ଚଣ୍ଡିଗଡ଼,୩୦/୦୯: ହରିଆଣା  ନିର୍ବାଚନ ପୂର୍ବରୁ ଡେରା ସଚ୍ଚା ସୌଦା ମୁଖ୍ୟ ଗୁରମିତ ରାମ ରହିମ ପୁଣି ଥରେ  ୨୦ ଦିନିଆ ପାରୋଲ ପାଇଁ ଆବେଦନ କରିଛନ୍ତି । ଅକ୍ଟୋବର ୫ରେ ବିଧାନସଭା ନିର୍ବାଚନ ଥିବାରୁ ରାଜ୍ୟରେ ଆଦର୍ଶ  ଆଚରଣ ବିଧି ଲାଗୁ ହୋଇଛି । ତେଣୁ ତାଙ୍କ ପାରୋଲ ଆବେଦନକୁ ରାଜ୍ୟ ସରକାର ମୁଖ୍ୟ ନିର୍ବାଚନ ଅଧିକାରୀ (ସିଇଓ)ଙ୍କ  ନିକଟକୁ ପଠାଇଛନ୍ତି । ଏହା ଉପରେ ସିଇଓ ପରବର୍ତ୍ତୀ  ପଦକ୍ଷେପ ନେବେ । ଏ ନେଇ ସିଇଓ ରାଜ୍ୟ ସରକାରଙ୍କୁ ଚିଠି ଲେଖି କେତେକ ପ୍ରଶ୍ନ ପଚାରିଛନ୍ତି । ଦୁଇ ଶିଷ୍ୟଙ୍କ ଦୁଷ୍କର୍ମ ଅଭିଯୋଗରେ ଦୋଷୀ ସାବ୍ୟସ୍ତ ହେବା ପରେ ରାମ ରହିମ ଏବେ ୨୦ ବର୍ଷର ଜେଲ୍‌ଦଣ୍ଡ ଭୋଗୁଛନ୍ତି । 

ସିଇଓ ପ୍ରଶ୍ନ କରିଛନ୍ତି ଯେ,  ନିର୍ବାଚନ ସମୟରେ ଜଣେ ଦୋଷୀଙ୍କୁ ପାରୋଲରେ ମୁକ୍ତ କରିବା କେତେ ଠିକ୍‌ ।  ରାହ ରହିମ ଏବେ ହରିଆଣାର ରୋହତକ୍‌  ଜେଲ୍‌ରେ ବନ୍ଦୀ ଅଛନ୍ତି । ନିର୍ବାଚନ ଦୃଷ୍ଟିରୁ  ଦେଖିଲେ ରାମ ରହିମଙ୍କର ହରିଆଣାର  ସିର୍‌ସା, ଅମ୍ବାଲା, କୁରୁକ୍ଷେତ୍ର ଏବଂ ହିସାର  ଜିଲ୍ଲାରେ ବେଶ୍‌ ପ୍ରଭାବ ରହିଛି । ଏହି ୪  ଜିଲ୍ଲାରେ ୩୬ ବିଧାନସଭା ଆସନ ରହିଛି । ୨୦୨୪ ବର୍ଷ  ପାଇଁ ରାମ ରହିମଙ୍କର ୨୦ ଦିନ ପାରୋଲ ବାକି ଅଛି ।  ତେବେ ପାରୋଲବେଳେ ରାମ ରହିମ ଉତ୍ତର ପ୍ରଦେଶର  ବରନାବା ଆଶ୍ରମରେ ରହିବେ ବୋଲି କହିଛନ୍ତି।