ରାଞ୍ଚି: ହେମନ୍ତ ସୋରେନଙ୍କ ନେତୃତ୍ବାଧୀନ ଝାଡ଼ଖଣ୍ଡ ସରକାର ସୋମବାର ବିଧାନସଭାରେ ଫ୍ଲୋର ଟେଷ୍ଟ ପାସ୍ କରିଛନ୍ତି । ଆଉ ଏବେ ସୋରେନଙ୍କ ମନ୍ତ୍ରିମଣ୍ଡଳ ବିସ୍ତାର ହୋଇଛି । ରାଜ୍ୟପାଳ ସିପି ରାଧାକୃଷ୍ଣନ ରାଜବନରେ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନଙ୍କୁ ମନ୍ତ୍ରୀ ପଦ ମିଳିଛି । କିନ୍ତୁ ହେମନ୍ତ ସୋରେନଙ୍କ ଭାଇ ବସନ୍ତ ସୋରେନଙ୍କୁ ମନ୍ତ୍ରିମଣ୍ଡଳରେ ସ୍ଥାନ ମିଳିନାହିଁ ।
ନୂଆ ମନ୍ତ୍ରିମଣ୍ଡଳରେ ଜେଏମଏମ ନେତା ଦୀପକ ବିରୁଆ, ହଫିଜୁଲ ହସନ ଅନସାରୀ, ବେବି ଦେବୀ, ମିଥିଲେଶ ଠାକୁର, ବୈଦ୍ୟନାଥ ରାମଙ୍କୁ ସ୍ଥାନ ମିଳିଛି । ବୈଦ୍ୟନାଥ ରାମଙ୍କ ବ୍ୟତୀତ ଅନ୍ୟମାନେ ହେମନ୍ତ ଓ ଚମ୍ପା ସୋରେନଙ୍କ ସରକାରରେ ମନ୍ତ୍ରୀ ପଦ ପାଇଥିଲେ । ସେପଟେ ଆରଜେଡିରୁ ସତ୍ୟାନନ୍ଦ ଭୋକ୍ତା ମନ୍ତ୍ରୀ ହୋଇଛନ୍ତି । ଏହା ପୂର୍ବରୁ ଆଜି ବିଧାନସଭାରେ ଝାଡ଼ଖଣ୍ଡର ମେଣ୍ଟ ସରକାର ଆସ୍ଥା ଭୋଟ୍ରେ ବିଜୟୀ ହୋଇଥିଲା ।
୮୧ ସଦସ୍ୟ ବିଶିଷ୍ଟ ଝାଡ଼ଖଣ୍ଡ ବିଧାନସଭାରେ ୪୫ ବିଧାୟକ ହେମନ୍ତ ସୋରେନଙ୍କ ସପକ୍ଷରେ ଭୋଟ ଦେଇଥିଲେ । ସେପଟେ ଭାରତୀୟ ଜନତା ପାର୍ଟ ଏବଂ ଅଖିଳ ଝାଡ଼ଖଣ୍ଡ ଛାତ୍ର ସଂଘର ବିଧାୟକମାନେ ଭୋଟ ଗଣତି ଆରମ୍ଭ ହେବା ପରେ ଗୃହ ତ୍ୟାଗ କରିଥିଲେ । ବିଜେପି ନେତୃତ୍ବାଧୀନ ବିରୋଧୀ ଦଳ ପାଖରେ ବିଜେପିର ୨୪ ଏବଂ ଅଖିଳ ଝାଡଖଣ୍ଡ ଛାତ୍ର ସଂଘର ୩ ଜଣ ବିଧାୟକ ରହିଛନ୍ତି ।