ବେଙ୍ଗାଲୁରୁ: ମା’ର ଅଭିଯୋଗକୁ ପୋଲିସ ନରଖିବାରୁ ରାଗରେ ତହସିଲଦାରଙ୍କ କାର ଜାଳିଦେଇଛି ପୁଅ । କର୍ଣ୍ଣାଟକର ଚିତ୍ରଦୂର୍ଗାରେ ଘଟିଥିବା ଏହି ଘଟଣା ଏବେ ଦେଶରେ ଚାଞ୍ଚଲ୍ୟ ଖେଳାଇଦେଇଛି । ପୃଥ୍ବୀରାଜ ନାମକ ବ୍ୟକ୍ତି ଚାଲ୍ଲାକେରେ ତହସିଲ କାର୍ଯ୍ୟାଳୟ ପାଖରୁ ପେଟ୍ରୋଲ କିଣି ତହସିଲଦାରଙ୍କ ଗାଡ଼ିରେ ନିଆଁ ଲଗାଇ ଦେଇଥିବା ଜଣାପଡ଼ିଛି । ଏହା ପରେ ତହସିଲ କାର୍ଯ୍ୟାଳୟର କର୍ମଚାରୀ ନିଆଁ ଲିଭାଇବାକୁ ନାକେଦମ ହୋଇଛନ୍ତି । 

ସେପଟେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିବା ସହ ପୃଥ୍ବୀରାଜଙ୍କୁ ଗିରଫ କରିଛି । ସରକାରୀ ସଂପତ୍ତିକୁ କ୍ଷତି ପହଞ୍ଚାଇବା ଅଭିଯୋଗରେ ତାଙ୍କ ବିରୋଧରେ ମାମଲା ରୁଜୁ କରିଛି ପୋଲିସ । ଏହାରି ମଧ୍ୟରେ, ତହସିଲ କାର୍ଯ୍ୟାଳୟ କର୍ମଚାରୀ କର୍ତ୍ତବ୍ୟ ସମୟରେ ସୁରକ୍ଷା ଦରକାର ବୋଲି ଡିଏସପିଙ୍କ ପାଖରେ ଦାବି କରିଛନ୍ତି । 

ମିଳିଥିବା ସୂଚନା ଅନୂସାରେ, ବେଙ୍ଗାଲୁରୁର ଏକ ଘରୋଇ କମ୍ପାନିରେ କାର୍ଯ୍ୟ କରୁଥିବା ପୃଥ୍ବୀରାଜ ଗତ ଜୁଳାଇରେ ବୁଲିବାକୁ ଯାଇଥିବା ବେଳେ ନିଖୋଜ ହୋଇଯାଇଥିଲେ ।  ତାଙ୍କ ସହ ଯୋଗାଯୋଗ ହୋଇ ନପାରିବାରୁ ଜୁଲାଇ ୨ରେ ପୃଥ୍ବୀରାଜଙ୍କ ମା’ ଚାଲ୍ଲାକେରେ ଥାନାରେ ଅଭିଯୋଗ କରିବାକୁ ଯାଇଥିଲେ । କିନ୍ତୁ ତାଙ୍କର ଅଭିଯୋଗ ଗ୍ରହଣ କରିନଥିଲା ପୋଲିସ । ଏହା ପରେ ଜୁଲାଇ ୨୩ରେ ପୃଥ୍ବୀରାଜ ଥାନାରେ ପହଞ୍ଚି ସେ ଫେରିଆସିଥିବା ଜଣାଇଥିଲେ । ଏହା ପୂର୍ବରୁ ଅଗଷ୍ଟ ୧୪ରେ ବିଧାନ ସୌଧ ନିକଟରେ ଏକ ବାଇକ୍‌ରେ ନିଆଁ ଲଗାଇଥିବା ଅଭିଯୋଗରେ ପୃଥ୍ବୀରାଜଙ୍କ ବିରୋଧରେ ମାମଲା ରୁଜୁ କରିଥିଲା ପୋଲିସ ।