ଭୁବନେଶ୍ଵର, ୩୦/୦୬ : ଆସୁଛି ବଡ଼ ବର୍ଷା। ଲଘୁଚାପ ପ୍ରଭାବରେ ରାଜ୍ୟରେ ୫ ଯାଏଁ ପ୍ରବଳ ବର୍ଷା ସମ୍ଭାବନା ରହିଛି। ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଆଜି ପାଇଁ ୪ ଜିଲ୍ଲାକୁ ଅରେଞ୍ଜ୍ ୱାର୍ଣ୍ଣିଂ ଜାରି କରାଯାଇଛି। ସେହିପରି ଅଧା ଓଡ଼ିଶାକୁ ୟେଲୋ ଆଲର୍ଟ ଜାରି କରାଯାଇଛି। ପ୍ରବଳ ବର୍ଷା ଯୋଗୁଁ ଉତ୍ତର ଓଡ଼ିଶାରେ ବନ୍ୟା ଭୟ ରହିଛି। ସୁବର୍ଣ୍ଣରେଖା ଓ ଜଳକା ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଛନ୍ତି। ବୁଢାବଳଙ୍ଗରେ ଜଳସ୍ତର ବଢିଛି। ତଳିଆ ଅଞ୍ଚଳ ଜଳମଗ୍ନ ହୋଇଯାଇଛି। ରାଜ୍ୟରେ ବନ୍ୟା ସ୍ଥିତି ନେଇ ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ସୂଚନା ଦେଇଛନ୍ତି। ସେ କହିଛନ୍ତି ଯେ, ରାଜ୍ୟରେ ବନ୍ୟା ସ୍ଥିତି ନିୟନ୍ତ୍ରଣରେ ରହିଛି। ହେଲେ ଆଉ ଗୋଟେ ଲଘୁଚାପ ଆସୁଛି। ତାହା ବିପଦ ଆଣିପାରେ।
ମନ୍ତ୍ରୀ କହିଛନ୍ତି ଯେ, ସୁବର୍ଣ୍ଣରେଖାରେ ଜଳସ୍ତର ବଢୁଛି ହେଲେ ବୁଢାବଳଙ୍ଗ ଓ ଜଳକାରେ କମୁଛି। ଉଭୟ ମୟୁରଭଞ୍ଜ ଓ ବାଲେଶ୍ୱରର ୭ଟି ଲେଖାଏଁ ବ୍ଲକ ସହ ସମୁଦାୟ ୧୪ ବ୍ଲକ ପ୍ରଭାବିତ ହୋଇଛି। ୨୫ଟି ଘର ନଷ୍ଟ ହୋଇଛି। ଦୁଇଟି ମେଡିକାଲ ଓ ଦୁଇଟି ଭେଟେନାରୀ ଟିମ୍ ମହାଜୁଦ ଅଛନ୍ତି। ମୟୁରଭଞ୍ଜରେ ୫୦୭୬ ଲୋକଙ୍କୁ ସ୍ଥାନାନ୍ତର କରାଯାଇଛି। ୭୭ ଗ୍ରାମ ପଞ୍ଚାୟତ ପ୍ରଭାବିତ ହୋଇଛି। ୪୪ଟି ମାଗଣା ରୋଷେଇ ଘର ଖୋଲା ଯାଇଛି। ଗ୍ରାଉଣ୍ଡ୍ରେ ଓଡ୍ରାଫ୍ ୭ ୟୁନିଟ, ଅଗ୍ନିଶମ ୭ ୟୁନିଟ ମୁତୟନ ଅଛିନ୍ତି। ବାଲେଶ୍ୱର ଜିଲ୍ଲାରେ ୧୧୩୮ ଲୋକଙ୍କୁ ସ୍ଥାନାନ୍ତର କରାଯାଇଛି। ୩୫ ଗ୍ରାମ ପଞ୍ଚାୟତ ପ୍ରଭାବିତ ହୋଇଛି। ୬ ଟି ମାଗଣା ରୋଷେଇ ଘର ଖୋଲାଯାଇଛି। ୪ ଓଡ୍ରାଫ ଓ ୮ ଅଗ୍ନିଶମ ୟୁନିଟ୍ ମୁତୟନ ଅଛନ୍ତି। ଆଉ ଦୁଇ ଓଡ୍ରାଫ୍ ୟୁନିଟ୍ ଆଜି ବାଲେଶ୍ୱରରେ ପହଞ୍ଚିବେ। କେନ୍ଦ୍ରାଞ୍ଚଳ RDC ବାଲେଶ୍ୱରରେ ଅଛନ୍ତି। ମୟୁରଭଞ୍ଜ ଓ ବାଲେଶ୍ୱର ଜିଲ୍ଲାରେ କାମ କରିଥିବା ଅଭିଜ୍ଞତା ଥିବା ଅଧିକାରୀଙ୍କୁ କ୍ଷେତ୍ର ଅଞ୍ଚଳ ପଠାଯାଇଛି। ବାଲେଶ୍ୱରର ବସ୍ତା, ବାଲିଆପାଳ ପୌରାଞ୍ଚଳ, ରେମୁଣା ସଦର, ଭୋଗରାଇ ଓ ଜଳେଶ୍ୱରରେ ପାଣି ପସିଛି। ଘାଇ ମରାମତି କାମ ଚାଲିଛି। ପାଣି ଛାଡିବା ପରେ ସାପ କାମୁଡିବା ଭୟ ରହିଛି। ସେଥିପାଇଁ CHC ଓ PHC ଗୁଡିକୁ ପର୍ଯ୍ୟାପ୍ତ ଆଣ୍ଟି ସ୍ନେକ୍ ଭେନମ୍ ଯୋଗାଇ ଦିଆଯାଇଛି।
ରାଜସ୍ଵ ମନ୍ତ୍ରୀ ପୁଣି କହିଛନ୍ତି ଯେ, ଝାଡ଼ଖଣ୍ଡର ଚାନ୍ଦିଲି ଡ୍ୟାମର ପାଣି ଯୋଗୁଁ ପ୍ରତିବର୍ଷ ମୟୂରଭଞ୍ଜ ଓ ବାଲେଶ୍ୱରକୁ ବନ୍ୟା ଆସୁଛି। ଚାନ୍ଦିଲି ଡ୍ୟାମ କାମ ଅସମ୍ପୂର୍ଣ୍ଣ ଥିବାରୁ ସବୁବେଳେ ଓଡ଼ିଶାକୁ ବନ୍ୟା ଆସୁଛି। ଏହାକୁ ସମ୍ପୂର୍ଣ୍ଣ କରିବାକୁ ଝାଡ଼ଖଣ୍ଡ ସରକାରଙ୍କ ସହ ଆଲୋଚନା ହୋଇଛି। କେତେ ପାଣି ଛାଡିବ, ସେନେଇ ଝାଡ଼ଖଣ୍ଡ ସରକାରଙ୍କ ସହ ରାଜ୍ୟ ସରକାର ଯୋଗାଯୋଗରେ ଅଛନ୍ତି। କେନ୍ଦୁଝର, ମୟୁରଭଞ୍ଜ ଓ ବାଲେଶ୍ୱରରେ ମାଗଣା ରୋଷେଇ ଘର ଖୋଲା ଯାଇଛି। ଆସନ୍ତା ୭ ଦିନ ଯାଏଁ ମାଗଣା ଖାଦ୍ୟ ଯୋଗାଇବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି।
