ନୂଆଦିଲ୍ଲୀ: ଶିବସେନା ସାଂସଦ ସଂଜୟ ରାଉତ ବିଜେପି ସରକାରଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି । କଂଗ୍ରେସ ସାଂସଦ ଏବଂ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଉପରେ ଆକ୍ରମଣ ହୋଇପାରେ ବୋଲି ସଂଜୟ ରାଉତ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ରାହୁଲ ଗାନ୍ଧୀ ଏବଂ ଇଣ୍ଡି ମେଣ୍ଟର ନେତାଙ୍କ ବିରୋଧରେ ଷଡ଼ଯନ୍ତ୍ର କରାଯାଉଛି । ରାହୁଲ ଗାନ୍ଧୀ ସଂସଦରେ ଗଣତନ୍ତ୍ର ପ୍ରସଙ୍ଗ ଉଠାଉଛନ୍ତି । ସରକାରଙ୍କୁ ଆଇନା ଦେଖାଉଛନ୍ତି ରାହୁଲ । ତେଣୁ ତାଙ୍କୁ କାର୍ଯ୍ୟାନୁଷ୍ଠାନର ସାମନା କରିବାକୁ ପଡ଼ିବ । ହେଲେ ଆମେ ପ୍ରସ୍ତୁତ ଅଛୁ ବୋଲି ଶିବସେନା ସାଂସଦ କହିଛନ୍ତି ।

ସେହିଭଳି ବିଜେପି ବହୁମତ ପାଇନାହିଁ କିନ୍ତୁ ଅସାମ୍ବିଧାନିକ କାର୍ଯ୍ୟ କରିବାର ନିଜର ଅଭ୍ୟାସ ଛାଡ଼ିପାରୁ ନାହିଁ ବୋଲି ସଂଜୟ ରାଉତ ଅଭିଯୋଗ କରିଛନ୍ତି । ରାହୁଲ ଗାନ୍ଧୀ ଏବଂ ଆମମାନଙ୍କ ବିରୋଧରେ ଷଡ଼ଯନ୍ତ୍ର କରାଯାଉଛି । ଏହି ଷଡ଼ଯନ୍ତ୍ର ଏଠାରେ ନୁହେଁ ବରଂ ବିଦେଶରେ ହେଉଛି । କାଲି ରାହୁଲଙ୍କ ଉପରେ ଏବଂ ହୁଏତ ପରେ ଆମ ଉପରେ ଆକ୍ରମଣ ହୋଇପାରେ ବୋଲି ସେ ଦାବି କରିଛନ୍ତି । ସଂଜୟ ରାଉତ ଆହୁରି ମଧ୍ୟ କହିଛନ୍ତି, ସରକାରଙ୍କ ନିଦ ଉଡ଼ାଇ ଦେଇଛନ୍ତି ରାହୁଲ । ଏଥି ପାଇଁ ଆମ ଉପରେ ଗ୍ୟାଙ୍ଗଷ୍ଟରଙ୍କୁ ଲଗାଇ ଆକ୍ରମଣ କରାଯାଇପାରେ । 

ସେପଟେ ମହାରାଷ୍ଟ୍ର ସରକାରଙ୍କ ଉପରେ ବର୍ଷିଛନ୍ତି ସାଂସଦ ସଂଜୟ । ସେ କହିଛନ୍ତି, ଲଡ଼କୀ ବହେନ ଯୋଜନା ଦୁଇ ମାସ ମଧ୍ୟରେ ବନ୍ଦ ହୋଇଯିବ । ଏହି ଯୋଜାନରେ ଠିକାଦାରଙ୍କୁ ଟଙ୍କା ଦେଉନାହାନ୍ତି ସରକାର ।  ବିଧାନସଭା ନିର୍ବାଚନ ଆସୁଥିବା ବେଳେ ଆଗାମୀ ୨ ମାସ ମଧ୍ୟରେ ପ୍ରିୟ ଭଉଣୀମାନଙ୍କୁ କିଛି ମିଳିବ ନାହିଁ । ମହାୟୁତି ସରକାର ରାଜ୍ୟର ଋଣଭାର ବଢ଼ାଇ ଦେଇ ଖସିଯିବେ ବୋଲି ସଂଜୟ ରାଉତ ଅଭିଯୋଗ କରିଛନ୍ତି ।