ନୂଆଦିଲ୍ଲୀ: ହିମାଚଳ ପ୍ରଦେଶର ୩ ବିଧାନସଭା ଏବଂ ପଶ୍ଚିମବଙ୍ଗର ଦୁଇଟି ବିଧାନସଭା ଆସନରେ ହେବାକୁ ଥିବା ଉପ-ନିର୍ବାଚନ ପାଇଁ କଂଗ୍ରେସ ଏହାର ପ୍ରାର୍ଥୀଙ୍କ ନାମ ଘୋଷଣା କରିଛି । ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ପତ୍ନୀ କମଲେଶ ଠାକୁରଙ୍କୁ ମଧ୍ୟ କଂଗ୍ରେସ ଟିକେଟ ଦେଇଛି। ସେ କଂଗ୍ରେସ ପ୍ରାର୍ଥୀ ଭାବରେ ଦେହରା ବିଧାନସଭା ଆସନରୁ ଉପ-ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ । ଏହାପୂର୍ବରୁ ସେ ହମିରପୁର ଲୋକସଭା ଆସନରୁ ନିର୍ବାଚନ ଲଢିବା ପାଇଁ ପ୍ରସ୍ତୁତି ଚାଲିଥିଲା କିନ୍ତୁ ସେତେବେଳେ କଂଗ୍ରେସ ତାଙ୍କୁ ପ୍ରାର୍ଥୀ କରିନଥିଲା।

କମଲେଶ ଠାକୁର ଦେହରା ନିକଟ ଜସୱାନ ପ୍ରଗପୁରର ବାସିନ୍ଦା । ଯାହା ତାଙ୍କ ପ୍ରାର୍ଥୀତ୍ୱର କାରଣ ହୋଇପାରେ ବୋଲି କୁହାଯାଉଛି । ଯଦିଓ ସେ ନିର୍ବାଚନ ରାଜନୀତିରେ ନୂଆ, ତଥାପି ତାଙ୍କ ସ୍ବାମୀ ମୁଖ୍ୟମନ୍ତ୍ରୀ ହେବା ପରଠାରୁ ତାଙ୍କ ସହ ବିଭିନ୍ନ ରାଜନୈତିକ କାର୍ଯ୍ୟକଳାପରେ ସକ୍ରିୟ ଅଛନ୍ତି। ଏହାପୂର୍ବରୁ ସେ ହମିରପୁର ଲୋକସଭା ଆସନରୁ ନିର୍ବାଚନ ଲଢିବେ ବୋଲି ଅନୁମାନ କରାଯାଉଥିଲା।

ଜୁଲାଇ ୧୦ ରେ ହିମାଚଳ ପ୍ରଦେଶର ତିନୋଟି ବିଧାନସଭା ନିର୍ବାଚନମଣ୍ଡଳୀ ହାମିରପୁର, ନାଲାଗଡ ଏବଂ ଦେହରେ ଉପ-ନିର୍ବାଚନ ଅନୁଷ୍ଠିତ ହେବ । ଏଥିପାଇଁ ଉଭୟ ବିଜେପି ଏବଂ କଂଗ୍ରେସ ଦଳ ପୂର୍ଣ୍ଣ ଶକ୍ତି ସହ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି । ବର୍ତ୍ତମାନ ହିମାଚଳରେ କଂଗ୍ରେସ ସରକାର ଅଛନ୍ତି ।

ସେପଟେ କଂଗ୍ରେସ ପଶ୍ଚିମବଙ୍ଗର ରାଇଗଞ୍ଜରୁ ମୋହିତ ସେନଗୁପ୍ତା ଏବଂ ବଗଡାରୁ ଅଶୋକ ହାଲଡରଙ୍କୁ ମୈଦାନକୁ ଓହ୍ଲାଇଛି । କଂଗ୍ରେସର ସାଧାରଣ ସମ୍ପାଦକ କେ.ସି ବେଣୁଗୋପାଳଙ୍କ ଦ୍ବାରା ପ୍ରକାଶିତ ତାଲିକାରେ କୁହାଯାଇଛି ଯେ ଦଳର ସଭାପତି ମଲ୍ଲିକାର୍ଜୁନ ଖଡଗେ ଏହି ତିନୋଟି ନାମରେ ମୋହର ଲଗାଇଛନ୍ତି ।