ନୂଆଦିଲ୍ଲୀ: ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ (DRDO) ଏକ ପରମାଣୁ ବୁଡ଼ାଜାହାଜରୁ ନିକ୍ଷେପ କରାଯିବା ପାଇଁ ପ୍ରଥମ ହାଇପରସୋନିକ୍ କ୍ଷେପଣାସ୍ତ୍ର K-6 ନିର୍ମାଣ କରିଛି। ଏହି ଆନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର (ICBM)ର ଲକ୍ଷ୍ୟଭେଦ କ୍ଷମତା ପ୍ରାୟ ୮୦୦୦ କିଲୋମିଟର । ଏହାକୁ ଶୀଘ୍ର ପରୀକ୍ଷଣ କରାଯିବ । ଡିଆରଡଓ ଦ୍ୱାରା ଆୟୋଜିତ ଏକ ସେମିନାରରେ K-6 କ୍ଷେପଣାସ୍ତ୍ରର ବୈଶିଷ୍ଟ୍ୟ ବିଷୟରେ ସୂଚନା ପ୍ରଦାନ କରାଯାଇଛି । ଏହି K-6 କ୍ଷେପଣାସ୍ତ୍ରର ଗତି ଘଣ୍ଟା ପ୍ରତି ୯,୨୦୦ କିଲୋମିଟର।

 K-6 ହେଉଛି ଭାରତର ପ୍ରଥମ ହାଇପରସୋନିକ୍ ମିସାଇଲ୍ । ଏହାକୁ ବୁଡ଼ାଜାହାଜରୁ ନିକ୍ଷେପ କରାଯାଇପାରିବ । ଏହି ମିସାଇଲ୍ ନିକଟ ଭବିଷ୍ୟତରେ ନିର୍ମିତ ହେବାକୁ ଥିବା ପରମାଣୁ ବୁଡ଼ାଜାହାଜରୁ ନିକ୍ଷେପ କରାଯିବ । ଭାରତରେ ବର୍ତ୍ତମାନ ଦୁଇଟି ପରମାଣୁ ବୁଡ଼ାଜାହାଜ, INS ଆରିହାଣ୍ଟ ଏବଂ INS ଆରିଘାଟ ରହିଛି ।

 K-15 (୭୫୦ କିଲୋମିଟର ରେଞ୍ଜ), K-4 (୩୫୦୦ କିଲୋମିଟର ରେଞ୍ଜ) ଏବଂ K-5 (୫୦୦୦ କିଲୋମିଟର) ରଣନୈତିକ ବାଲିଷ୍ଟିକ୍ ମିସାଇଲ୍ ଆଇଏନଏସ୍‌ ଆରିହାଣ୍ଟ ଏବଂ INS ଆରିଘାଟ ପରମାଣୁ ବୁଡ଼ାଜାହାଜରୁ ନିକ୍ଷେପ କରାଯାଇପାରିବ। ଏଗୁଡ଼ିକ ସବୁ K-6 ପରି ସବମରିନ୍ରୁ ଲଞ୍ଚ ହେଉଥିବା ବାଲିଷ୍ଟିକ୍ ମିସାଇଲ୍ ଅର୍ଥାତ୍ SBLM । ଏହା ବ୍ୟତୀତ, ତୃତୀୟ ପରମାଣୁ କ୍ଷମତା ସଂପନ୍ନ ବୁଡ଼ାଜାହାଜ INS ଅରିଦମନ ମଧ୍ୟ ଚଳିତ ବର୍ଷ ଶେଷ ସୁଦ୍ଧା ପ୍ରସ୍ତୁତ ହୋଇପାରେ ବୋଲି କୁହାଯାଉଛି ।

ଚୀନ୍‌ ପାଖରେ 'DF-17' ହାଇପରସୋନିକ୍ କ୍ଷେପଣାସ୍ତ୍ର ଅଛି, ଯାହା ପରମାଣୁ ଅସ୍ତ୍ର ବହନ କରିବାକୁ ସକ୍ଷମ। ଏହି କ୍ଷେପଣାସ୍ତ୍ରର ଗତି ମାକ୍-୫ ରୁ ମାକ୍-୧୦ ମଧ୍ୟରେ ରହିଛି । ଏହା ବ୍ୟତୀତ ଚୀନ୍‌ର ଯୁଦ୍ଧ ନୌବାହିନୀରେ 'YJ-21' ଆଣ୍ଟି-ସିପ୍ ହାଇପରସୋନିକ୍ କ୍ଷେପଣାସ୍ତ୍ର ମଧ୍ୟ ଅଛି ।