ଭୁବନେଶ୍ୱର,୧୧/୦୨: ରାହୁଲ ଗାନ୍ଧୀଙ୍କ ଭାରତ ଯୋଡ଼ ନ୍ୟାୟଯାତ୍ରା ପରେ ରାଜ୍ୟରେ କଂଗ୍ରେସର ହାୱା ଦେଖିବାକୁ ମିଳିଛି । ଆଶାୟୀମାନେ କଂଗ୍ରେସରେ ପ୍ରାର୍ଥୀ ହେବା ପାଇଁ ଏବେଠୁ ଭିଡ଼ ଜମାଇଲେଣି । ରବିବାର ଅନଲାଇନ ଆବେଦନର ଶେଷ ଦିବସ ଥିଲେ ମଧ୍ୟ ଏବେ ୩ ହଜାରରୁ ଅଧିକ ଆବେଦନ କଲେଣି । ୧୪୭ ବିଧାନସଭା ନିର୍ବାଚନ ମଣ୍ଡଳୀ ପାଇଁ ୨୫ଶହ ଆଶାୟୀ ଆବେଦନ କରିଥିବା ବେଳେ ୨୧ ସଂସଦୀୟ କ୍ଷେତ୍ର ପାଇଁ ୫ଶହରୁ ଅଧିକ ଆଶାୟୀ ଆବେଦନ କରିଥିବା ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକ ସୂଚନା ଦେଇଛନ୍ତି । ତେବେ ଟିକଟ୍ ଆବେଦନ ଦୌଡ଼ରେ କିଛି ଅବସରପ୍ରାପ୍ତ ଆଇଏଏସ୍ ଅଧିକାରୀ, ବରିଷ୍ଠ ଡାକ୍ତର ଓ ଇଞ୍ଜିନିୟର ମଧ୍ୟ ଥିବା ସେ କହିଛନ୍ତି ।
ଅପରପକ୍ଷେ ଟିକେଟ୍ ଚୟନ ବେଳେ ୧୧ଟି ମାପଦଣ୍ଡକୁ ନେଇ ବିଚାର କରାଯିବ । ମାତ୍ର ଜିତିବା ସମ୍ଭାବନାକୁ ସର୍ବାଧିକ ଗୁରୁତ୍ୱ ଦିଆଯିବ। ୭ ଦିନ ମଧ୍ୟରେ ଚୂଡାନ୍ତ ତାଲିକା କରି ଦିଲ୍ଲୀ ପଠାଯିବ । ସେଠାରୁ ପର୍ଯ୍ୟବେକ୍ଷକ ଆସିଛନ୍ତି । ସେମାନେ ବିଭିନ୍ନ ନିର୍ବାଚନମଣ୍ଡଳୀ ଗସ୍ତ କରିବେ । ଅନଲାଇନରେ ଫିଡ୍ ବ୍ୟାକ୍ ନେବେ । ମୋବାଇଲରେ ପଚାରି ବୁଝିବେ । ଏହା ସହିତ ଆବେଦନକାରୀଙ୍କ ମଧ୍ୟରୁ ମହିଳା, ଯୁବ ଓ ଛାତ୍ରଙ୍କୁ ଗୁରୁତ୍ୱ ଦିଆଯିବ । ସେହିପରି ରାଜ୍ୟ ଅତିଥି ଭବନରେ ଆଜି ଆଶାୟୀଙ୍କ ସହ ରାଜ୍ୟ କଂଗ୍ରେସ ପ୍ରଭାରୀ ଡ. ଅଜୟ କୁମାର ଆଲୋଚନା କରିଛନ୍ତି । ୮୭ଟି ନିର୍ବାଚନମଣ୍ଡଳୀରୁ ଆସିଥିଲେ । ଅନ୍ୟ ଦିନମାନଙ୍କରୁ ପରେ ଆସିବେ । ସମସ୍ତଙ୍କୁ ସୋସିଆଲ୍ ମିଡିଆରେ ଫଲୋଅର୍ସ ବଢାଇବା, ନିର୍ବାଚନମଣ୍ଡଳୀ ଲୋକଙ୍କୁ ନେଇ ହ୍ୱାଟସ୍ ଆପ୍ ଗ୍ରୁପ୍ ତିଆରି କରିବା ଭଳି ବିଭିନ୍ନ କାମ ଦେଇଛନ୍ତି । ଯେଉଁ ଆଶାୟୀ ରାଜନୀତି ସମ୍ପର୍କିତ ଅଧିକ କାମ କରିବ, ତାଙ୍କୁ ଟିକଟ୍ ମିଳିବ । ଯେଉଁମାନେ ଆବେଦନ କରିନାହାନ୍ତି, ଆସନ୍ତାକାଲି ଶେଷ ଦିବସ ଥିବାରୁ ଆବେଦନ କରିଦିଅନ୍ତୁ ବୋଲି ଡ. କୁମାର କହିଛନ୍ତି ।
ପିସିସି ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ କହିଛନ୍ତି, ରାଜ୍ୟରେ କଂଗ୍ରେସର ଲୋକପ୍ରିୟତା ବୃଦ୍ଧି ପାଇଛି । ଦୀର୍ଘ ଦିନର ସରକାର ବିରୋଧରେ ଶାସନ ବିରୋଧୀ ହାୱା ଦେଖିବାକୁ ମିଳୁଛି । ଯାହାର ଲାଭ କଂଗ୍ରେସକୁ ଯିବ । ଆଶାୟୀ ରାଜନେତାମାନେ ଏହା ଜାଣି ସାରିଲେଣି । ତେଣୁ ଆବେଦନ ପାଇଁ ଅଧିକରୁ ଅଧିକ ରାଜନେତା ଓ ସାଧାରଣ ନାଗରିକ ମଧ୍ୟ ଆଶା କରୁଛନ୍ତି ବୋଲି କହିଛନ୍ତି ।
