ମୁମ୍ବାଇ, ୧୯।୬: ଅନ୍ୟ ସହରରୁ ଆସୁଥିବା ଲୋକଙ୍କ ପାଇଁ ମୁମ୍ବାଇ ଦେଶର ସବୁଠୁ ମହଙ୍ଗା ସହର । ମାନବ ସମ୍ବଳ କନ୍ସଲ୍ଟାନ୍ସି ମର୍ସର ପକ୍ଷରୁ ଜାରି ଏକ ସର୍ଭେରେ ଏହା ଉଲ୍ଲେଖ କରାଯାଇଛି । ମର୍ସର ଏହାର କଷ୍ଟ୍ ଅଫ୍ ଲିଭିଂ-୨୦୨୪ର ସର୍ଭେ ରିପୋର୍ଟରେ ଏହା ପ୍ରକାଶ କରିଛି । ମୁମ୍ବାଇରେ ପର୍ସନାଲ କେୟାର୍, ବିଜୁଳି, ୟୁଟିଲିଟି, ପରିବହନ ଏବଂ ଭଡ଼ା ଘର ଅନେକ ମାତ୍ରାରେ ମହଙ୍ଗା ବୋଲି ରିପୋର୍ଟରେ ଉଲ୍ଲେଖ କରାଯାଇଛି ।
ରିପୋର୍ଟରେ ଆହୁରି କୁହାଯାଇଛି ଯେ, ଦେଶର ସବୁଠୁ ମହଙ୍ଗା ସହର ମଧ୍ୟରେ ମୁମ୍ବାଇ ସହିତ ନୂଆଦିଲ୍ଲୀ ଏବଂ ବେଙ୍ଗାଲୁରୁ ସାମିଲ ଅଛି । ଏ ବର୍ଷ ମୁମ୍ବାଇ ଏହି ତାଲିକାରେ ୧୧ଟି ସ୍ଥାନ ଉପରକୁ ଉଠିଯାଇଛି । ବିଶ୍ୱ ସ୍ତରରେ କଷ୍ଟ୍ ଅଫ୍ ଲିଭିଂ ସର୍ଭେରେ ଶୀର୍ଷ ୫ ସହର ର୍ୟାଙ୍କିଙ୍ଗ୍ରେ କୌଣସି ପରିବର୍ତ୍ତନ ହୋଇନାହିଁ । ହଂକଂ ବିଶ୍ୱର ସବୁଠୁ ମହଙ୍ଗା ସହର ଭାବେ ଶୀର୍ଷ ସ୍ଥାନରେ ସ୍ଥିର ରହିଛି । ଏହା ପରେ ସିଙ୍ଗାପୁର, ଜ୍ୟୁରିଚ୍, ଜେନେଭା, ବେସଲ, ବର୍ଣ୍ଣ, ନ୍ୟୁୟର୍କ ସିଟି, ଲଣ୍ଡନ, ନାସାଉ ଏବଂ ଲସ୍ ଏଞ୍ଜେଲସ୍ ରହିଛି । ମୁମ୍ବାଇରେ ଘର ଭଡ଼ାରେ ୬ରୁ୮% ବୃଦ୍ଧି ଘଟିଛି । ଦିଲ୍ଲୀରେ ଏହା ୧୨ରୁ ୧୫% ବଢ଼ିଛି । ବେଙ୍ଗାଲୁରୁ, ପୁଣେ ଏବଂ ଚେନ୍ନାଇରେ ବି ଏହି ଟ୍ରେଣ୍ଡ ରହିଛି । ବିଜୁଳି ଖର୍ଚ୍ଚ ଦେଖିଲେ ମୁମ୍ବାଇ-ପୁଣେ ସବୁଠୁ ମହଙ୍ଗା ସହର । ମୁମ୍ବାଇ-ବେଙ୍ଗାଲୁରୁରେ ପରିବହନ ଖର୍ଚ୍ଚ ସବୁଠୁ ଅଧିକ ଥିବା ରିପୋର୍ଟରେ ଉଲ୍ଲେଖ କରାଯାଇଛି ।