ଗୁଣପୁର,୦୫/୦୯: ସାଥୀ ମାଈ ହାତୀର ମୃତ୍ୟୁ ପରେ ଦନ୍ତା ହାତୀର ଉତ୍ପାତ । ବୁଧବାର ବିଳମ୍ବିତ ରାତିରେ ଏକ ବିଦ୍ୟୁତ ଖୁଣ୍ଟ ଓ ନଳକୂଅ ଭାଙ୍ଗିବା ସହ ପାଖ କପାବାଡ଼ରେ କପା ଗଛକୁ ନଷ୍ଟ କରିଛି ଦନ୍ତା । ଏହି କାରଣରୁ ଦୁଇ ଦିନ ଧରି ଗ୍ରାମାଞ୍ଚଳରେ ବିଦ୍ୟୁତ୍ ସେବା ବନ୍ଦ ରହିଥିବା ଜଣାପଡିଛି । ରାୟଗଡ଼ା ଜିଲ୍ଲା ଗୁଣପୁର ରେଞ୍ଜ ଫୁଲଫୁଟି ପୋଲ ନିକଟରେ ଥିବା କପାବଡ଼ରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ମୁତାବକ, ବୁଧବାର ଫୁଲଫୁଟି ପୋଲ ନିକଟରେ ଏକ ମାଈ ହାତୀର ମୃତଦେହ ମିଳିଥିଲା । ଏହି ହାତୀଟି ବିଦ୍ୟୁତ ଆଘାତରେ ପ୍ରାଣ ହରାଇଥିଲା । ତେବେ ମାଈ ହାତୀର ମତ୍ୟୁ ପରେ ଏକା ହୋଇଯାଇଛି ତା’ସହ ଥିବା ଦନ୍ତା ହାତୀ ।  ମାଈ ହାତୀକୁ ଏଣେତେଣେ ଖୋଜି ବୁଲୁଛି ଦନ୍ତା । ସାଥିକୁ ନପାଇ ସ୍ଥାନୀୟବାସିନ୍ଦାଙ୍କୁ କରିଛି ନାକେଦମ୍‌ । ଏହି ଦନ୍ତା ହାତୀଟି ଗାଁ ପାହାଡରେ ରହୁଥିବା ବେଳେ ବୁଧବାର ବିଳମ୍ବିତ ରାତିରେ ଏକ ବିଦ୍ୟୁତ୍ ଖୁଣ୍ଟ ଓ ନଳକୂଅ ଭାଙ୍ଗିବା ସହ କପାବାଡ଼ରେ କପା ଗଛକୁ ନଷ୍ଟ କରି ସେଠାରେ ଥିବା କୁଡିଆ ମଧ୍ୟ ଭାଙ୍ଗି ଦେଇଛି । ମାଈ ହାତୀର ମୃତ୍ୟୁ ପୂର୍ବରୁ ଉଭୟ ହାତୀ ମିଶି କପାବାଡ଼ରେ ଥିବା କୁଡିଆ ଓ ବିଦ୍ୟୁତ୍ ଖୁଣ୍ଟକୁ ଭାଙ୍ଗିଥିଲେ ।  ଫଳରେ ବିଦ୍ୟୁତ ଆଘାତରେ ମାଈ ହାତୀର ମୃତ୍ୟୁ ହୋଇଥିଲା । ବାରମ୍ବାର ବିଦ୍ୟୁତ ଖୁଣ୍ଟ ଭାଙ୍ଗିବା କାରଣରୁ ଦୁଇ ଦିନ ଧରି ଗ୍ରାମାଞ୍ଚଳରେ ବିଦ୍ୟୁତ୍ ସେବା ବନ୍ଦ ରହିଥିବା ଜଣାପଡିଛି । ଏନେଇ ସ୍ଥାନୀୟଲୋକେ ବନ ବିଭାଗର କର୍ମଚାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବନ ବିଭାଗର କର୍ମଚାରୀ ପହଞ୍ଚିଛନ୍ତି । ସେଠାରେ ପହଞ୍ଚି ହାତୀର ଉପଦ୍ରବ ଦେଖି ତାର ଗତି ବିଧି ଉପରେ ନଜର ରଖିଛି ବନ ବିଭାଗ ।