ଚେନ୍ନାଇ, ୬।୧୨: ଚେନ୍ନାଇ ସହର ଜଳମଗ୍ନ ହୋଇଯିବା ପରେ ଅନେକ ଲୋକ ବିଭିନ୍ନ ସ୍ଥାନରେ ଅଟକି ରହିଥିଲେ । ସେମାନଙ୍କ ମଧ୍ୟରେ ଥିଲେ ଅଭିନେତା ଆମିର ଖାନ୍ ଓ ତାମିଲ ଅଭିନେତା ବିଷ୍ଣୁ ବିଶାଲ । ବାତ୍ୟା ଯୋଗୁଁ ପ୍ରବଳ ବର୍ଷା ହେବା ଫଳରେ ସମଗ୍ର ସହର ଉବୁଟୁବୁ ହୋଇପଡିଥିଲା । ରାସ୍ତାରେ ଅଣ୍ଟାଏ ପାଣି ଚାଲୁଥିଲା । ଚେନ୍ନାଇର କରପକ୍କମ ଅଞ୍ଚଳରେ ନିଜ ଘର ଭିତରେ ଫସି ରହିଥିଲେ ବିଷ୍ଣୁ ବିଶାଲ ଓ ତାଙ୍କ ପତ୍ନୀ ତଥା ବ୍ୟାଡମିଣ୍ଟନ ଖେଳାଳି ଜ୍ୱାଲା ଗୁଟ୍ଟା । ସେହିଭଳି ଆମିର ମଧ୍ୟ ଚେନ୍ନାଇର ଏକ ହସ୍ପିଟାଲରେ ଚିକିତ୍ସାଧୀନ ନିଜ ମା’ଙ୍କୁ ଭେଟିବାକୁ ଯାଇଥିଲେ । ସେ କରପକ୍କମ ଠାରେ ଥିବା ଏକ ହୋଟେଲରେ ରହୁଥିଲେ । ବର୍ଷା ଯୋଗୁଁ ସେଠାରୁ ବାହାରିପାରି ନଥିଲେ ।
ତେବେ ବିଷ୍ଣୁ ବିଶାଲ ନିଜ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏହି ବିଷୟ ସେୟାର କରିଥିଲେ । ସେଥିରେ ସେ ଲେଖିଥିଲେ ତାଙ୍କ ଘରର ଚାରି ପାଖରେ ପାଣି । ଦୁଇଦିନ ହେଲା ପାଣି ଘେରରେ ଅଟକି ରହିଛନ୍ତି । ମୋବାଇଲ ନେଟୱାର୍କ କିମ୍ବା ୱାଇଫାଇ ମଧ୍ୟ ଆସୁନାହିଁ । ବହୁ କଷ୍ଟରେ ଘରର ଛାତ ଉପରୁ ଯିବା ପରେ ନେଟ ସଂଯୋଗ ଆସିବାରୁ ସେ ନିଜର ବାର୍ତ୍ତା ପୋଷ୍ଟ କରିଥିଲେ । ଏହା ଜାଣିବା ପରେ ଅଗ୍ନିଶମ ବାହିନୀ ସେମାନଙ୍କୁ ଉଦ୍ଧାର କରିବାକୁ ଯାଇଥିଲା । ବିଷ୍ଣୁ ବିଶାଲ ମଧ୍ୟ ଉଦ୍ଧାର ବେଳର ଏକ ଫଟୋ ସେୟାର କରିଛନ୍ତି । ଯେଉଁଥିରେ ଆମିରଙ୍କ ସହିତ ସେ, ତାଙ୍କ ପତ୍ନୀ ଓ ଉଦ୍ଧାରକରୀ ଦଳର ସଦସ୍ୟମାନଙ୍କୁ ଦେଖିବାକୁ ମିଳିଛି ।
