ପୁରୀ, ୦୭/୦୯ : ଶ୍ରୀମନ୍ଦିର ପରିକ୍ରମା ମାର୍ଗରେ ଜମିଲାଣି ନିଶାଡ଼ିଙ୍କ ଆଡ୍ଡା । ପରିକ୍ରମା ମାର୍ଗ ଶ୍ରଦ୍ଧାଳୁଙ୍କ ନିମନ୍ତେ ହୋଇପଡ଼ିଲାଣି  ଅସୁରକ୍ଷିତ। ନିଶାଖୋରମାନେ ଏକାଠି ହୋଇ ବିଭିନ୍ନ ଗଛ କନ୍ଦିମାନଙ୍କରେ ମଦ, ଗଞ୍ଜେଇ ଖାଉଥିବା ଚିତ୍ର ସାମ୍ନାକୁ ଆସିଛି । ନିଶାରେ ଟୁଳ ହୋଇ ପରିକ୍ରମା ମାର୍ଗରେ ଚାଲିବା ଓ ଗଡ଼ିବାର ଉଦ୍‌ବେଗଜନକ ଦୃଶ୍ୟ ଦେଖିବାକୁ ମିଳିଛି। ଏହାକୁ ନେଇ ଶ୍ରଦ୍ଧାଳୁମାନେ ଉଦ୍‌ବେଗ ପ୍ରକାଶ କରିଛନ୍ତି। ପୁଲିସ କିମ୍ବା ପରିକ୍ରମା ମାର୍ଗ ସୁରକ୍ଷା ନିମନ୍ତେ ମୁତୟନ ଠିକାସଂସ୍ଥାର ସିକ୍ୟୁରିଟି ଗାର୍ଡମାନେ ଏଥିପ୍ରତି ଦୃଷ୍ଟି ଦେଉ ନଥିବା ଅଭିଯୋଗ ହୋଇଛି ।  

ଶ୍ରୀମନ୍ଦିର ସୁରକ୍ଷା ନିମନ୍ତେ ସରକାର ସ୍ୱତନ୍ତ୍ର ଭାବେ ସିଂହଦ୍ୱାର ଥାନା କରିଛନ୍ତି । ପରିକ୍ରମା ମାର୍ଗ ନିର୍ମାଣ ପରେ ପରିବର୍ଦ୍ଧିତ ୧୦  ଏକର ଜାଗାକୁ ସୁରକ୍ଷା ନିମନ୍ତେ ଜିଲ୍ଲା ପୁଲିସ  ପକ୍ଷରୁ ଅତିରିକ୍ତ ପୁଲିସ ଫୋର୍ସ ମୁତୟନ କରାଯାଇଛି । ପରିକ୍ରମା ମାର୍ଗ ସୁରକ୍ଷା ନିମନ୍ତେ ବର୍ଷକୁ ଲକ୍ଷାଧିକ ଟଙ୍କା ନେବାକୁ ଚୁକ୍ତି କରିଥିବା ଠିକାସଂସ୍ଥା ପକ୍ଷରୁ ବହୁ ସଂଖ୍ୟକ ସିକ୍ୟୁରିଟି ଗାର୍ଡ, ମାଳି, ସଫେଇ କର୍ମଚାରୀ ପ୍ରଭୃତିଙ୍କୁ ମୁତୟନ କରାଯାଇଛି । ମାତ୍ର ପରିକ୍ରମା ମାର୍ଗ ନିଶାଡ଼ିଙ୍କ ଆଡ୍ଡାସ୍ଥଳ ହୋଇପଡ଼ିଛି । ଏଥିପ୍ରତି ଶ୍ରୀମନ୍ଦିର ପ୍ରଶାସନ ଦୃଷ୍ଟି ନଦେବା ଉଦ୍‌ବେଗର କାରଣ ହୋଇଛି । ତୁରନ୍ତ ପ୍ରଶାସନ ଦୃଷ୍ଟି ନଦେଲେ ଏଠାରେ ଅସାମାଜିକ ଉତ୍ପାତ ବୃଦ୍ଧି ଘଟିବାର ଆଶଙ୍କା ସୃଷ୍ଟି ହୋଇଛି । ଭିତର ପରିକ୍ରମା ମାର୍ଗରେ ପଶିବା ନିମନ୍ତେ ବିଭିନ୍ନ ସ୍ଥାନରେ ସ୍ୱତନ୍ତ୍ର ରାସ୍ତା ଓ ଗେଟ୍‌ କରାଯାଇଛି । ଭିତର ପରିକ୍ରମା ମାର୍ଗକୁ ସୁରକ୍ଷା ଦେବା ନିମନ୍ତେ ପାଚେରି  କରାଯାଇଛି । ବହୁ ସଂଖ୍ୟକ ସିସିଟିଭି ଲଗାଯାଇଛି । ଏଥିନିମନ୍ତେ ସିସିଟିଭି କଣ୍ଟ୍ରୋଲ ରୁମ୍‌ କରାଯାଇଛି । କୋଟିକୋଟି ଟଙ୍କା ଖର୍ଚ୍ଚ  ହୋଇଛି । ମାତ୍ର ଏହାକୁ ଠିକ୍‌ ଭାବେ ଯାଞ୍ଚ କରାଯାଇ ତତ୍କାଳ ପଦକ୍ଷେପ ନିଆଯାଉନାହିଁ । ତେଣୁ ଏଭଳି ପରିସ୍ଥିତି ସୃଷ୍ଟି ହୋଇଥିବା  ଶ୍ରଦ୍ଧାଳୁମାନେ ଅଭିଯୋଗ କରିଛନ୍ତି।