ନୂଆଦିଲ୍ଲୀ ୦୯/୦୯: ନାସା ଦ୍ୱାରା ବିକଶିତ ଏକ ଅଭିନବ ଉପକରଣ ପ୍ରମାଣ କରିଛି ଯେ ମଙ୍ଗଳ ଗ୍ରହରେ ଅମ୍ଳଜାନ ଉତ୍ପନ୍ନ ସମ୍ଭବ । ମାର୍ସ ଅକ୍ସିଜେନ୍ ଇନ୍-ସିଟୁ ରିସୋର୍ସ ୟୁଟିଲାଇଜେସନ୍ ଏକ୍ସପେରିମେଣ୍ଟ (ମକ୍ସି) ମଙ୍ଗଳ ଗ୍ରହରେ ସଫଳତାପୂର୍ବକ ନିଜର କାର୍ଯ୍ୟକଳାପ ଶେଷ କରିଛି । ଏହା ଲାଲ୍ ଗ୍ରହରେ ଭବିଷ୍ୟତ ମହାକାଶଚାରୀଙ୍କ ପାଇଁ ଏକ ବ୍ୟବହାରଯୋଗ୍ୟ ଟେକ୍ନୋଲୋଜି ହୋଇପାରିବ ବୋଲି ପ୍ରମାଣ ମଧ୍ୟ ଦେଇଛି । ମାଇକ୍ରୋୱେଭ୍ ଓଭନ୍ ଆକାର ଭଳି ମକ୍ସି ନାସାର ପର୍ସିଭିୟରାନ୍ସ ରୋଭର୍ରେ ଲାଗିଛି । ୨୦୨୧ ମସିହାରେ ରୋଭର୍ ମଙ୍ଗଳ ଗ୍ରହରେ ଅବତରଣ କରିବା ପରଠୁ ମକ୍ସି ଅମ୍ଳଜାନ ଉତ୍ପନ୍ନ କରିଆସୁଛି । ଅଦ୍ୟାବଧି ୧୨୨ ଗ୍ରାମ୍ର ଅମ୍ଳଜାନ ଉତ୍ପନ୍ନ କରି ଆଶାଠୁ ଅଧିକ ଫଳ ପ୍ରଦାନ କରିଛି । ଏହି ଉପକରଣରୁ ନେଇ ନାସା ଯେତିକି ଆଶା କରିଥିଲା, ତା’ଠୁ ଏହା ଦୁଇ ଗୁଣ ଅଧିକ ଅମ୍ଳଜାନ ଉତ୍ପନ୍ନ କରିଛି । ମକ୍ସି ଉତ୍ପନ୍ନ କରିଥିବା ଅମ୍ଳଜାନ ୯୮ ପ୍ରତିଶତ ଶୁଦ୍ଧ, ଯାହା ଉଭୟ ଇନ୍ଧନ ଓ ଶ୍ୱାସକ୍ରିୟା ଲାଗି ଉପଯୁକ୍ତ ବୋଲି ନାସା କହିଛି ।
ମକ୍ସି ମଙ୍ଗଳର ପତଳା ବାୟୁମଣ୍ଡଳରେ ମହଜୁଦ ଅଙ୍ଗାରକାମ୍ଳର ପ୍ରତ୍ୟେକ କଣିକାରୁ ଅମ୍ଳଜାନ ପରମାଣୁକୁ ଅଲଗା କରିବାକୁ ଇଲେକ୍ଟ୍ରୋକେମିକାଲ ପ୍ରକ୍ରିୟା ପ୍ରୟୋଗ କରେ । ଏହା ଦ୍ୱାରା ଉତ୍ପନ୍ନ ଅମ୍ଳଜାନର ଶୁଦ୍ଧତା ଓ ପରିମାଣକୁ ଯାଞ୍ଚ୍ କରିବା ଲାଗି ଗ୍ୟାସ୍ଗୁଡ଼ିକୁ ବିଶ୍ଳେଷଣ କରାଯାଏ । ନାସା ଅନୁସାରେ, ମକ୍ସିର ସଫଳତା ବର୍ତ୍ତମାନ ଲାଲ୍ ଗ୍ରହରେ ଭବିଷ୍ୟତ ମାନବ ଅନ୍ୱେଷଣ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ମଙ୍ଗଳ ପୃଷ୍ଠରେ ଦେଖାଯାଉଥିବା ଉପକରଣଗୁଡ଼ିକୁ ପ୍ରୟୋଗ କରି ସେଠାରେ ବଞ୍ଚିବାରେ ଏହି ଟେକ୍ନୋଲୋଜି ମହାକାଶଚାରୀଙ୍କୁ ସକ୍ଷମ କରିବ । ଇନ୍-ସିଟୁ ରିସୋର୍ସ ୟୁଟିଲାଇଜେସନ୍ (ଇସ୍ରୁ) ନାମରେ ପରିଚିତ ଏହି ଅବଧାରଣା ଏବେ ଅନୁସନ୍ଧାନର ଏକ ବୃଦ୍ଧି ପାଉଥିବା କ୍ଷେତ୍ର ହୋଇଛି ।
ପରବର୍ତ୍ତୀ ସୋପାନ ହେଉଛି ଏକ ପୂର୍ଣ୍ଣାଙ୍ଗ ପଦ୍ଧତି ବିକଶିତ କରିବା, ଯେଉଁଥିରେ ମକ୍ସି ଭଳି ଏକ ଅମ୍ଳଜାନ ଜେନେରେଟର ରହିବ ଏବଂ ଉକ୍ତ ଅମ୍ଳଜାନକୁ ତରଳ ଓ ସଂରକ୍ଷଣ କରିବାର ମାର୍ଗ ଅନ୍ୱେଷଣ କରିବ ବୋଲି ନାସା କହିଛି । ମଙ୍ଗଳ ଗ୍ରହରେ ଅନ୍ୟ ଟେକ୍ନୋଲୋଜିଗୁଡ଼ିକୁ ବୈଧ କରିବା ଉପରେ ମଧ୍ୟ ଫୋକସ୍ ରହିଥିବା ଏଜେନ୍ସି ସ୍ପଷ୍ଟ କରିଛି ।
