ନୂଆଦିଲ୍ଲୀ ୦୮/୦୮: ଉତ୍ତରପ୍ରଦେଶରେ ପ୍ରତିବାଦର ଏକ ନିଆରା ଉପାୟ ଦେଖିବାକୁ ମିଳିଛି । ଏଠାରେ ଜଣେ ଗୁରୁ ନିଜର ଦାବି ପୂରଣ ଲାଗି ଯୋଗର ସାହାରା ନେଇଛନ୍ତି । ନିଜ ଗାଁରେ ବିକାଶର ଅଭାବ ବିରୋଧରେ ସେ ଯୋଗ ଜରିଆରେ ପ୍ରତିବାଦ କରୁଛନ୍ତି । ବଚ୍ଚା ବାବା ନାମରେ ସେ ଖୁବ୍ ଲୋକପ୍ରିୟ । ଫିରୋଜାବାଦର ତୁଣ୍ଡଲାଠାରୁ ୨୦ କିମି ଦୂର ଯମୁନା ତଟରେ ଅବସ୍ଥିତ ଗ୍ୱାରାଇ ଗାଁର ସେ ବାସିନ୍ଦା ।
ବଚ୍ଚା ବାବା ନିଜର ନିଆରା ପ୍ରତିବାଦ ସମ୍ପର୍କରେ କହିଛନ୍ତି, ତାଙ୍କ ଗାଁ ଓ ମନ୍ଦିର ସହରଠୁ ବହୁତ ଦୂରରେ ଅବସ୍ଥିତ । ଜନ ପ୍ରତିନିଧିମାନେ ଗାଁକୁ ଭୋଟ୍ ମାଗିବାକୁ ଆସୁଛନ୍ତି, କିନ୍ତୁ ଜିଲ୍ଲାର କୌଣସି ଜନ ପ୍ରତିନିଧି କିମ୍ବା ଅଧିକାରୀ ଗାଁର ଖରାପ ସ୍ଥିତି ଦେଖିବାକୁ ଆସୁନାହାନ୍ତି । ଗାଁରେ ଆଦୌ ବିକାଶ ହୋଇନାହିଁ । ଗାଁ ଭିତରେ ଗୋଟିଏ ବି ପକ୍କା ସଡ଼କ ନାହିଁ । ଷ୍ଟ୍ରିଟ୍ ଲାଇଟ୍ ନାହିଁ । ମନ୍ଦିର ଓ ଆଶ୍ରମଗୁଡ଼ିକର ପୁନରୁଦ୍ଧାର ମଧ୍ୟ କରାଯାଉ ନାହିଁ । ସ୍ଥାନୀୟ ଲୋକେ ଅନ୍ୟ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି । ସେଥିପାଇଁ ଏହାର ପ୍ରତିବାଦରେ ଗତ ୩ ବର୍ଷ ହେଲା ସେ ଗୋଟିଏ ଗୋଡ଼ରେ ଠିଆ ହୋଇ ହଠ ଯୋଗ କରୁଛନ୍ତି । ଗାଁର ବିକାଶ ଦାବି ପୂରଣ ନ ହେବା ପର୍ଯ୍ୟନ୍ତ ଏହି ପ୍ରତିବାଦ ଜାରି ରହିବ ବୋଲି ସେ କହିଛନ୍ତି ।
ଗାଁର ଜଣେ ବାସିନ୍ଦା ରଣ ସିଂହ ଧାକରେ କହିଛନ୍ତି, ବଚ୍ଚା ବାବା ଗାଁ ବାହାରେ ଏକ ମନ୍ଦିରରେ ଦୀର୍ଘ ବର୍ଷ ଧରି ରହୁଛନ୍ତି । ଏ ଅଞ୍ଚଳର ବିକାଶ, ଜନ ମଙ୍ଗଳ ଓ ଧାର୍ମିକ କାର୍ଯ୍ୟକ୍ରମ ପାଇଁ ସେ କାମ କରୁଛନ୍ତି । କିନ୍ତୁ ଗାଁରେ ବିକାଶ ନ ହେବାରୁ ରାଗରେ ସେ ୩ ବର୍ଷ ତଳେ ଗୋଟିଏ ଗୋଡ଼ରେ ଠିଆ ହୋଇ ହଠ ଯୋଗ ଆରମ୍ଭ କଲେ ।
