ନୂଆଦିଲ୍ଲୀ: ମହାକାଶଚାରୀ ସୁନୀତା ଓ୍ବିଲିୟମ୍ସ ଏବଂ ବୁଚ୍ ଓ୍ବିଲମୋରଙ୍କ ଅଡ଼ୁଆ ବଢ଼ିଲା । ୩ ମାସ ପରେ ଦୁଇ ମହାକାଶଚାରୀଙ୍କୁ ଛାଡ଼ି ଏକାକୀ ପୃଥିବୀପୃଷ୍ଠକୁ ଫେରିଆସିଲା ବୋଇଂର ଷ୍ଟାରଲାଇନର । ଆଜି (ଶନିବାର) ସକାଳ ୯.୩୧ରେ ଷ୍ଟାରଲାଇନର ନ୍ୟୁ ମେକ୍ସିକୋର ହ୍ବାଇଟ୍ ସ୍ୟାଣ୍ଡ ହାର୍ବରରେ ସୁରକ୍ଷିତ ଅବତରଣ କରିଛି । ୩ଟି ବଡ଼ ପାରାଚ୍ୟୁଟ୍ ଏବଂ ଏୟାର ବ୍ୟାଗ୍ ସାହାଯ୍ୟରେ ଲ୍ୟାଣ୍ଡ କରିଛି ଷ୍ଟାରଲାଇନର । ଆମେରିକୀୟ ମହାକାଶ ଗବେଷଣା ସଂସ୍ଥା (ନାସା) ଅନୁସାରେ, ସ୍ପେସ୍ କ୍ରାଫ୍ଟ ଭାରତୀୟ ସମୟାନୁସାରେ ଭୋର ୩.୩୦ରେ ଅନ୍ତରଜାତୀୟ ସ୍ପେସ୍ ଷ୍ଟେସନରୁ ଯାତ୍ରା ଆରମ୍ଭ କରିଥିଲା ।
ପୃଥିବୀପୃଷ୍ଠରେ ପହଞ୍ଚିବାକୁ ଏହାକୁ ପ୍ରାୟ ୬ ଘଣ୍ଟା ସମୟ ଲାଗିଛି । ଷ୍ଟାରଲାଇନର ସକାଳ ୯ଟା ୧୫ ମିନିଟରେ ପୃଥିବୀର ବାୟୁମଣ୍ଡଳରେ ପ୍ରବେଶ କରିଥିଲା । ସେତେବେଳେ ଏହାର ବେଗ ଘଣ୍ଟାପ୍ରତି ୨,୭୩୫ କିଲୋମିଟର ଥିଲା । ସକାଳ ପ୍ରାୟ ୯.୩୧ରେ ଏହା ଆମେରିକାର ନ୍ୟୁ ମେକ୍ସିକୋର ହ୍ବାଇଟ ସ୍ୟାଣ୍ଡ ହାର୍ବର (ମରୁଭୂମି)ରେ ଲ୍ୟାଣ୍ଡ କରିଥିଲା । ବୋଇଂ କମ୍ପାନି ନାସା ଲାଗି ଏହି ସ୍ପେସ୍କ୍ରାଫ୍ଟ ତିଆରି କରିଥିଲା । ଜୁନ୍ ୫ରେ ଏହା ସାହାଯ୍ୟରେ ସୁନୀତା ଏବଂ ବୁଚଙ୍କୁ ଆଇଏସଏସ୍କୁ ପଠାଯାଇଥିଲା ।
The #Starliner spacecraft is back on Earth.
— NASA Commercial Crew (@Commercial_Crew) September 7, 2024
At 12:01am ET Sept. 7, @BoeingSpace’s uncrewed Starliner spacecraft landed in White Sands Space Harbor, New Mexico. pic.twitter.com/vTYvgPONVc
ଏହା ମିଶନ କେବଳ ୮ ଦିନ ପାଇଁ ଧାର୍ଯ୍ୟ ହୋଇଥିଲା । କିନ୍ତୁ ସୁରକ୍ଷିତ ଫେରିବା ଲାଗି ଏହି ସ୍ପେସ କ୍ରାଫ୍ଟକୁ ନେଇ ଆଶଙ୍କା ବୃଦ୍ଧି ପାଇଥିଲା । ତେଣୁ ବୋଇଂ ନୁହେଁ ବରଂ ସ୍ପେସ୍ ଏକ୍ସର ସ୍ପେସ କ୍ରାଫ୍ଟରେ ମହାକାଶଚାରୀଙ୍କୁ ଫେରାଇ ଆଣିବା ଲାଗି ଯୋଜନା କରିଥିଲା ନାସା । ଆଉ ଏବେ ସୁନୀତା ଏବଂ ବୁଚଙ୍କୁ ଆଇଏସଏସ୍ରେ ଛାଡ଼ି ବୋଇଂର ଷ୍ଟାର ଲାଇନର୍ ପୃଥିବୀପୃଷ୍ଠକୁ ଫେରିଆସିଛି ।
