ଭୁବନେଶ୍ଵର, ୦୪/୦୯ : ଶଙ୍ଖ ଭବନରେ ବିଜୁ ମହିଳା ଦଳ ସମ୍ମିଳନୀ ଅନୁଷ୍ଠିତ ହୋଇଛି। ଏହି ସମ୍ମିଳନୀରେ ବିଜେଡି ସଭାପତି ନବୀନ ପଟ୍ଟନାୟକ ଯୋଗ ଦେଇ କହିଛନ୍ତି ଯେ, ମା'ମାନଙ୍କ ବିଶ୍ଵାସ ସହ ବିଜେପି ଖେଳିବା ଉଚିତ୍ ନୁହେଁ। ମା'ମାନେ ଏହାର ଉଚିତ୍ ଜବାବ ଦେବେ। ବିଜୁ ବାବୁ ସାରା ଦେଶରେ ମହିଳା ସଶକ୍ତିକରଣର ମୂଳଦୁଆ ପକାଇଥିଲେ। ବିଜୁ ଜନତା ଦଳ ମା'ମାନଙ୍କର ସ୍ଵର ହୋଇ ରହିଛି ଓ ରହିବ। 

ନବୀନ କହିଛନ୍ତି ଯେ, ବିଜୁ ଜନତା ଦଳ ସବୁବେଳେ ମା' ମାନଙ୍କ ସାଥିରେ ଅଛି। ମା' ମାନଙ୍କ ପାଇଁ କାମ କାରୁଛି। ମା' ମାନଙ୍କୁ ସାମାଜିକ କିମ୍ଵା ଅର୍ଥିକ ସଶକ୍ତିକରଣ ପାଇଁ ବିଜେଡି ସବୁବେଳେ ଆଗରେ। ବିଜୁ ବାବୁ ସାରା ଦେଶର ମା' ମାନଙ୍କର ସଶକ୍ତିକରଣର ମୂଳଦୁଆ ଦେଇଥିଲେ। ମିଶନ ଶକ୍ତି କାର୍ଯ୍ୟକ୍ରମରେ ୭୦ ଲକ୍ଷ ମା'ମାନଙ୍କୁ ଏକାଠି କରାଯାଇଛି। ଏସଏଚଜିରୁ ସେମାନେ ଉଦ୍ୟୋଗୀ ହୋଇପାରିଛନ୍ତି। 

ନବୀନ ପୁଣି କହିଛନ୍ତି ଯେ, ମିଛ ହେଉଛି ବିଜେପିର ସବୁଠାରୁ ବଡ଼ ପରିଚୟ। ସୁଭଦ୍ରା ଯୋଜନା ହେଉ ବା ୩୦୦ ୟୁନିଟ୍ ମାଗଣା ବିଜୁଳି ବିଜେପିର ମିଛ ବିଷୟରେ ସମସ୍ତେ ଜାଣନ୍ତି। ଦୁଇ ବର୍ଷରେ ପଚାଶ ହଜାର ଦେବେ ବୋଲି କହିଥିଲେ। ଏବେ କହୁଛନ୍ତି ପାଞ୍ଚ ବର୍ଷରେ ଦେବେ। ତାହା ପୁଣି ୬ ମାସରେ ମାତ୍ର ୫ ହଜାର ଟଙ୍କା। ସବୁ ମହିଳାଙ୍କୁ ସୁଭଦ୍ରା ଅର୍ଥ ଦେବେ ବୋଲି କରିଥିଲେ ଏବେ କିନ୍ତୁ ଅଳ୍ପ କିଛି ମା ମାନଙ୍କୁ ଦେଉଛନ୍ତି। ଗତ ନିର୍ବାଚନରେ ବିଜେପିର ବଡ଼ ବଡ଼ ନେତା ସାରା ଦେଶକୁ ଆସି ବହୁତ ବଡ଼ ବଡ଼ କଥା କହିଲେ। ହେଲେ କାମ ଜିରୋ। ମହିଳାମାନଙ୍କ ବିଶ୍ଵାସକୁ ନେଇ ବିଜେପି ଖେଳିବା ଉଚିତ୍ ନୁହେଁ। ସାଧାରଣ ଲୋକଙ୍କ ବିଶ୍ଵାସ ସହ ଖେଳିବା ଉଚିତ୍ ନୁହେଁ। ମା ମାନେ ବହୁତ ସଚେତନ। ସେମାନେ ଏହାର ଜବାବ ଦେବେ।