ପୁରୀ,୦୩/୦୮: କୋଟିକୋଟି ଭକ୍ତଙ୍କ  ଭାବାବେଗକୁ କୁଠାରାଘାତ । ଭାବଭକ୍ତିରେ ସେମାନେ  ଦେଇଥିବା ଚାଉଳ, ଗୁଆ, ନଡ଼ିଆ ମହାପ୍ରଭୁଙ୍କୁ ଅର୍ପଣ  ହେଲାନି । ମହାପ୍ରଭୁଙ୍କ ପାଇଁ ଆସିଥିବା ଅର୍ପଣ ଚାଉଳ  ଏବେ ଯିବ ଆଶ୍ରମକୁ । ଶ୍ରୀଜଗନ୍ନାଥଙ୍କ ନାମରେ  ରଥ ବୁଲାଇ ସଂଗ୍ରହ ହୋଇଥିଲା ଚାଉଳ, ଗୁଆ,  ନଡ଼ିଆ ଓ ଦାନଅର୍ଥ । ସାରା ରାଜ୍ୟରୁ ୧୪ ହଜାର କୁଇଣ୍ଟାଲ ଅର୍ପଣ ଚାଉଳ ଭକ୍ତ ଦେଇଥିଲେ । ସେଥିରୁ ୧୦ ହଜାର କୁଇଣ୍ଟାଲ ଚାଉଳ ନଷ୍ଟ  ହୋଇଗଲା । ଏବେ ଉକ୍ତ ଚାଉଳରୁ ମହାପ୍ରସାଦ  ପ୍ରସ୍ତୁତ ହେବନାହିଁ । ଏଣୁ ଏସବୁକୁ ଆଶ୍ରମ ତଥା  ଗରିବଙ୍କୁ ବାଣ୍ଟି ଦେବାକୁ ଯୋଜନା ହୋଇଛି ।  

ଶ୍ରୀମନ୍ଦିର ପରିକ୍ରମା ପ୍ରକଳ୍ପର ପ୍ରଚାର ପ୍ରସାର  ପାଇଁ ଶ୍ରୀଜଗନ୍ନାଥଙ୍କ ନାମରେ ଗାଁ ଗାଁରେ ବୁଲିଲା ଅର୍ପଣ  ରଥ । ସାରା ରାଜ୍ୟର କୋଟି କୋଟି ଜଗନ୍ନାଥପ୍ରେମୀ  ଏହି ରଥରେ ମହାପ୍ରଭୁଙ୍କ ନାଁରେ ସମର୍ପି ଦେଲେ  ଚାଉଳ, ଗୁଆ, ନଡ଼ିଆ । ଏହି ଚାଉଳରେ ଅବଢ଼ା  ପ୍ରସ୍ତୁତ ହେବ। ଭକ୍ତ ଏହି ମହାପ୍ରସାଦ ପାଇବେ ।  ଗୁଆ, ନଡ଼ିଆ ମଧ୍ୟ ମହାପ୍ରଭୁଙ୍କ ସେବାରେ ଲାଗିବ ।  ଏଭଳି ଅନେକ ଆଶା ଭକ୍ତଙ୍କୁ ଦିଆଯାଇଥିଲା । ବର୍ଷ  ତମାମ ବିଲରେ ଖଟି କରିଥିବା ଅମଳକୁ କିଏ  ମହାପ୍ରଭୁଙ୍କ ନାମରେ ଟେକିଦେଲା । ପୁଣି କିଏ ନିଜ  ପେଟରୁ କାଟି ବସ୍ତାବସ୍ତା ଚାଉଳ ଅର୍ପଣ ରଥରେ  ପଠେଇଥିଲେ । ଅବ୍ୟବସ୍ଥିତ ଭାବେ କୁଇଣ୍ଟାଲ  କୁଇଣ୍ଟାଲ ଚାଉଳ ପଡ଼ିପଡ଼ି ପୋକ ଖାଇଗଲା ।  

ଏଣୁ ଯଥାଶୀଘ୍ର ଏହାର ବିନିଯୋଗ କରିବାକୁ  ସୁଆର ମହାସୁଆର ନିଯୋଗ ପକ୍ଷରୁ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଅନୁରୋଧ କରାଯାଇଛି । ନିଯୋଗ ପକ୍ଷରୁ ଚାଉଳର ବ୍ୟବହାର ନେଇ ୩  ସୂତ୍ରୀ ପ୍ରସ୍ତାବ ଦିଆଯାଇଛି । ଚାଉଳ ଏତେ ଦିନ ରହିରହି ନଷ୍ଟ ହେଉଥିବାରୁ ଏହାକୁ ବିଭିନ୍ନ ଆଶ୍ରମ ଓ ଗରିବ ବ୍ୟକ୍ତିଙ୍କୁ ଦାନ କରିବାକୁ ନିଯୋଗ ପ୍ରଥମ ପ୍ରସ୍ତାବ ଦେଇଛି । ନଚେତ୍‌ ଏହି ଚାଉଳ ସବୁକୁ ପ୍ରୋସେସିଂ କରି ଅବଢ଼ା ରାନ୍ଧିବା ଉପଯୋଗୀ କରିବାକୁ ନିଯୋଗ କହିଛି । ତୃତୀୟରେ ଏହି ଦାନ ଚାଉଳକୁ ବଦଳାଇ ଅନ୍ୟ ଚାଉଳ ଆଣିବାକୁ ମଧ୍ୟ ନିଯୋଗ ପକ୍ଷରୁ ପ୍ରସ୍ତାବ ରଖାଯାଇଛି । 

