ଲାଞ୍ଜିଗଡ ୩୦/୬ ଲାଞ୍ଜିଗଡ ବ୍ଲକ ରାୟପୁର ଠାରୁ ବିଶାଖାପାଟଣା ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥ ଢେପଗୁଡା ନିକଟସ୍ଥ ଏକ ଅଣ ଓସାରିଆ ପୋଲରେ ଭାରସାମ୍ୟ ହରାଇ ଏକ ଚାଉଳ ବୋଝେଇ ଟ୍ରକ ଦୁର୍ଘଟଣାଗ୍ରସ୍ତ ହୋଇଛି । ଟ୍ରକଟି ବ୍ରିଜ ତଳକୁ ଖସି ଚୁରମାର ହୋଇଯାଇଥିବା ବେଳେ ଡ୍ରାଇଭର  ଏବଂ ହେଲପରଙ୍କୁ ଗୁରୁତର ଅବସ୍ତାରେ ଉଦ୍ଧାର କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ଡ୍ରାଇଭରର ମୃତ୍ୟୁ ଘଟିଛି I 

ସୂଚନାନୁସାରେ ରବିବାର ବିଳମ୍ବିତ ରାତିରେ ଏକ ଚାଉଳ ବୋଝେଇ ଟ୍ରକ ରାୟପୁର ଠାରୁ ବିଶାଖାପାଟଣା ଅଭିମୂଖେ ଯାଉଥିବା ସମୟରେ ବିପରିତ ଦିଗରେ ଆସୁଥିବା ଏକ ଟ୍ରକକୁ ବଞ୍ଚାଇବାକୁ ଯାଇ ଚାଉଳ ଟ୍ରକଟି ଭାରସାମ୍ୟ ହରାଇ ଦୁଇଟି ଗଛରେ ପିଟି ହେଇ ୨୦ ଫୁଟ ବ୍ରିଜ ତଳକୁ ଖସି ପଡିଥିଲା I ଦୁର୍ଘଟଣା ଘଟିବା ପରେ ଖବର ପାଇ ସିକେରକୁପା ଫାଣ୍ଡି ଅଧିକାରୀ ମିନ କେତନ ଶବର, କନେଷ୍ଟବଳ ବିଶ୍ଵନାଥ ମହଲା ଘଟଣା ସ୍ଥଳରେ ପହଞ୍ଚି ଅଗ୍ନିଶମ ବିଭାଗ ଓ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ I ସିକେରକୁପା ଫାଣ୍ଡି ପୋଲିସ ହେଲପରକୁ ଉଦ୍ଧାର କରି ବିଶ୍ୱନାଥପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିବା ବେଳେ ଚାଳକ ଟ୍ରକ ଭିତରେ ଚାପି ହୋଇ ରହିଥିଲେ। 

ଖବର ପାଇବା ପରେ ବିଶ୍ଵନାଥପୁର ପୁଲିସ ପହଞ୍ଚିଥିଲେ I ଲାଞ୍ଜିଗଡ ଏବଂ ଭବାନୀପାଟଣା ଅଗ୍ନିଶମ ବିଭାଗ ଗାଡି ପହଞ୍ଚି ଥିବା ବେଳେ ଦୀର୍ଘ ୬ ଘଣ୍ଟା ପରେ ଗୁରୁତର ଭାବେ ଚାଳକକୁ ଉଦ୍ଧାର କରିଥିଲା ଅଗ୍ନିଶମ ବିଭାଗ । ଡ୍ରାଇଭରକୁ ଗୁରୁତର ଅବସ୍ଥାରେ ଉଦ୍ଧାର କଲା ପରେ ଆମ୍ବୁଲାନସ ଯୋଗେ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା ଏବଂ ବିଶ୍ୱନାଥପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ହେଲପରକୁ ଚିକିତ୍ସା କରିଥିବା ବେଳେ ଗୁରୁତର ହେବାରୁ ତାକୁ ମଧ୍ୟ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା I ସେଠାରେ ଚିକିତ୍ସାଧିନ ଅବସ୍ଥାରେ ଡ୍ରାଇଭରର ମୃତ୍ୟୁ ଘଟିଥିବା ସୂଚନା ମିଳିଛି ।