ନୂଆଦିଲ୍ଲୀ: ବିହାରରେ ଏବେ ୭୫ ପ୍ରତିଶତ ସଂରକ୍ଷଣର ଲାଭ ମିଳିବ । ବିହାରର ନୀତୀଶ କୁମାର ସରକାର ଏ ସମ୍ପର୍କରେ ଏକ ଗେଜେଟ୍ ପ୍ରକାଶ କରିଛନ୍ତି । ଏହାର ଅର୍ଥ ହେଉଛି, ବର୍ତ୍ତମାନଠାରୁ ଅନୁସୂଚିତ ଜାତି / ଜନଜାତି, ଇବିସି ଏବଂ ଓବିସି ମାନଙ୍କୁ ଶିକ୍ଷାନୁଷ୍ଠାନ ଏବଂ ଚାକିରିରେ ୭୫ ପ୍ରତିଶତ ସଂରକ୍ଷଣର ଲାଭ ମିଳିବ । ଆଜି (ମଙ୍ଗଳବାର, ୨୧ ନଭେମ୍ବର) ଠାରୁ ଏହା କାର୍ଯ୍ୟକାରୀ କରାଯାଇଛି । ବିହାର ସରକାର ସଂରକ୍ଷଣ ସୀମାକୁ ୧୫ ପ୍ରତିଶତ ବୃଦ୍ଧି କରିଛନ୍ତି । 

ସୂଚନାଥାଉକି, ବିହାର ସରକାର ବିଧାନସଭାର ଶୀତକାଳୀନ ଅଧିବେଶନରେ ସଂରକ୍ଷଣ ସଂଶୋଧନ ବିଲ୍ ୨୦୨୩ ଉପସ୍ଥାପନ କରିଥିଲେ । ନଭେମ୍ବର ୯ ରେ ଏହା ଉଭୟ ଗୃହ ଦ୍ୱାରା ପାସ ହୋଇଥିଲା । ଏଥିରେ ସଂରକ୍ଷଣର ପରିସରକୁ ୭୫ ପ୍ରତିଶତକୁ ବୃଦ୍ଧି କରିବାର ବ୍ୟବସ୍ଥା ଥିଲା । ତେବେ ରାଜ୍ୟର ମୁଖ୍ୟ ବିରୋଧୀ ଦଳ ବିଜେପି ମଧ୍ୟ ଏହି ବିଲ୍କୁ ସମର୍ଥନ କରିଥିଲା । ଦିଲ୍ଲୀରୁ ଫେରିବା ମାତ୍ରେ ରାଜ୍ୟପାଳ ରାଜେନ୍ଦ୍ର ଆର୍ଲେକର ସଂରକ୍ଷଣ ବିଲ୍ -୨୦୨୩ କୁ ଅନୁମୋଦନ ଦେଇଥିଲେ ।

ମୁଖ୍ୟମନ୍ତ୍ରୀ ନୀତିଶ କୁମାର ନଭେମ୍ବର ୭ରେ ଘୋଷଣା କରିଥିଲେ ଯେ, ବିହାରରେ ସଂରକ୍ଷଣ ପରିସର ବିସ୍ତାର କରାଯିବ । ବିହାରରେ ୬୦ ପ୍ରତିଶତ ସଂରକ୍ଷଣ ବ୍ୟବସ୍ଥାକୁ ୭୫ ପ୍ରତିଶତକୁ ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ଘୋଷଣା କରିଥିଲେ । ଏହି ଘୋଷଣା ପରେ ନୀତୀଶ କୁମାର କ୍ୟାବିନେଟ ହଠାତ୍ ଏକ ବୈଠକ ଡାକିଥିଲେ । ଅଢେଇ ଘଣ୍ଟା ମଧ୍ୟରେ ସଂରକ୍ଷଣର ପରିସର ବଢାଇବାକୁ ପ୍ରସ୍ତାବକୁ କ୍ୟାବିନେଟ୍ ଅନୁମୋଦନ କରିଥିଲା । ଏହା ପରେ, ନଭେମ୍ବର ୯ ରେ ଉଭୟ ଗୃହ ଦ୍ୱାରା ଏହା ପାରିତ ହୋଇଥିଲା ।