ସୁଆର ମହାସୁଆର ନିଯୋଗ ସାଧାରଣ  ସଂପାଦକ ନାରାୟଣ ମହାସୁଆର କହିଛନ୍ତି,  ମହାପ୍ରଭୁଙ୍କ ପାଇଁ ପ୍ରସ୍ତୁତ ହେଉଥିବା ଅବଢ଼ା ଉଚ୍ଚମାନର ଚାଉଳରେ ପ୍ରସ୍ତୁତ ହୁଏ । ଚାଉଳରେ  ପୋକ ଲାଗିଲେ କିମ୍ବା ଫିମ୍ପି ମାରିଲେ ଏହା  ଅବଢ଼ା ରାନ୍ଧିବା ଉପଯୋଗୀ ହୋଇନଥାଏ।  ଏଣୁ ଅର୍ପଣ ଚାଉଳ ଯଦି ପ୍ରୋସେସିଂ ହୋଇ  ଆସେ, ଏହା ଅବଢ଼ା ହେବା ଉପଯୋଗୀ କି  ନୁହେଁ ପ୍ରଥମେ ଦେଖାଯିବ । ପ୍ରୋସେସିଂ ପରେ  ଚାଉଳ ସାଧାରଣତଃ ଅତ୍ୟନ୍ତ ସରୁ ଏବଂ ଗୁଣ୍ଡ  ହୋଇଯାଏ । ଯଦି ଏଭଳି ହୁଏ ସେଥିରେ ଅବଢ଼ା  ହୋଇପାରିବନାହିଁ । ଅର୍ପଣ ରଥରେ ଆସିଥିବା  ଅଧିକାଂଶ ଚାଉଳ ଦେଶୀ ଚାଉଳ ହୋଇଥିବାରୁ  ଏହା ଶୀଘ୍ର ନଷ୍ଟ ହୋଇଥାଇପାରେ ବୋଲି ସେ  ଆଶଙ୍କା କରିଛନ୍ତି । ଆଗାମୀ ବୈଠକରେ ଏହି  ଚାଉଳର ବିନିଯୋଗ ନେଇ ଚୂଡ଼ାନ୍ତ ନିଷ୍ପତ୍ତି  ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି ।  

ମିଳିଥିବା ସୂଚନାନୁସାରେ, ଅର୍ପଣ ରଥରେ  ମିଳିଥିବା ୧୪ ହଜାର କୁଇଣ୍ଟାଲ ଚାଉଳରୁ  ମାତ୍ର ୪ ହଜାର କୁଇଣ୍ଟାଲ ଚାଉଳରେ ଖେଚୁଡ଼ି  ଓ କାନିକା ପ୍ରସ୍ତୁତ କରାଯାଇ ଭକ୍ତଙ୍କୁ ବଣ୍ଟା  ଯାଇଛି । ଫେବ୍ରୁଆରୀ ୪ରୁ ଜୁନ୍‌ ୬ ପର୍ଯ୍ୟନ୍ତ  ସୁଆର ମହାସୁଆର ନିଯୋଗ ପକ୍ଷରୁ ଏହା ବଣ୍ଟା  ଯାଇଥିଲା । ଅର୍ପଣ ରଥରେ ଆସିଥିବା ଚାଉଳରେ  ଅନେକ ଉଷୁନା ଚାଉଳ ମଧ୍ୟ ଦେଇଥିଲେ । ଏକ  ସ୍ୱତନ୍ତ୍ର କମିଟି କରାଯାଇ ସେଥିରୁ ୧୪ ହଜାର  କୁଇଣ୍ଟାଲ ଅରୁଆ ଚାଉଳ ଅଲଗା କରାଯାଇଥିଲା ।  ଏହି ଚାଉଳ ସବୁକୁ ଗୁଣ୍ଡିଚା ମନ୍ଦିର, ଅକ୍ଷୟପାତ୍ର  ଫାଉଣ୍ଡେସନ ଏବଂ ଏଫ୍‌ସିଆଉ ଗୋଦାମରେ  ରଖାଯାଇଥିଲା । ରଥଯାତ୍ରା ପୂର୍ବରୁ ଗୁଣ୍ଡିଚା  ମନ୍ଦିରରୁ ସବୁ ଚାଉଳ ଖାଲି କରାଯାଇଥିଲା । ଏବେ  ସମସ୍ତ ବଳକା ଚାଉଳ ଅକ୍ଷୟପାତ୍ର ଫାଉଣ୍ଡେସନ  ଏବଂ ଏଫ୍‌ସିଆଇ ଗୋଦାମରେ ରହିଛି ।