କୋଲକାତା: ଦୁର୍ନୀତି ମାମଲାରେ ଆରଜି କର ମେଡିକାଲ କଲେଜ ଓ ହସ୍ପିଟାଲର ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷଙ୍କୁ ଗିରଫ କରିଛି ସିବିଆଇ । ଘୋଷଙ୍କ କାର୍ଯ୍ୟାକାଳ ସମୟରେ ହସ୍ପିଟାଲରେ ହୋଇଥିବା ଆର୍ଥିକ ଅନିୟମିତତା ଅଭିଯୋଗକୁ ନେଇ ମାମଲା ରୁଜୁ କରିଥିଲା ସିବିଆଇ । ଏଥିରେ ସନ୍ଦୀପ ଘୋଷଙ୍କ ନାଁ ମଧ୍ୟ ସାମିଲ ଥିଲା । ୧୫ ଦିନ ହେଲା ସନ୍ଦୀପ ଘୋଷଙ୍କୁ ପଚରା ଉଚରା କରିବା ପରେ ଶେଷରେ ତାଙ୍କୁ ସିବିଆଇ ଗିରଫ କରିଛି । 

ଅଗଷ୍ଟ ୯ରେ ମେଡିକାଲ କଲେଜରେ ୩୧ ବର୍ଷୀୟା ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ମଧ୍ୟ ତାଙ୍କୁ ଜେରା କରିଛି ସିବିଆଇ । ପ୍ରଥମେ ସଲ୍ଟ ଲେକ୍‌ରେ ଥିବା କାର୍ଯ୍ୟାଳୟ ଏବଂ ପରେ ଏଜେନ୍ସିର ଦୁର୍ନୀତି ବିରୋଧୀ  ଶାଖାର କାର୍ଯ୍ୟାଳୟକୁ ସନ୍ଦୀପ ଘୋଷଙ୍କୁ ନିଆଯାଇଥିଲା ।  କୋଲକାତା ହାଇକୋର୍ଟଙ୍କ ନିର୍ଦ୍ଦେଶାନୁସାରେ ମାମଲା ରୁଜୁ କରିଥିବା ସିବିଆଇ ସନ୍ଦୀପ ଘୋଷଙ୍କ ସମେତ ଦୁଇଟି କମ୍ପାନିକୁ ଦୋଷୀ ଭାବରେ ଦର୍ଶାଇଥିଲା । 

କେନ୍ଦ୍ରୀୟ ଏଜେନ୍ସି ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ଛାନଭିନ ମଧ୍ୟ କରୁଛି । ସେପଟେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପୂର୍ବତନ  ଅଧ୍ୟକ୍ଷ ସନ୍ଦୀପ ଘୋଷଙ୍କ କାର୍ଯ୍ୟକାଳ ସମୟରେ ମେଡିକାଲ କଲେଜ ଓ ହସ୍ପିଟାଲରେ ହୋଇଥିବା ମନି ଲଣ୍ଡରିଂ ମାମଲାର ତଦନ୍ତ କରୁଛି ।  ତେବେ ଭାରତୀୟ ମେଡିକାଲ ସଂଘ ସନ୍ଦୀପ ଘୋଷଙ୍କ ସଦସ୍ୟତା ରଦ୍ଦ କରିଛି ।