ବାଲେଶ୍ୱର, ୧୮/୬: ବାଲେଶ୍ୱରରେ ଦୁଇ ସମ୍ପ୍ରଦାୟ ଭିତରେ ସୃଷ୍ଟି ହୋଇଥିବା ଉତ୍ତେଜନା ଏବେ ଉଗ୍ର ରୂପ ନେଇଛି । ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ମଙ୍ଗଳବାର ବିଳମ୍ବିତ ରାତିରେ ବାଲେଶ୍ୱର ମୁନିସିପାଲିଟି ଅଞ୍ଚଳରେ କର୍ଫ୍ୟୁ ଜାରି କରାଯାଇଛି । ତେବେ ଏହି କର୍ଫ୍ୟୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବଲବତ୍ତର ରହିବ । ଏହି ସମୟରେ ଆଇନ ଶୃଙ୍ଖଳା ମାନିବା ସହ ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ବାଲେଶ୍ୱରବାସୀଙ୍କୁ ଏସପି ସାଗରିକା ନାଥ ନିବେଦନ କରିଛନ୍ତି । 

ଏହି ପରିପ୍ରେକ୍ଷୀରେ ବୁଧବାର ସକାଳେ ଟାଉନ ଥାନାରେ ଶ୍ରୀମତୀ ନାଥ ଏକ ସାମ୍ବାଦିକ ସମ୍ମିଳନୀର ଆୟୋଜନ କରିଥିଲେ । ଗଣମାଧ୍ୟମ ପ୍ରତିନିଧିନିଙ୍କୁ ସୂଚନା ଦେଇ ସେ କହିଥିଲେ ଯେ, ବର୍ତ୍ତମାନ ସୁଦ୍ଧା ବାଲେଶ୍ୱରରେ ପରିସ୍ଥିତି ନିୟନ୍ତ୍ରଣାଧୀନ ରହିଛି । ପରିସ୍ଥିତି ପ୍ରତି ତୀକ୍ଷ୍ଣ ଦୃଷ୍ଟି ଦିଆଯାଉଛି । ଉଭୟ ପକ୍ଷରୁ ଏଯାଏଁ ୭ଟି ଏଫଆଇଆର ପଞ୍ଜିକରଣ କରାଯାଇଛି । ଅଭିଯୋଗ ମୁତାବକ, ୩୪ ଜଣଙ୍କୁ ଅଟକ ରଖାଯାଇ ପଚରାଉଚରା ଜାରି ରହିଛି । ବିଭିନ୍ନ ସ୍ଥାନରେ ୪୦ ପ୍ଲାଟୁନ୍ ପୁଲିସ ମୁତୟନ କରାଯାଇଛି ବୋଲି ସେ ସୂଚନା ଦେଇଥିଲେ । ସେ ଆହୁରି କହିଥିଲେ ପରିସ୍ଥିତିକୁ ଦୃଷ୍ଟିରେ ରଖି ବୁଧବାର ଅପରାହ୍ଣରୁ ଇଣ୍ଟରନେଟ୍ ସୁବିଧାକୁ ବନ୍ଦ କରାଯିବ । ମାତ୍ର ସମସ୍ତ ଜରୁରୀ ସେବା ଉପଲବ୍ଧ ରହିବ । ତେବେ ପରିସ୍ଥିତିକୁ ଶାନ୍ତ କରିବା ପାଇଁ ଉଭୟ ସମ୍ପ୍ରଦାୟର ଲୋକଙ୍କୁ ଡାକି ଶାନ୍ତି କମିଟି ବସିବାର ଆୟୋଜନ କରାଯିବ । ଏଭଳି ସମୟରେ ବାଲେଶ୍ୱରବାସୀ ସହଯୋଗର ହାତ ବଢ଼ାଇବା ପାଇଁ ସେ ନିବେଦନ କରିଥିଲେ ।