢ଼ିବ ବୋଲି ଏହା ପୂର୍ବାନୁମାନ କରିଛି । ପୂର୍ବରୁ ଏ ନେଇ ବିଶ୍ୱବ୍ୟାଙ୍କର ଅନୁମାନ ଥିଲା ୬.୬% । ତେବେ ମଧ୍ୟବର୍ତ୍ତୀକାଳୀନ ପାଇଁ ଅର୍ଥନୈତିକ ଅଭିବୃଦ୍ଧି ମଜଭୁତ ରହିବ ବୋଲି ଏହା ପ୍ରକାଶ କରିଛି । ବିଶ୍ୱବ୍ୟାଙ୍କର କଣ୍ଟ୍ରି ନିର୍ଦ୍ଦେଶକ(ଭାରତ) ଅଗଷ୍ଟେ ତାନୋ କୌମେ କହିଛନ୍ତି ଯେ, ଗତ ଆର୍ଥିକବର୍ଷ ଭାରତୀୟ ଅର୍ଥବ୍ୟବସ୍ଥା ୮.୨% ବଢ଼ିଥିଲା, ଯାହାକି ବିଶ୍ୱର ଅନ୍ୟ ରାଷ୍ଟ୍ରଗୁଡ଼ିକ ତୁଳନାରେ ସବୁଠୁ ଦ୍ରୁତ ଥିଲା । ଭାରତୀୟ ଅର୍ଥନୀତି ଏବେ ବି ଦ୍ରୁତ ବେଗରେ ବଢୁଛି । ଏହାକୁ ଦୃଷ୍ଟିରେ ରଖି ବିଶ୍ୱ ବ୍ୟାଙ୍କ ଏହାର ଅନୁମାନକୁ ସଂଶୋଧିତ କରିଛି । ଗତ ମାସ ଭାରତୀୟ ରିଜର୍ଭ ବ୍ୟାଙ୍କ ଆର୍ବିଆଇ ୨୦୨୪-୨୫ ଆର୍ଥିକବର୍ଷ ପାଇଁ ଭାରତର ଜିଡିପି ଅଭିବୃଦ୍ଧି ଅନୁମାନ ୭.୨%ରେ ଅପରିବର୍ତ୍ତିତ ରଖିଛି ।
ସେହିଭଳି ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ଏହି ଆର୍ଥିକବର୍ଷ ପାଇଁ ଭାରତର ଅଭିବୃଦ୍ଧି ଅନୁମାନକୁ ୦.୨୦% ବଢ଼ାଇ ୭% କରିଛି । ପ୍ରକାଶଯୋଗ୍ୟ, ଚଳିତ ଆର୍ଥିକବର୍ଷର ଏପ୍ରିଲ-ଜୁନ୍ ତ୍ରୟମାସରେ ଭାରତର ଜିଡିପି ଅଭିବୃଦ୍ଧି ୬.୭%କୁ କମିଛି । ବିଶେଷ କରି ସାଧାରଣ ନିର୍ବାଚନ ଆଚାର ସଂହିତା ପାଇଁ ସରକାରୀ ବ୍ୟୟ ଉପରେ ରୋକ୍ ଲାଗିଥିଲା, ଯାହା ପ୍ରଭାବରେ ଅଭିବୃଦ୍ଧି ଉପରେ ପ୍ରଭାବ ପଡ଼ିଥିବା ବିଶେଷଜ୍ଞମାନେ ପ୍ରକାଶ କରିଛନ୍ତି । ପ୍ରଥମ ତ୍ରୟମାସରେ ଜିଡିପି ଅଭିବୃଦ୍ଧିରେ ହ୍ରାସକୁ ଦୃଷ୍ଟିରେ ରଖି ନୋମୁରା ଭାରତ ପାଇଁ ଏହାର ଅନୁମାନକୁ ୬.୯%ରୁ ୬.୭%କୁ ହ୍ରାସ କରିଛି । ଅନ୍ୟପକ୍ଷରେ, ଗୋଲ୍ଡମ୍ୟାନ୍ ସାଚ୍ସ ଏବଂ ଜେପି ମୋର୍ଗାନ ବିଶ୍ୱର ପଞ୍ଚମ ବୃହତ୍ ଅର୍ଥନୀତି ପାଇଁ ଅଭିବୃଦ୍ଧି ଅନୁମାନକୁ ୬.୫% ରଖିଛନ୍ତି ।
